Anɛ O le Lo?

Anɛ e da blɔ kaa a tsɛɛ jua yeli nɛ ba jua lohwehi ngɛ Yerusalem sɔlemi we ɔ ke “ojo fiali” lo?

NGƐ Mateo Sane Kpakpa a mi ɔ, “Yesu ya sɔlemi we ɔ, nɛ e ya fie nihi nɛ ngɛ ní juae, kɛ ni nɛmɛ nɛ ngɛ ni hee tsuo kɛ je lejɛ ɔ. E sake sika tsakeli ɔmɛ a we okplɔɔ ɔmɛ, kɛ nihi nɛ ngɛ lahuɛ juae ɔ a sɛ ɔmɛ ngɔ fia si. E de mɛ ke: ‘A ngma ngɛ ngmami ɔmɛ a mi ke, Mawu de ke, “A ma tsɛ ye we ɔ sɔlemi we.” Se nyɛɛ lɛɛ nyɛ ngɔ kɛ pee ojo fiali a laami he!’”​—Mat. 21:12, 13.

Yuda bi a yi nɔ sanehi tsɔɔ kaa jua yeli ɔmɛ sisiɔ a ní heli ɔmɛ, a jua níhi ha mɛ kɛ a he jua wawɛ. Kaa nɔ hyɛmi nɔ́ ɔ, Mishnah (Keritot 1:7) nɛ ji Yuda bi a yi nɔ sane ko tsɔɔ kaa ngɛ kaseli ɔmɛ a be ɔ mi ɔ, jua yeli ɔmɛ ha nɛ beleku lahuɛ enyɔ nɛ a kɛ sãa afɔle ɔ jua ya su sika hiɔ denario 25. Loko apaa yelɔ ko ma nyɛ ma ná jamɛ a sika a, ja e tsu ní ligbi 25. Ohiatsɛmɛ ji nihi nɛ a kɛ beleku lahuɛ sãa afɔle, se jua yeli ɔmɛ ha nɛ lohwe nɛ ɔmɛ hí hemi hu. (3 Mose 1:14; 5:7; 12:6-8) Mlaa tsɔɔlɔ ko nɛ a tsɛɛ lɛ ke Simeon ben Gamaliel ɔ mi mi fu wawɛɛ ngɛ si fɔfɔɛ nɛ ɔ he, enɛ ɔ he ɔ, e gbɔ afɔlehi abɔ nɛ e sa kaa Yuda bi nɛ a sã a nɔ. Amlɔ nɔuu ɔ, beleku lahuɛ he jua ba si kulaa.

Enɛ ɔ he ɔ, e da blɔ kaa Yesu tsɛɛ jua yeli nɛ a juaa ní ngɛ sɔlemi we ɔ ke “ojo fiali,” ejakaa a hɛ tsuɔ, nɛ a sisiɔ a ní heli ɔmɛ.