BAIBLO MI SANE BIMIHI NƐ A HA HETO
Mɛni Ji Kojomi Ligbi?
Mɛni he je nɛ kojomi ligbi ɔ maa pee bua jɔmi be ɔ?
Blema a, Mawu ngɔ Manyadali kɛ tsu ní kɛ kpɔ e we bi nɛ a ngɛ nɔ́ nae ɔ. (Manyadali 2:18) Baiblo ɔ tu Kojomi Ligbi nɛ maa ba hwɔɔ se ɔ hu he munyu kaa e ji bua jɔmi be nɛ Yehowa, nɛ ji je ɔ tsuo Kojolɔ ɔ ma kpɔ adesahi kɛ je nɔ́ nami mi.—Kane La 96:12, 13; Yesaya 26:9.
Mawu hla Yesu konɛ e kɛ dami sane yemi nɛ kojo nihi nɛ a hɛ ngɛ, kɛ ni nɛmɛ nɛ gbo ɔ tsuo. (Bɔfo Ɔmɛ A Ní Tsumi 10:42; 17:31) Nihi babauu li Mawu he nɔ́ ko nɛ a kɛ gbo. Ngɛ Kojomi Ligbi ɔ mi ɔ, Yesu ma tle jamɛ a ni ɔmɛ si kɛ ba wami mi konɛ a kase anɔkuale Mawu ɔ he ní, nɛ a suɔ lɛ.—Kane Bɔfo Ɔmɛ A Ní Tsumi 24:15.
Mɛni he je nɛ Kojomi Ligbi ɔ ma he jeha akpe ɔ?
A ma tle nihi nɛ a gbo ɔ si ngɛ jeha akpe ɔ mi. (Kpojemi 20:4, 12) E sa nɛ a ná be kɛ kase Mawu he ní, konɛ a bu lɛ tue. Baiblo ɔ tsɔɔ kaa pi níhi nɛ a pee loko a gbo ɔ nɔ nɛ a maa da kɛ kojo mɛ, mohu ɔ, a maa da níhi nɛ a maa pee ngɛ a si tlemi ɔ se ɔ nɔ kɛ kojo mɛ.—Kane Roma Bi 6:7.
Jehanɛ hu, Baiblo ɔ tu kojomi ligbi ko nɛ maa ba tlukaa loko jeha akpe ɔ maa je sisi ɔ he munyu. A tsɛɛ jamɛ a ligbi ɔ hu ke nyagbe ɔ, kaa bɔ nɛ wa susu he ngɛ womi tɛtlɛɛ nɛ ɔ e hɛ mi munyu ɔmɛ a mi ɔ. Jamɛ a ligbi ɔ, Mawu ma kpata yayami peeli tsuo a hɛ mi. (2 Petro 3:7) Enɛ ɔ he ɔ, e sa kaa waa ngɔ wa je mi bami kɛ tsɔɔ kaa wa suɔ Mawu.—Kane 2 Petro 3:9, 13.