Yehowa Gbaa Nihi Nɛ A Bɔɔ Mɔde Wawɛɛ Kɛ Hlaa E Se Blɔ ɔ

1, 2. (a) Mɛni tsakpa lɛ ngɛ suɔmi kɛ hemi kɛ yemi a kpɛti? (b) Mɛni sane bimihi a he wa ma susu?

WA SUƆ Yehowa “ejakaa lɛ nɛ e suɔ wɔ kekle.” (1 Yoh. 4:19) Blɔ kake nɛ Yehowa gu nɔ kɛ tsɔɔ kaa e suɔ wɔ ji kaa, e sɛ hlami nɛ e jɔɔ e sɔmɔli anɔkualetsɛmɛ. Si abɔ nɛ suɔmi nɛ wa ngɛ kɛ ha Mawu ɔ mi ngɛ wae ɔ, si abɔ nɛ hemi kɛ yemi nɛ wa ngɛ ngɛ e mi ɔ mi waa, wa yɔseɔ kaa e ngɛ nitsɛnitsɛ, nɛ e maa jɔɔ nihi nɛ e suɔ ɔ kokooko.​—Kane Hebri Bi 11:6.

² Yehowa jɔɔ ɔ e sɔmɔli! Enɛ ɔ tsɔɔ nɔ nɛ e ji kɛ nɔ́ nɛ e peeɔ. Ja nɔ ko ná nɔ mi mami kaa Mawu woɔ nihi nɛ a bɔɔ mɔde wawɛɛ kɛ hlaa e se blɔ ɔ hiɔ loko e hemi kɛ yemi ɔ maa pi si, ejakaa “hemi kɛ yemi ji níhi nɛ wa ngɛ blɔ hyɛe ɔ a nɔ mi mami.” (Heb. 11:1) Niinɛ, hemi kɛ yemi tsɔɔ kaa wa ngɛ nɔ mi mami kaa Mawu maa jɔɔ wɔ kaa bɔ nɛ e wo si ɔ. Se mɛni blɔ nɔ nɛ hɛ kɛ nɔ fɔmi nɛ wa ngɛ kaa a maa jɔɔ wɔ ɔ yeɔ bua wɔ ngɛ? Mɛni blɔ nɔ Yehowa gu kɛ jɔɔ e sɔmɔli blema kɛ mwɔnɛ ɔ? Ha nɛ waa hyɛ.

YEHOWA WO SI KAA E MAA JƆƆ E SƆMƆLI

3. Mɛni si womi nɛ ngɛ Malaki 3:10?

³ Yehowa Mawu wo si kaa e maa jɔɔ e sɔmɔli anɔkualetsɛmɛ, enɛ ɔ he ɔ, e woɔ wɔ he wami kaa waa bɔ wa he mɔde konɛ wa nine nɛ su jɔɔmi nɛ ɔ nɔ. Yehowa de ke: “Nyɛɛ ka mi nɛ nyɛɛ hyɛ kaa i be hiɔwe saflɛhi blie nɛ ma ha nɛ ní kpakpa babauu maa nɛ ngɔ pue nyɛ nɔ babaaba kaa hiɔmi lo?” (Mal. 3:10) Ke wa bɔ wa he mɔde kaa bɔ nɛ Yehowa wo wɔ he wami kaa waa pee ɔ, lɔ ɔ maa tsɔɔ kaa wa suɔ nɛ e jɔɔ wɔ.

4. Mɛni he je nɛ wa ma nyɛ ma ná nɔ mi mami ngɛ Yesu munyu nɛ ngɛ Mateo 6:33 ɔ mi ɔ?

⁴ Yesu wo e kaseli ɔ mɛ si kaa ke a kɛ Matsɛ Yemi ɔ pee nɔ́ titli ngɛ a si himi mi ɔ, Mawu maa ye bua mɛ. (Kane Mateo 6:33.) Yesu le kaa Yehowa yeɔ e si womi nɔ be tsuaa be, enɛ ɔ he ɔ, e nyɛ nɛ e tu jamɛ a munyu ɔ kɛ nɔ mi mami. (Yes. 55:11) Lɔ ɔ he ɔ, wɔ hu wa ma nyɛ ma ná nɔ mi mami kaa ke wa he Yehowa ye kɛ wa tsui tsuo ɔ, e maa ye e si womi ɔ nɔ. E de ke: “I be mo sie, nɛ i be mo kuae gblegbleegble.” (Heb. 13:5) Wa ma nyɛ maa ngɔ munyu nɛ ɔ kɛ to nɔ́ nɛ Yesu de ngɛ Mawu Matsɛ Yemi ɔ, kɛ níhi nɛ da nɛ wa ma hla kekle ɔ he.

5. Mɛni he je nɛ heto nɛ Yesu ha Petro ɔ woɔ wa hemi kɛ yemi mi he wami ɔ?

⁵ Be ko ɔ, bɔfo Petro bi Yesu ke: “Hyɛ, wɔɔ lɛɛ wa si nɔ́ tsuaa nɔ́, nɛ wa ba nyɛɛ o se. Mɛni wa ma na mɔ?” (Mat. 19:27) Yesu kã we Petro hɛ mi ngɛ sane nɛ e bi ɔ he, mohu ɔ, e de e kaseli ɔmɛ kaa a maa jɔɔ mɛ ngɛ níhi nɛ a kɛ sã afɔle ɔmɛ a he. Yesu bɔfo anɔkualetsɛmɛ ɔmɛ kɛ ni kpahi maa piɛɛ Yesu he kɛ ye matsɛ ngɛ hiɔwe. Se loko jamɛ a be ɔ maa su ɔ, mɛni jɔɔmihi a nine maa su nɔ? Yesu de ke: “Nɔ tsuaa nɔ nɛ ma si wehi, loo nyɛminyumuhi, loo nyɛmiyihi, loo e tsɛ, loo e nyɛ, loo bimɛ, loo zugba ngɛ ye he ɔ, a maa to lɛ nane mi totoe lafa, nɛ a ma ha lɛ neneene wami.” (Mat. 19:29) E kaseli ɔmɛ ma ná jɔɔmihi nɛ kle pe níhi nɛ eko ɔ, a kɛ maa sã afɔle ɔ po. Anɛ tsɛmɛ, nyɛmɛ, nyɛminyumuhi, nyɛmiyihi, kɛ bimɛ nɛ wa ba ná ngɛ asafo ɔ mi ɔ he jua wɛ pi ní kpahi nɛ waa kɛ sã afɔle ngɛ Matsɛ Yemi ɔ he ɔ lo?

“OSƐKƐ NƐ NU WƆ”

6. Mɛni he je nɛ Yehowa wo e sɔmɔli si kaa e maa jɔɔ mɛ ɔ?

⁶ Si nɛ Yehowa wo e sɔmɔli kaa e maa jɔɔ mɛ ɔ yeɔ bua mɛ nɛ a nyɛɛ daa a hemi kɛ yemi he kahi a nya. Ngɛ jɔɔmihi nɛ Yehowa sɔmɔli nɛ a yeɔ anɔkuale ɔ ma ná mwɔnɛ ɔ tsuo se ɔ, a ngɛ blɔ hyɛe wawɛɛ kaa a ma ná jɔɔmi nɛ kle pe kulaa hwɔɔ se. (1 Tim. 4:8) Ngɛ anɔkuale mi ɔ, ke wa ná nɔ mi mami wawɛɛ kaa ‘nihi nɛ hlaa Yehowa se blɔ ɔ, e gbaa mɛ’ ɔ, lɔ ɔ maa wo wɔ he wami, nɛ wa maa ya nɔ maa hɛɛ wa hemi kɛ yemi ɔ mi kpɛii.​—Heb. 11:6.

7. Ngɛ mɛni blɔ nɔ nɛ hɛ kɛ nɔ fɔmi ma nyɛ maa pee kaa osɛkɛ?

⁷ Yesu de ngɛ e Yoku ɔ Nɔ Fiɛɛmi ɔ mi ke: “Nyɛ nya, nɛ nyɛ ná bua jɔmi, ejakaa nyɛ hiɔwo nɛ ngɛ hiɔwe ɔ kle agbo. Gbali nɛ sɛ nyɛ hlami ɔ kikɛ nɛ ɔ nɔuu a wa mɛ yi mi.” (Mat. 5:12) Mawu sɔmɔli komɛ ma ná a hiɔwo ɔ ngɛ hiɔwe, nɛ ni kpahi hu ma ná a hiɔwo ɔ ngɛ paradeiso mi ngɛ zugba a nɔ kɛ ya neneene. E sa nɛ enɛ ɔ nɛ ha nɛ ‘wa nya, nɛ wa bua nɛ jɔ.’ (La 37:11; Luka 18:30) Wa maa ya hiɔwe jio, wa maa hi zugba a nɔ jio, wa hɛ kɛ nɔ fɔmi ɔ ma nyɛ maa pee “osɛkɛ nɛ nu wɔ kɛ da si kpɛii.” (Heb. 6:17-20) Kaa bɔ nɛ osɛkɛ nuɔ lɛ ko kɛ daa si kpɛii ke kɔɔhiɔ nɛ nya wa ngɛ fiae ɔ, jã nɔuu nɛ hɛ kɛ nɔ fɔmi nɛ wa ngɛ kaa wa nine maa su hiɔwo ko nɔ ɔ ma nyɛ maa ye bua wɔ konɛ waa ya nɔ nɛ waa hɛɛ wa hemi kɛ yemi ɔ mi. E ma nyɛ maa ye bua wɔ konɛ wa nyɛ nɛ waa da kahi a nya.

8. Ngɛ mɛni blɔ nɔ nɛ hɛ kɛ nɔ fɔmi be hae nɛ waa pee yeyeeye tsɔ?

⁸ Hɛ kɛ nɔ fɔmi nɛ wa ngɛ ɔ ma nyɛ maa ye bua wɔ konɛ wa ko pee yeyeeye tsɔ amlɔ nɛ ɔ. Kaa bɔ nɛ ke wa he ko ngɛ wɔ yee, nɛ waa kɛ tsopa nu kpa nɔ ɔ, e jɔɔ ɔ, jã kɛ̃ nɛ Mawu si womi ɔmɛ jɔɔ wa tsui he, nɛ wa pee we yeyeeye tsɔ. Wa le kaa ‘Yehowa maa bu wa he,’ enɛ ɔ he ɔ, ke wa ngɔ wa ‘haomi ɔmɛ kɛ ha lɛ ɔ, wa he mi jɔɔ wɔ! (La 55:22) Wa ngɛ hɛ kɛ nɔ fɔmi nɛ mi wa kaa Mawu ma nyɛ maa ‘pee níhi nɛ hiɛ babauu kɛ be nɔ kɛ ha wɔ, níhi nɛ wa be nyɛe ma bi, kɛ ni nɛmɛ nɛ wa juɛmi sui he po.’ (Efe. 3:20) Mo susu he nɛ o hyɛ. Pi níhi nɛ hiɛ loo níhi nɛ hiɛ babauu kɛkɛ nɛ Yehowa ma pee ha wɔ, mohu ɔ, e maa pee “níhi nɛ hiɛ babauu kɛ be nɔ ha wɔ”!

9. Mɛni he je nɛ wa ma nyɛ ma ná nɔ mi mami kaa Yehowa maa jɔɔ wɔ ɔ?

⁹ Bɔ nɛ pee nɛ wa nine nɛ su hiɔwo nɛ ɔ nɔ ɔ, e sa nɛ wa ná hemi kɛ yemi nitsɛ ngɛ Yehowa mi nɛ waa ngɔ e blɔ tsɔɔmihi kɛ tsu ní. Mose de Israel bi ɔmɛ ke: ‘Yehowa, o Mawu ɔ maa gbaa mo ngɛ zugba a nɛ e ngɔ kɛ ngɛ mo hae kaa o weto ní ɔ nɔ. Ke o maa bu Yehowa, o Mawu ɔ gbi tue, nɛ o maa ye nɔ́ tsuaa nɔ́ nɛ i ngɛ mo he mlaa woe mwɔnɛ ɔ nɔ pɛpɛɛpɛ ɔ, o be ohia yee. Yehowa maa gbaa mo kaa bɔ nɛ e wo si ɔ.’ (5 Mose 15:4-6) Anɛ o ngɛ nɔ mi mami wawɛɛ kaa Yehowa maa jɔɔ mo ke ji o ya nɔ nɛ o kɛ anɔkuale yemi sɔmɔ lɛ lo? Yi mi tomi kpakpa ko ngɛ nɛ lɔ ɔ he je ɔ, e sa kaa o ná nɔ mi mami.

YEHOWA LƐ JƆƆ MƐ

10, 11. Kɛ Yehowa plɛ kɛ jɔɔ Yosef ha kɛɛ?

¹⁰ A ngma Baiblo ɔ kɛ ha wɔ konɛ wa ná he se. Nɔ hyɛmi níhi ngɛ Baiblo ɔ mi nɛ tsɔɔ bɔ nɛ Yehowa jɔɔ e sɔmɔli anɔkualetsɛmɛ. (Rom. 15:4) Yosef nɔ hyɛmi nɔ́ ɔ maa enɛ ɔ nɔ mi wawɛɛ. Yosef nyɛmimɛ ɔmɛ so e yi nɔ nɛ a jua lɛ, nɛ pee se ɔ, e nyɔmtsɛ ɔ yo hu po e nya nɛ enɛ ɔ ha nɛ a wo lɛ tsu ngɛ Egipt. Anɛ Mawu kua lɛ lo? Ohoo! Baiblo ɔ de ke: ‘Yehowa kɛ Yosef ngɛ; nɛ e na lɛ mɔbɔ. Yehowa kɛ Yosef ngɛ, nɛ nɔ́ tsuaa nɔ́ nɛ e peeɔ ɔ, e yeɔ manye.’ (1 Mose 39:21-23) Yosef to e tsui si ngɛ ka nɛ ɔmɛ tsuo a mi, nɛ e ngɔ e hɛ kɛ fɔ Yehowa nɔ.

¹¹ Jeha komɛ a se ɔ, Farao je Yosef kɛ je tsu ɔ mi, nɛ e pee nyɔguɛ nɛ baa e he si nɛ ɔ e se yelɔ ngɛ Egipt. (1 Mose 41:1, 37-43) Benɛ Yosef yo ɔ fɔ binyumuhi enyɔ ha lɛ ɔ, “E wo e bitɛte ɔ Manase, nɛ e de ke, ‘Mawu ha nɛ ye hɛ je ye haomi ɔ tsuo, kɛ ye weku li tsuo a nɔ.’ E wo enyɔne ɔ Efraim, nɛ e de ke, ‘Mawu ha nɛ i wo ngmɛdu ngɛ zugba nɛ i na amanehlu ngɛ nɔ ɔ nɔ.’” (1 Mose 41:51, 52) Akɛnɛ Yosef ya nɔ nɛ e ye Mawu anɔkuale he je ɔ, Yehowa jɔɔ lɛ, nɛ jɔɔmi nɛ ɔ ha nɛ a baa Israel bi ɔmɛ kɛ Egipt bi ɔmɛ tsuo a yi. Oti ɔ ji kaa, Yosef yɔse kaa Yehowa wo lɛ hiɔ nɛ e jɔɔ lɛ.​—1 Mose 45:5-9.

12. Ngɛ mɛni blɔ nɔ nɛ Yesu ya nɔ nɛ e ye anɔkuale ngɛ kahi nɛ e kɛ kpe ɔ tsuo mi?

¹² Benɛ Yesu Kristo hu kɛ kahi ngɛ kpee ngɛ e hemi kɛ yemi ɔ he ɔ, e ya nɔ nɛ e bu Yehowa tue, nɛ Yehowa jɔɔ lɛ. Mɛni ye bua lɛ? Mawu Munyu ɔ de ke: “Akɛnɛ e le bua jɔmi nɛ e ma ná pee se he je ɔ, gbenɔ nɛ e ma gbo ngɛ sɛumi tso ɔ nɔ ɔ pi zo nɔ́ ko kulaa kɛ ha lɛ.” (Heb. 12:2) Yesu bua jɔ, ejakaa e nyɛ nɛ e tsɔ Mawu biɛ ɔ he. Jehanɛ hu ɔ, e Tsɛ ɔ bua jɔ e he, nɛ e ha lɛ he blɔ nguahi. Baiblo ɔ tsɔɔ kaa “e hii si ngɛ Mawu matsɛ sɛ ɔ hiɔ nɔ.” Nɛ Baiblo ɔ fã ko hu tsɔɔ kaa: “Mawu wo e nɔ gojoo, nɛ e ha lɛ biɛ nɛ kle pe biɛhi tsuo.”​—Filip. 2:9.

YEHOWA HƐ JI WA MƆDE BƆMI Ɔ NƆ

13, 14. Kɛ Yehowa naa níhi nɛ wa peeɔ haa lɛ ɔ ha kɛɛ?

¹³ Wa ma nyɛ ma ná nɔ mi mami kaa Yehowa bua jɔɔ mɔde fɛɛ mɔde nɛ wa bɔɔ kɛ sɔmɔɔ lɛ ɔ he. Ke wa he we wa he yi, nɛ wa yi mi peeɔ wɔ enyɔɔnyɔ ɔ, Yehowa nuɔ wɔ sisi. Ke wa ngɛ ohia yee, aloo hiɔ ngɛ wa nya gbae, aloo níhi a he susumi ha we nɛ waa kɛ wa nyɛmi tsuo nɛ sɔmɔ Mawu po ɔ, Yehowa nuɔ wɔ sisi. Wa ma nyɛ ma ná nɔ mi mami kaa Yehowa bua jɔɔ anɔkuale nɛ wa yaa nɔ nɛ wa yeɔ lɛ ngɛ kahi a mi ɔ he.​—Kane Hebri Bi 6:10, 11.

¹⁴ Jehanɛ hu ɔ, mo kai kaa, wa ma nyɛ maa hɛ wɔ kɛ su Mawu nɛ “buɔ kue fami tue” ɔ he, nɛ́ wa ná nɔ mi mami kaa e maa bu wɔ tue. (La 65:2) Wa Mawu ɔ, “Tsɛ mɔbɔ nalɔ ji lɛ, nɛ e ji Mawu nɛ woɔ nɔ bua ngɛ nɔ́ tsuaa nɔ́ mi.” E ma ha wɔ nɔ́ tsuaa nɔ́ nɛ wa hia konɛ wa nyɛ nɛ waa hɛ wɔ kɛ su e he. Be komɛ ɔ, e guɔ wa nyɛmimɛ nyumuhi kɛ yihi a nɔ kɛ yeɔ bua wɔ. (2 Kor. 1:3) Yehowa bua jɔɔ ke ji wa je mi mi jɔmi kpo kɛ tsɔɔ ni kpahi. ‘Ke o na ohiatsɛ mɔbɔ ɔ, e ngɛ kaa o pa nɔ́ ko kɛ ha Yehowa; nɛ nɔ́ nɛ o pee ɔ, e maa to nane mi ha mo.’ (Abɛ 19:17; Mat. 6:3, 4) Lɔ ɔ he ɔ, ke wa jeɔ wa tsui mi faa kɛ yeɔ bua nihi nɛ e fĩ mɛ ɔ, Yehowa naa kpakpa nɛ wa peeɔ ɔ kaa nɔ́ ko nɛ waa kɛ pa lɛ. Nɛ e wo si kaa lɛ nitsɛ e maa wo wɔ hiɔ.

JƆƆMIHI NƐ WA MA NÁ AMLƆ NƐ Ɔ KƐ YA NENEENE

15. Mɛni hiɔwo nɛ o ngɛ blɔ hyɛe? (Moo hyɛ foni nɛ ngɛ ní kasemi ɔ sisije ɔ.)

¹⁵ Kristofohi nɛ a pɔ mɛ nu ɔ ngɛ hɛ nɔ kami kaa a nine maa su ‘hiɔwo nɛ ji jlasi nɛ a kɛ haa nihi tsuo nɛ peeɔ nɔ́ nɛ da a nɔ. Nyɔmtsɛ Yesu Kristo, nɔ nɛ yeɔ dami sane ɔ maa ngɔ jlasi ɔ ngɔ ha mɛ.’ (2 Tim. 4:7, 8) Ke o ngɛ hɛ nɔ kami kaa o maa hi si ngɛ zugba a nɔ ɔ, lɔ ɔ tsɔɔ we kaa a sisi mo. Yesu ‘to kpahi’ ayɔhi abɔ hu ngɛ blɔ hyɛe wawɛɛ kaa a maa hi si kɛ ya neneene ngɛ paradeiso ɔ mi ngɛ zugba a nɔ. “A maa hi zugba a nɔ ngɛ kplɔkɔtɔ, kɛ tue mi jɔmi mi.”​—Yoh. 10:16; La 37:11.

16. Mɛni bua womi munyu lɛ ngɛ 1 Yohane 3:19, 20 ɔ?

¹⁶ Be komɛ ɔ, e peeɔ wɔ kaa wa nyɛ we nɛ waa pee fuu ngɛ sɔmɔmi ní tsumi ɔ mi, aloo eko ɔ, wa ma susu kaa Yehowa bua jɔɛ wa mɔde bɔmi ɔ he. Eko ɔ, wa ma susu kaa wa be nɔ́ ko mi. Se wa hɛ ko je nɔ kaa ‘Mawu kle pe wa tsui, nɛ e le nɔ́ tsuaa nɔ́ hulɔ.’ (Kane 1 Yohane 3:19, 20.) Ke wa susu kaa wa nyɛ we nɛ waa pee fuu ngɛ sɔmɔmi ní tsumi ɔ mi po ɔ, akɛnɛ wa ngɛ hemi kɛ yemi ngɛ Yehowa mi, nɛ wa suɔ lɛ he je ɔ, wa ma nyɛ ma ná hɛ kɛ nɔ fɔmi kaa e maa wo wɔ hiɔ.​—Mar. 12:41-44.

17. Mɛni ji jɔɔmi komɛ nɛ wa náa amlɔ nɛ ɔ?

¹⁷ E ngɛ mi kaa wa ngɛ nyagbe ligbi ɔmɛ a mi nɛ Satan je yaya nɛ ɔ ma nyagbe mohu lɛɛ, se Yehowa ngɛ e we bi jɔɔe. Yehowa bɔɔ mɔde kaa e ma ha waa kɛ wa nyɛmimɛ nɛ a ngɛ je kɛ wɛ ɔ tsuo nɛ ná nile babauu nɛ wa bua nɛ jɔ. (Yes. 54:13) Kaa bɔ nɛ Yesu wo si ɔ, amlɔ nɛ ɔ, Yehowa ha nɛ wa ba piɛɛ nyɛmimɛ nyumuhi kɛ yihi nɛ suɔmi ngɛ a kpɛti nɛ a ngɛ je kɛ wɛ ɔ a he. Enɛ ɔ ji jɔɔmi agbo. (Mar. 10:29, 30) Jehanɛ hu ɔ, nihi nɛ a bɔɔ mɔde wawɛɛ kaa a ma hla Mawu se blɔ ɔ náa tue mi jɔmi nitsɛnitsɛ, a tsui nɔɔ a mi, nɛ a ngɛ bua jɔmi wawɛɛ.​—Filip. 4:4-7.

18, 19. Kɛ Yehowa sɔmɔli naa jɔɔmihi nɛ a nine suɔ nɔ ɔ ha kɛɛ?

¹⁸ Yehowa jɔɔ e sɔmɔli nɛ a ngɛ je kɛ wɛ ɔ wawɛɛ nitsɛ, nɛ mɛ nitsɛmɛ a ma nyɛ maa ye enɛ ɔ he odase. Kaa nɔ hyɛmi nɔ́ ɔ, nyɛmiyo ko nɛ a tsɛɛ lɛ ke Bianca nɛ e je Germany ɔ de ke: “I naa Yehowa si wawɛɛ kaa e piɛɛɔ ye he, nɛ e yeɔ bua mi nɛ i nyɛɔ tsuɔ nyagbahi nɛ i kɛ kpeeɔ daa ligbi ɔ a he ní. Je ɔ mi hyi tɔ kɛ basabasa peemi kɛ haomi sɔuu. Se ke i hɛ kɛ su Yehowa he ɔ, i naa kaa i ngɛ slɔkee. Be fɛɛ be nɛ i kɛ nɔ́ ko maa sã afɔle ngɛ Yehowa sɔmɔmi he ɔ, e toɔ mi nane mi si lafahi abɔ.”

¹⁹ Jehanɛ hu ɔ, mo susu nyɛmiyo Paula nɛ ye jeha 70 nɛ e ngɛ Canada a he nɛ o hyɛ. E ngɛ se tso hiɔ ko nɛ a tsɛɛ ke spina bifida. Nyɛmiyo ɔ de ke: “Ke nɔ ko nyɛ we nɛ e nyɛɛ kɛ ya he tsitsaa a, lɔ ɔ tsɔɔ we kaa nɔ ɔ nyɛ we nɛ e tsu babauu ngɛ fiɛɛmi ní tsumi ɔ mi. I fiɛɛɔ haa nihi ngɛ tɛlifoo nɔ, nɛ i yeɔ nihi odase be mi nɛ i be fiɛɛmi tso mi. I ngɔɔ womi ko nɛ i ngma ngmamihi kɛ níhi nɛ i kase ngɛ wa womi ɔmɛ a mi ɔ kɛ wo mi ɔ kɛ yaa he tsuaa he nɛ i yaa, nɛ be tsuaa be nɛ ma hyɛ mi ɔ, e woɔ mi he wami. I tsɛɛ womi nɛ ɔ ke ‘Ye Womi Nɛ Woɔ Ye Bua.’ Ke waa kɛ wa juɛmi ma Yehowa si womi ɔmɛ a nɔ ɔ, wa maa na wa nyagba amɛ kaa a ji níhi nɛ maa hi si be bɔɔ ko kɛkɛ. Yehowa pee klaalo kaa si fɔfɔɛ tsuaa si fɔfɔɛ nɛ wa ma ya je mi ɔ, e maa ye bua wɔ.” Eko ɔ, e slo o si fɔfɔɛ ɔ ngɛ Bianca kɛ Paula a nɔ́ ɔ he. Se kɛ̃ ɔ, o ma nyɛ ma susu blɔhi a nɔ nɛ Yehowa gu kɛ jɔɔ o kɛ ni kpahi ɔ he. Hyɛ bɔ nɛ e hi ha kaa o ma susu bɔ nɛ Yehowa ngɛ mo jɔɔe amlɔ nɛ ɔ, kɛ bɔ nɛ e maa jɔɔ mo hwɔɔ se ha a he!

20. Ke wa ya nɔ nɛ waa kɛ wa tsui tsuo sɔmɔ Yehowa a, mɛni wa ma nyɛ maa hyɛ blɔ?

²⁰ O hɛ ko je nɔ kaa ke o je o tsui mi faa kɛ sɔle ha Mawu ɔ, o “nine maa su hiɔwo agbo ko nɔ.” O ma nyɛ ma ná nɔ mi mami kaa ke ‘o pee Mawu suɔmi nya ní ɔ, nɔ́ nɛ e wo he si ɔ, o nine maa su nɔ.’ (Heb. 10:35, 36) Lɔ ɔ he ɔ, nyɛ ha nɛ waa ya nɔ nɛ waa wo wa hemi kɛ yemi ɔ mi he wami, nɛ waa je wa tsui mi tsuo kɛ sɔmɔ Yehowa. Wa ma nyɛ maa pee jã, ejakaa wa le kaa Yehowa ji nɔ nɛ maa wo wɔ hiɔ ngɛ be nɛ sa mi.​—Kane Kolose Bi 3:23, 24.