BAIBLO MI SANE BIMIHI NƐ A HA HETO
Anɛ jamihi tsuo woɔ Mawu hɛ mi nyami lo?
Ke o buɔ amaniɛ bɔmihi tue ɔ, o maa na kaa ngɛ je kɛ wɛ ɔ, be komɛ ngɛ nɛ nihi laa woɔ jami se kɛ peeɔ ní yayamihi. Tsa pi jamihi tsuo a nɔ nɛ anɔkuale Mawu ɔ kplɛɛ. (Mateo 7:15) Ngɛ anɔkuale mi ɔ, nihi daa jami nɔ kɛ sisiɔ nihi babauu.—Kane 1 Yohane 5:19.
Se kɛ̃ ɔ, Mawu le nihi nɛ a tsui mi tsɔ, nɛ a suɔ anɔkuale ɔ. (Yohane 4:23) Mawu suɔ kaa nihi kaa jã a nɛ a ba kase anɔkuale ɔ kɛ je e Munyu nɛ ji Baiblo ɔ mi.—Kane 1 Timoteo 2:3-5.
Mɛni blɔ nɔ o maa gu kɛ le anɔkuale jami mi tso?
Yehowa Mawu ngɛ nihi nɛ a ngɛ jami slɔɔtoslɔɔtohi a mi ɔ kake pee. E ngɛ enɛ ɔ pee kɛ gu anɔkuale ɔ nɛ e ngɛ mɛ tsɔɔe ɔ nɔ. E ngɛ mɛ tsɔɔe konɛ a suɔ a sibi hulɔ. (Mika 4:2, 3) Enɛ ɔ he ɔ, o ma nyɛ maa le nihi nɛ a ngɛ anɔkuale jami ɔ mi ɔ a mi tso, kɛ gu bɔ nɛ a kɛ a sibi hiɔ si ha a nɔ.—Kane Yohane 13:35.
Yehowa gu anɔkuale jami nɔ kɛ ngɛ nihi tsuo kake pee.—La 133:1
Baiblo ɔ ji nɔ́ nɛ kudɔɔ anɔkuale jami mi bimɛ a hemi kɛ yemi, nɛ lɔ ɔ nɔuu nɛ kudɔɔ a je mi bami. (2 Timoteo 3:16) Jehanɛ se hu ɔ, a woɔ Mawu biɛ ɔ hɛ mi nyami. (La 83:18) A fiɛɛɔ kɛ tsɔɔ nihi kaa Mawu Matsɛ Yemi ɔ pɛ ji nɔ́ nɛ ma ba tsu adesahi a haomihi a he ní ha mɛ. (Daniel 2:44) A kase Yesu nɛ a ha nɛ a ‘la a ngɛ tsoe’ kɛ gu kpakpa nɛ a peeɔ nihi ɔ nɔ. (Mateo 5:16) Enɛ ɔ he ɔ, nihi le anɔkuale Kristofohi kaa mɛ ji nihi nɛ a yaa nihi a wehi a mi ya fiɛɛɔ Mawu Matsɛ Yemi ɔ he sane kpakpa a kɛ haa mɛ.—Kane Mateo 24:14; Bɔfo Ɔmɛ A Ní Tsumi 5:42; 20:20.