Ngɔɔ O hemi Kɛ Yemi ɔ Kɛ To Baiblo ɔ He Nɛ O hyɛ

KE O hla nihi etɛ nɛ o bi mɛ jami nɛ a ngɛ mi ɔ, ke e hí kulaa a, a ti nɔ kake ma de mo ke Kristofo no ji lɛ. Anɛ mo hu o deɔ ke Kristofo no ji mo lo? Ke jã a, lɛɛ o piɛɛ nihi ayɔ akpe enyɔ kɛ se nɛ a deɔ ke Kristofohi ji mɛ ɔ a he. Mwɔnɛ ɔ, sɔlemihi fuu ngɛ nɛ a deɔ ke Kristofohi ji mɛ, se a tsɔɔmi ɔmɛ ngɛ ekpaekpa. Enɛ ɔ he ɔ, o hemi kɛ yemi ɔ ma nyɛ maa je ekpa ngɛ ni kpahi nɛ mɛ hu a ke Kristofohi ji mɛ ɔ a nɔ́ ɔ he. Anɛ nɔ́ nɛ nɔ ko he ye ɔ he hia lo? Ke o suɔ nɛ o pee Kristofo no nitsɛ ɔ, lɛɛ e sa nɛ o hemi kɛ yemi ɔ kɛ nɔ́ nɛ Baiblo ɔ tsɔɔ ɔ nɛ kɔ.

A le nihi nɛ a nyɛɛ Yesu Kristo se kekle ɔ kaa Kristo we bi loo “Kristofohi.” (Bɔfo Ɔmɛ A Ní Tsumi 11:26) Jamɛ a be ɔ mi ɔ, Kristofohi a jami kake pɛ lɛ ngɛ. Enɛ ɔ he ɔ, e he hia we nɛ a ngɔ biɛ kpahi kɛ kadi mɛ. Mɛ tsuo a pee kake nɛ a ngɔ Yesu Kristo nɛ ji Kristofohi a Hɛ Mi Nyɛɛlɔ ɔ blɔ tsɔɔmihi kɛ tsu ní. Anɛ o jami ɔ hu nɛɛ? Anɛ o susu kaa o jami ɔ kɛ blɔ tsɔɔmihi nɛ Yesu kɛ ha a tsuɔ ní kaa bɔ nɛ Kristofohi nɛ a hi si blema a pee ɔ lo? Kɛ o maa pee kɛɛ kɛ le kaa o jami ɔ peeɔ jã niinɛ? Blɔ kake pɛ nɛ o ma nyɛ maa gu nɔ kɛ le. Lɔ ɔ ji kaa o kɛ Baiblo ɔ maa to o jami ɔ he.

Mo susu enɛ ɔ he nɛ o hyɛ: Yesu Kristo ná bu nɛ mi kuɔ kɛ ha Ngmami ɔ, nɛ e na lɛ kaa e ji Mawu Munyu. Yesu kã nihi nɛ a ngɛ bumi kɛ ha nimli a kusumihi pe Mawu Munyu ɔ a hɛ mi. (Marko 7:9-13) Wa ma nyɛ ma de ke anɔkuale Kristofohi ngɔɔ a tsɔɔmihi kɛ daa Baiblo ɔ nɔ. Enɛ ɔ he ɔ, e sa nɛ Kristofo no fɛɛ Kristofo no nɛ bi e he ke, ‘Anɛ níhi nɛ ye jami ɔ tsɔɔ ɔ kɛ Baiblo ɔ kɔ lo?’ Bɔ nɛ pee nɛ o ná sane bimi nɛ ɔ heto ɔ, moo ngɔ níhi nɛ a tsɔɔ nyɛ ngɛ o jami ɔ mi ɔ kɛ to Baiblo ɔ he.

Yesu tsɔɔ kaa e sa nɛ waa da anɔkuale nɛ ngɛ Baiblo ɔ mi ɔ nɔ kɛ ja Mawu. (Yohane 4:24; 17:17) Bɔfo Paulo hu tsɔɔ kaa loko a ma he wa yi wami ɔ, ja wa “le anɔkuale ɔ.” (1 Timoteo 2:4) Enɛ ɔ he ɔ, e sa nɛ wa hemi kɛ yemi kɛ Baiblo ɔ nɛ kɔ, ejakaa lɔ ɔ nɔ wa wami daa si ngɛ!

BƆ NƐ WA MAA NGƆ WA HEMI KƐ YEMI Ɔ KƐ TO BAIBLO Ɔ HE HA

Wa kpa mo pɛɛ nɛ o kane sane bimi ekpa nɛ ɔmɛ, nɛ o kadi bɔ nɛ Baiblo ɔ ha sane bimi ɔmɛ a heto ha a. Moo hyɛ ngmamihi nɛ a tsɛ se ɔmɛ, nɛ o susu heto ɔmɛ a he. Lɔ ɔ se ɔ, mo bi o he ke, ‘Anɛ níhi nɛ ye jami ɔ tsɔɔ ɔ ngɛ Baiblo ɔ mi jã niinɛ lo?’

Sane bimi nɛ ɔmɛ maa ye bua mo konɛ o ngɔ níhi nɛ o jami ɔ tsɔɔ mo ɔ kɛ to Baiblo ɔ he. Anɛ o suɔ kaa o maa ngɔ ní kpa komɛ nɛ a tsɔɔ nyɛ ngɛ o jami ɔ mi ɔ kɛ to nɔ́ nɛ Baiblo ɔ de ɔ he lo? Yehowa Odasefohi a bua maa jɔ he kaa a maa ye bua mo konɛ o kase Baiblo ɔ mi anɔkuale ɔ. O ma nyɛ ma de Yehowa Odasefo no ko nɛ e kɛ mo nɛ ba kase Baiblo ɔ. E be mo nɔ́ ko hee. Aloo o ma nyɛ maa ya wa Intanɛti ní tsumi he ɔ ngɛ jw.org/ada.

1 SANE BIMI: Mɛnɔ ji Mawu?

HETO: Yesu Tsɛ Yehowa ji Mawu Ope, nɛ lɛ nɛ e bɔ níhi tsuo.

NƆ́ NƐ BAIBLO Ɔ DE:

“Ke wa ngɛ sɔlee ha nyɛ ɔ, wa naa Mawu, wa Nyɔmtsɛ Yesu Kristo Tsɛ ɔ si daa.”—Kolose Bi 1:3.

“Wa Nyɔmtsɛ, kɛ wa Mawu! Mo ji nɔ nɛ sa kaa a ngɔ hɛ mi nyami, bu, kɛ he wami kɛ ha. Mo lɛ o bɔ níhi tsuo.”—Kpojemi 4:11.

Hyɛ Roma Bi 10:13 kɛ 1 Timoteo 1:17 hulɔ.

2 SANE BIMI: Mɛnɔ ji Yesu Kristo?

HETO: Yesu ji Mawu Bi tɛte. Mawu nɛ bɔ Yesu, lɔ ɔ he ɔ, e ngɛ sisije. Yesu baa e he si kɛ haa Mawu, nɛ e peeɔ Mawu suɔmi nya ní.

NƆ́ NƐ BAIBLO Ɔ DE:

‘Ye Tsɛ ɔ pe mi.’—Yohane 14:28.

“[Kristo] ji Mawu nɛ a nɛ́ lɛ ɔ subai nɛ a naa. Lɛ ji nibɔ níhi tsuo a kpɛti tɛte.”—Kolose Bi 1:15.

Hyɛ Mateo 26:39 kɛ 1 Korinto Bi 15:28 hulɔ.

3 SANE BIMI: Mɛni ji mumi klɔuklɔu ɔ?

HETO: Mumi klɔuklɔu ɔ ji Mawu he wami nɛ e kɛ tsuɔ e yi mi tomi he ní. Pi nɔmlɔ ji mumi klɔuklɔu ɔ. Nihi ma nyɛ ma ná mumi klɔuklɔu ɔ konɛ e wo mɛ he wami.

NƆ́ NƐ BAIBLO Ɔ DE:

“Benɛ Elizabet nu nɛ Maria nga lɛ ɔ, bimwɔyo ɔ hua ngɛ e mi mi. Mumi klɔuklɔu ɔ ba Elizabet nɔ.”—Luka 1:41.

“Se ke mumi klɔuklɔu ɔ na ba nyɛ nɔ ɔ, nyɛ ma na he wami.”—Bɔfo Ɔmɛ A Ní Tsumi 1:8.

Hyɛ 1 Mose 1:2 kɛ Bɔfo Ɔmɛ A Ní Tsumi 2:1-4; 10:38 hulɔ.

4 SANE BIMI: Mɛni ji Mawu Matsɛ Yemi ɔ?

HETO: Mawu Matsɛ Yemi ɔ ji nɔ yemi ko nɛ ngɛ hiɔwe. Yesu ji Matsɛ ngɛ Mawu Matsɛ Yemi ɔ mi. E be kɛe nɛ Matsɛ Yemi nɛ ɔ ma ha nɛ nimli nɛ pee Mawu suɔmi nya ní ngɛ zugba a nɔ.

NƆ́ NƐ BAIBLO Ɔ DE:

“Bɔfo kpaagone ɔ kpa e titimati ɔ, nɛ i nu gbihi nɛ ngɛ pɛe wawɛɛ ngɛ hiɔwe ke: ‘Amlɔ nɛ ɔ, wa Nyɔmtsɛ ɔ kɛ e Kristo ɔ nɛ a ngɛ je ɔ nɔ yee. Nɛ a maa ye matsɛ kɛ maa ya neneene! ’”—Kpojemi 11:15.

Hyɛ Daniel 2:44 kɛ Mateo 6:9, 10 hulɔ.

5 SANE BIMI: Anɛ dali tsuo maa ya hiɔwe lo?

HETO: Dɛbi. Mawu hla anɔkualetsɛmɛ bɔɔ ko pɛ kaa a ya hiɔwe. Baiblo ɔ tsɛɛ mɛ ke, “kuu nyafii.” A maa piɛɛ Yesu he kɛ ye adesahi a nɔ.

NƆ́ NƐ BAIBLO Ɔ DE:

“Kuu nyafii, nyɛ ko ye gbeye; ejakaa nyɛ Tsɛ ɔ ngɛ he tsui kaa e maa ngɔ Matsɛ Yemi ɔ ngɔ ha nyɛ.”—Luka 12:32.

“A maa ye osɔfo, nɛ a ma sɔmɔ Mawu kɛ Kristo; nɛ a kɛ Kristo maa ye matsɛ jeha akpe.”—Kpojemi 20:6.

Hyɛ Kpojemi 14:1, 3 hulɔ.

6 SANE BIMI: Mɛni ji Mawu yi mi tomi kɛ ha adesahi kɛ zugba a?

HETO: Mawu Matsɛ Yemi ɔ maa pee zugba a paradeiso, nɛ adesahi ma ná nɔmlɔ tso mi he wami kpakpa, tue mi jɔmi, kɛ wami nɛ be nyagbe.

NƆ́ NƐ BAIBLO Ɔ DE:

“Nihi nɛ a he jɔ ɔ, mɛɛ a maa hi zugba a nɔ ngɛ kplɔkɔtɔ, kɛ tue mi jɔmi mi.”—La 37:10, 11.

“Mawu ma tsu a hɛ mi vo nyu tsuo. Nɔ ko be gboe hu; nɔ ko be kɔmɔ yee hu; nɔ ko be ya foe hu, nɛ nɔ ko be nɔ́ nae hu. Ejakaa ní momo ɔmɛ a se po.”—Kpojemi 21:3, 4.

Hyɛ La 37:29 kɛ 2 Petro 3:13 hulɔ.