ANƐ O LE LO?

Mɛni blɔ nɔ a gu kɛ pee womi kpo ɔmɛ nɛ a ngma Mawu Munyu ɔ ngɛ mi ɔ, nɛ kɛ a kɛ tsu ní kɛɛ?

Luka sane kpakpa a tsɔɔ kaa be ko ɔ, Yesu bli Yesaya womi kpo ɔ nɛ e kane, nɛ e kpale koklo. Yohane hu ngma ngɛ e sane kpakpa a mi kaa, pi nyakpɛ níhi tsuo nɛ Yesu pee ɔ nɛ e ngma ngɛ e womi kpo ɔ mi.​—Luka 4:16-20; Yohane 20:30; 21:25.

Mɛni a kɛ pee womi kpo ɔmɛ? Lohwe he womi, loo ngɔwu nɛ a kɛ pee. A peeɔ lɛ gagaaga, nɛ a kokloɔ kɛ woɔ tso he, nɛ ja a bli mi loko a ma nyɛ maa na ningma amɛ. A ngma munyuza amɛ kpitikpiti kɛ je yi nɔ kɛ ya sisi. Ke womi kpo ɔ ka a, a kɛ tso woɔ e nya hiɛ kɛ hiɛ, konɛ e ye bua ní kanelɔ ɔ nɛ e bli kɛ ya he nɛ e ngɛ hlae ɔ.

Womi nɛ ji, The Anchor Bible Dictionary ɔ de ke; “Nɔ́ nɛ hi ngɛ womi kpo ɔ he ji kaa, e ka saii maa pee gugue enuɔ kɛ fa aloo mita 10, nɛ a ma nyɛ maa ngma Baiblo mi womi kake mi munyuhi tsuo ngɛ nɔ.” Kaa nɔ hyɛmi nɔ́ ɔ, Luka Sane Kpakpa a tsuo ma nyɛ maa ya womi kpo nɛ e kami maa pee gugue enuɔ nɔ. Ngɛ be komɛ a mi ɔ, a sãa womi kpo ɔ nya, nɛ a kɛ tɛ dlaa e nya amɛ, nɛ a woɔ lɛ tsopa.

Mɛnɔmɛ ji “osɔfo nikɔtɔma amɛ” nɛ a tu a he munyu ngɛ Kristofohi a Hela Ngmami ɔ (Somi He ɔ) mi ɔ?

Benɛ osɔfo yemi je sisi ngɛ Israel ɔ, nyumu kake lɛ sɔmɔɔ kaa osɔfo nɔkɔtɔma pe kulaa, nɛ ja e gbo loko a hlaa nɔ kpa. (4 Mose 35:25) Aaron ji kekleekle nɔ nɛ ná jamɛ a he blɔ ɔ. Ngɛ e se ɔ, ke osɔfo nɔkɔtɔma pe kulaa a gbo ɔ, e bitɛte lɛ náa jamɛ a he blɔ ɔ. (2 Mose 29:9) Aaron bibimɛ fuu sɔmɔ kaa osɔfohi, se a ti nihi bɔɔ pɛ nɛ a sɔmɔ kaa osɔfo nɔkɔtɔma pe kulaa.

Benɛ je ma amɛ ye Israel nɔ ɔ, nɔ yeli ɔmɛ lɛ a hla osɔfo nɔkɔtɔma pe kulaa kɛ ha mɛ bɔ nɛ a suɔ. Behi fuu ɔ, a hla nihi kɛ je weku pɔtɛɛ komɛ a mi, titli ngɛ Aaron weku ɔ mi. “Osɔfo nikɔtɔma amɛ” ji osɔfo kuu ɔmɛ a mi nimli titli. E maa pee kaa a hla osɔfo nikɔtɔma amɛ kɛ je osɔfo kuu 24 a mi; nɛ ji osɔfo weku ɔmɛ a nya dali ɔmɛ; nɛ nihi nɛ a ye osɔfo nɔkɔtɔma pe kulaa hyɛ kaa Ana hu piɛɛ he.​—1 Kronika 24:1-19; Mateo 2:4; Marko 8:31; Bɔfo Ɔmɛ A Ní Tsumi 4:6.