“Nɔ Nɛ Mi Mi Jɔ ɔ, A Gbaa Lɛ”

KƐ JE blema lokoo ɔ, a buɔ afɔle sami kaa anɔkuale jami fã ko nɛ he hia. Israel bi ɔmɛ ngɔɔ lohwehi kɛ sãa afɔle, nɛ a le Kristofohi hu kaa a sãa “yi jemi afɔle” wawɛɛ. Se kɛ̃ ɔ, afɔle sami kpa komɛ hu ngɛ nɛ saa Mawu hɛ mi wawɛɛ. (Heb. 13:15, 16) Afɔle sami nɛ ɔmɛ ngɔɔ bua jɔmi kɛ jɔɔmihi fuu kɛ baa kaa bɔ nɛ nɔ hyɛmi níhi nɛ nyɛɛ se ɔ tsɔɔ ɔ.

Hana nɛ e hi si blema nɛ e ji Mawu sɔmɔlɔ anɔkualetsɛ ɔ hla bi hluu se e nɛ eko. E sɔle nɛ e kã Yehowa kita kaa ke e ma ha lɛ bi nyumu ɔ, lɛɛ e kɛ lɛ ma ha lɛ “e wami ligbi tsuo.” (1 Sam. 1:10, 11) Be komɛ a se ɔ, Hana ba ngɔ hɔ nɛ e fɔ binyumu nɛ e wo lɛ biɛ ke Samuel. Benɛ a po Samuel nyɔ ɔ, Hana ngɔ lɛ kɛ ya kpe he bo tsu ɔ mi kaa bɔ nɛ e wo si ɔ pɛpɛɛpɛ. Yehowa jɔɔ Hana ngɛ he kɛ afɔle sami su nɛ e ngɛ ɔ he je. Yehowa ha lɛ bimɛ enuɔ kɛ piɛɛ he, nɛ e binyumu Samuel ba pee gbalɔ kɛ Baiblo ngmalɔ.—1 Sam. 2:21.

Mwɔnɛ ɔ, Kristofohi hu ngɛ he blɔ nɛ jɔɔ wa wami nɔ kɛ ha wa Bɔlɔ ɔ nɛ wa sɔmɔ lɛ kaa bɔ nɛ Hana kɛ Samuel pee ɔ. Yesu wo si kaa a maa jɔɔ wɔ ngɛ afɔle tsuaa afɔle nɛ wa maa sã konɛ wa nyɛ nɛ wa ja Yehowa a he.—Maak. 10:28-30.

Ngɛ kaseli ɔmɛ a be ɔ mi ɔ, Kristofo no ko hi si nɛ a tsɛɛ lɛ ke Dɔkas. A le lɛ kaa e ji nɔ ko nɛ “kpakpa peemi hyi lɛ tɔ, nɛ nihi a he peeɔ lɛ mɔbɔ nɛ e keɔ mɛ ní.” Se aywilɛho sane ji kaa “e ba nu hiɔ nɛ e gbo,” nɛ enɛ ɔ ha nɛ asafo ɔ ye aywilɛho wawɛɛ. Benɛ kaseli ɔmɛ ná le kaa Petro ngɛ jamɛ a ma a mi ɔ, a tsɔ kɛ ya tsɛ lɛ ke e ba amlɔ nɔuu. Moo hyɛ bɔ nɛ a bua maa jɔ ha be mi nɛ Petro ba tle Dɔkas si ɔ. Enɛ ɔ ji kekleekle be nɛ bɔfo ɔmɛ a kpɛti nɔ ko tle gbogboe si! (Níts. 9:36-41) Mawu hɛ ji Dɔkas afɔle sami ɔmɛ a nɔ. (Heb. 6:10) A ngma bɔ nɛ e keɔ nɔ nɔ́ faa ha a ngɛ Mawu Munyu ɔ mi, konɛ waa kase e nɔ hyɛmi nɔ́ kpakpa a.

Bɔfo Paulo hu ná nihi a he deka, nɛ e bu mɛ tue, nɛ e kɛ pee nɔ hyɛmi nɔ́ kpakpa kɛ ha wɔ. Paulo ngma sɛ womi kɛ ya ha e nyɛmimɛ Kristofohi nɛ a ngɛ Korinto ɔ. E de ke: “Ngɛ ye blɔ fa mi ɔ, ye bua maa jɔ wawɛɛ kaa ma ngɔ níhi kɛ ha nɛ́ a ngɔ imi hu kɛ ha kulaa ngɛ nyɛ he.” (2 Kor. 12:15) Paulo kase kaa ke nɔ ko kɛ e he sã afɔle ngɛ ni kpahi a he ɔ, e náa bua jɔmi, nɛ nɔ́ nɛ pe kulaa a, Yehowa jɔɔ lɛ, nɛ e bua jɔɔ e he.—Níts. 20:24, 35.

E ngɛ heii kaa, ke wa ngɔ wa be kɛ wa he wami kɛ fĩ Matsɛ Yemi ɔ se, nɛ wa ye bua wa nyɛmimɛ Kristofohi ɔ, Yehowa bua jɔɔ wawɛɛ. Se anɛ blɔ kpa komɛ ngɛ nɛ wa ma nyɛ maa gu nɔ kɛ fĩ Matsɛ Yemi fiɛɛmi ní tsumi ɔ se lo? Ee! Ngɛ suɔmi mi nɛ wa jeɔ nɛ waa kɛ wa he wami yeɔ bua a se ɔ, wa ma nyɛ maa je wa tsui mi kɛ ha yemi kɛ buami kɛ wo Mawu hɛ mi nyami. A kɛ yemi kɛ buami nɛ ɔ fĩɔ je kɛ wɛ fiɛɛmi ní tsumi ɔ se, nɛ a kɛ yeɔ bua ma se sane kpakpa fiɛɛli, kɛ ni kpahi nɛ a kɛ a he wo be tsuo sɔmɔmi ní tsumi ɔ mi ɔ hulɔ. Jehanɛ hu ɔ, a kɛ wa yemi kɛ buami ɔmɛ yeɔ bua ngɛ wa womi ɔmɛ kɛ video ɔmɛ a peemi kɛ a sisi tsɔɔmi mi, a kɛ yeɔ bua nihi nɛ oslaa ná mɛ, nɛ a kɛ eko maa Matsɛ Yemi Asahi hulɔ. Wa ma nyɛ ma ná nɔ mi mami kaa ‘nɔ nɛ e mi mi jɔ ɔ, a maa gbaa lɛ.’ Jehanɛ hu ɔ, ke wa ngɔ wa ní kpakpahi kɛ ha Yehowa a, lɔ ɔ woɔ e hɛ mi nyami.—Abɛ 3:9; 22:9.

Blɔhi a Nɔ Nɛ Ni Komɛ Guɔ Kɛ Yeɔ Bua Je Kɛ Wɛ Ní Tsumi ɔ

Kaa bɔ nɛ e ji ngɛ bɔfo Paulo be ɔ mi ɔ, mwɔnɛ ɔ, nihi fuu ‘jeɔ nɔ́ ko kɛ toɔ,’ aloo a jeɔ sika ko kɛ fɔɔ si nɛ a kɛ woɔ yemi kɛ buami daka nɛ a ngma “Je Kɛ Wɛ Ní Tsumi ɔ” ngɛ nɔ ɔ mi ngɛ a we asafo ɔ mi. (1 Kor. 16:2) Daa nyɔhiɔ ɔ, asafohi tsuo ngɔɔ yemi kɛ buami nɛ ɔmɛ kɛ yaa Yehowa Odasefohi a ní tsumi kɔni nɛ ngɛ ma nɛ a ngɛ mi ɔ mi. Mo hu o ma nyɛ maa ngɔ yemi kɛ buami kɛ mane Watch Tower Bible and Tract Society of Ghana, Attention Accounts Department, P. O. Box GP 760, Accra, Ghana. O kɛ ma nyɛ maa ya sika to hehi nɛ nyɛɛ se nɛ ɔ: Watch Tower, Barclays Bank, Accra High Street Branch, Account number 048/2746365 aloo Watch Tower, Ghana Commercial Bank, Accra High Street Branch, Account number 1011130008990. Aloo o kɛ ma nyɛ maa ya Yehowa Odasefohi asafo ɔ ní tsumi kɔni nɛ ngɛ ma nɛ o ngɛ mi ɔ. O ma nyɛ maa ngɔ yemi kɛ buami nɛ nyɛɛ se nɛ ɔmɛ hu kɛ ya Yehowa Odasefohi asafo ɔ ní tsumi kɔni nɛ ngɛ ma nɛ o ngɛ mi ɔ hulɔ:

NÍHI NƐ A KƐ KEƆ FAA

O ma nyɛ maa ngɔ electronic bank transfer kɛ ha yemi kɛ buami. Jehanɛ hu ɔ, o ma nyɛ maa ngɔ debit card, credit card, aloo mobile money transfer kɛ je yemi kɛ buami. Ngɛ ma komɛ a nɔ ɔ, nihi nyɛɔ nɛ a guɔ jw.org aloo wɛbsaiti ekpahi a nɔ kɛ haa yemi kɛ buami. Ke nɔ ko suɔ kaa e kɛ cheque maa mane adrɛs nɛ wa wo ta kɛ sɛ hlami ɔ, nɔ ɔ nɛ ngma ngɛ cheque ɔ nɔ kaa a ngɔ kɛ ha “Watch Tower.”
Ke nɔ ko ngɛ june, aloo weto ní ko nɛ he jua wa nɛ e suɔ kaa e kɛ ma ha a, e ma nyɛ maa pee jã. E sa nɛ nɔ ɔ nɛ ngma sɛ womi kɛ piɛɛ nɔ́ ɔ he konɛ e tsɔɔ kaa e kɛ nɔ́ ɔ ngɛ asafo ɔ kee kulaa.

NÍHI NƐ A KƐ HAA KƐ YA SIƆ BE KO

Nɔ ko ma nyɛ maa ngɔ sika kɛ ha Watch Tower Bible and Tract Society of Ghana konɛ a kɛ fĩ je kɛ wɛ ní tsumi ɔ se. Se ke pee se nɛ nɔ ɔ hia e sika a, a kɛ ma nyɛ ma ha lɛ. Ke o suɔ nɛ o le enɛ ɔ mi fitsofitso ɔ, o ma nyɛ ma tsɛ Account Department bi ɔmɛ. O ma nyɛ maa ngɔ tɛlifoo nɔma nɛ nyɛɛ se nɛ ɔ kɛ tsɛ mɛ (030) 2712456.
Moo ngma sɛ womi kɛ tsɔɔ kaa ke o hia o sika a, o maa kpale ba ngɔ.

BLƆ KPAHI A NƆ NƐ O MA NYƐ MAA GU KƐ YE BUA

O ma nyɛ maa gu blɔhi nɛ nyɛɛ se ɔ a nɔ kɛ ye bua kɛ fĩ je kɛ wɛ fiɛɛmi ní tsumi ɔ se:

Insiɔlansi: Nɔ ko ma nyɛ maa ngma Watch Tower Bible and Tract Society of Ghana a biɛ kɛ piɛɛ nihi nɛ e suɔ kaa ke e gbo ɔ, nɛ a wo insiɔlansi ɔ ha mɛ ɔ a biɛ he.

Sika Nɛ A Kɛ Toɔ Sika To He: Nɔ ko ma nyɛ maa to blɔ nya konɛ ke e gbo ɔ, a ngɔ e sika nɛ ngɛ sika to he, aloo sika nɛ a ha lɛ benɛ e ba ní tsumi mi he jɔɔmi ɔ kɛ ha Watch Tower Bible and Tract Society of Ghana. E maa pee enɛ ɔ ngɛ ma a mlaa nɛ kɔɔ sanehi kaa jã a he ɔ nya.

Sika Nɛ A Kɛ Wo Ní Tsumi Ko Mi Aloo A Pa Ha Ní Tsumi Ko: Eko ɔ, nɔ ko ngɔ sika kɛ wo ní tsumi ko mi konɛ e hi nɔ́ ko náe ngɛ nɔ, aloo e pa sika kɛ ha ní tsumi ko. Nɔ ɔ ma nyɛ maa ngɔ nɔ́ nɛ e maa hi náe ngɛ nɔ ɔ, aloo hekpa nɛ ní tsumi ɔ ma ha lɛ ɔ kɛ ha Watch Tower Bible and Tract Society of Ghana. Jehanɛ hu ɔ, nɔ ɔ ma nyɛ maa pee womi ngɛ nɔ kaa ke e gbo ɔ, a ngɔ ní nɛ ɔmɛ tsuo kɛ ha Watch Tower Bible and Tract Society of Ghana.

Tsuhi Kɛ Zugbahi: Ke nɔ ko ngɛ tsu ko aloo zugba ko nɛ a ma nyɛ maa jua a, e kɛ ma nyɛ maa ke Watch Tower Bible and Tract Society of Ghana faa. Aloo e ma nyɛ maa to blɔ nya konɛ ke e gbo ɔ, a ngɔ we nɛ e ngɛ mi ɔ kɛ ha Watch Tower Bible and Tract Society of Ghana. O kɛ asafo ɔ ní tsumi kɔni ɔ nɛ susu he kekle loko o pee jã.

Gbosi Ní Yemi Blɔ Nya Tomi Womi: Nɔ ko ma nyɛ maa pee womi kɛ tsɔɔ kaa ke e gbo ɔ, a ngɔ e gbosi ní aloo e sika kɛ ha Watch Tower Bible and Tract Society of Ghana.

Ke nɔ ko suɔ kaa e gu blɔhi nɛ wa wo a ta nɛ ɔ eko nɔ kɛ ha yemi kɛ buami ɔ, e sa nɛ e to he blɔ nya kɛ fɔ si.

Ke o suɔ kaa o maa gu blɔ nɛ ɔmɛ eko nɔ kɛ ha yemi kɛ buami, aloo kɛ ke Yehowa Odasefohi nɔ́ ko kɛ fĩ a je kɛ wɛ ní tsumi ɔ se ɔ, o ma nyɛ maa ya jw.org/ada, nɛ o ya “O Ma Nyɛ Maa Ha Nɔ́ Ko Kɛ Fĩ Wa Je Kɛ Wɛ Ní Tsumi ɔ Se.”