Mawu Gblaa Mo Kɛ Baa E Ngɔ

NƆ́ HE JE NƐ NI KOMƐ HE WE YI: Nihi fuu nɛ a he ye kaa Mawu ngɛ ɔ susuɔ kaa a kɛ Mawu a kpɛti kɛ. Christina nɛ e je Ireland nɛ jinɛ e yaa sɔlemi daa otsi ɔ de ke: “I le kaa Mawu nɛ bɔ níhi tsuo, se i li lɛ. E pee we mi gblee kaa ma hɛ mi kɛ su e he.”

NƆ́ NƐ BAIBLO Ɔ TSƆƆ: Ke wa ya je si himi ko nɛ mi wa mi po ɔ, Mawu yaa nɔ nɛ e yeɔ bua wɔ. Yesu kɛ nɔ́ hetomi nɔ́ ko tsu ní kɛ tsɔɔ kaa Mawu susuɔ wa he. E de ke: “Ke nɔ ko ngɛ to lafa, nɛ a kpɛti kake laa a, anɛ e be nyingmi nɛɛ kɛ nɛɛ ɔ sie ngɛ yo ɔmɛ a nɔ, nɛ e ya hla nɔ nɛ laa a” lo? Mɛni wa kaseɔ ngɛ munyu nɛ ɔ nɛ Yesu tu ɔ mi? Yesu tsa e munyu ɔ nɔ ke: “Jã nɔuu kɛ̃ nyɛ Tsɛ nɛ ngɛ hiɔwe ɔ sume kaa bimɛ tsɔwi nɛ ɔmɛ a kpɛti nɔ kake nɛ laa.”​—Mateo 18:12-14.

“Bimɛ tsɔwi nɛ ɔmɛ” a kpɛti nɔ tsuaa nɔ he jua wa ha Mawu. Mɛni blɔ nɔ Mawu guɔ kɛ ‘hlaa nihi nɛ a laa a’? Kaa bɔ nɛ Yohane 6:44 ɔ tsɔɔ ɔ, Mawu lɛ gblaa nihi kɛ baa e ngɔ.

Mo susu bɔ nɛ Mawu plɛ kɛ gbla ni komɛ nɛ a hɛɛ tsui kpakpa kɛ ba e ngɔ ha a he nɛ o hyɛ. Ngɛ kaseli ɔmɛ a be ɔ mi ɔ, Mawu tsɔ kaselɔ Filipo nɛ e ya ye bua Etiopia manyɛ ɔ tsɔlɔ nɔkɔtɔma ko. Nyumu ɔ ngɛ Baiblo gbami ko kanee nɛ e nui sisi, nɛ Filipo tsɔɔ lɛ nya. (Bɔfo Ɔmɛ A Ní Tsumi 8:26-39) Be ko ɔ, Mawu ha nɛ bɔfo Petro ya ye bua nyumu ko nɛ a tsɛɛ lɛ ke Kornelio. Kornelio nɛ ɔ ji Roma tabo ɔ we asafoatsɛ. E suɔ kaa e ma ja Mawu, enɛ ɔ he ɔ, e sɔleɔ. (Bɔfo Ɔmɛ A Ní Tsumi 10:1-48) Mawu fã bɔfo Paulo kɛ nihi nɛ piɛɛ e he ɔ hu konɛ a ya pa ko nya ngɛ Filipi ma a se. Benɛ a ya su pa a nya a, a ya na “Mawu jalɔ” ko nɛ a tsɛɛ lɛ ke Lidia. ‘Yehowa bli Lidia juɛmi nya nɛ nɔ́ nɛ Paulo ngɛ dee ɔ, e bu tue saminya.’​—Bɔfo Ɔmɛ A Ní Tsumi 16:9-15.

Nimli nɛ ɔmɛ tsuo nɛ wa wo a ta a, hla Yehowa se blɔ, nɛ Yehowa ha nɛ a na lɛ. Mwɔnɛ ɔ, mɛnɔmɛ nɛ a fiɛɛɔ Mawu sɛ gbi nɛ ngɛ Baiblo ɔ mi ɔ kɛ tsɔɔ nihi ngɛ wehi a mi, kɛ he tsuaa he nɛ nihi ngɛ? Nihi fuu ma ha heto ke, “Yehowa Odasefohi.” Mo bi o he ke, ‘Anɛ pi Mawu nɛ e ngɛ nimli nɛ ɔmɛ a nɔ gue konɛ e kɛ gbla mi kɛ ba e ngɔ lo?’ Enɛ ɔ he ɔ, wa ngɛ mo he wami woe konɛ o sɔle kɛ ha Mawu, nɛ́ o ngmɛ lɛ blɔ nɛ e gbla mo kɛ ba e ngɔ.a