3 Blɔ Tsɔɔmi Nɛ Ma Ha Nɛ Waa Da Nyagbahi A Nya

HIƆ NƐ BE TSABA

Rose de ke: “Kɛ je be nɛ a fɔ mi ɔ, tɔ̃tɔ̃mi ko ba ye nɔmlɔ tso ɔ he nɛ haa nɛ i nuɔ yeyee he wawɛɛ daa ligbi. I nui ngɔɔmi ko he ngɛ je ɔ mi.” Nɔ́ nɛ gbaa e nya wawɛɛ ngɛ si himi mi be komɛ ji kaa, ke e ngɛ Baiblo ɔ kasee, aloo e ngɛ Mawu jami mi níhi a he susue ɔ, e juɛmi nyɛ we nɛ e da si. Se Yesu munyu nɛ e tu ngɛ Mateo 19:26 a ye bua lɛ. E de ke: “Ngɛ Mawu blɔ fa mi ɔ, nɔ́ fɛɛ nɔ́ maa hi peemi.” Rose ba yɔse kaa blɔ slɔɔtohi ngɛ nɛ e ma nyɛ maa gu nɔ kɛ kase ní. Akɛnɛ e nuɔ yeyee he wawɛɛ he je ɔ, be komɛ ɔ, e nyɛ we ní kanemi, lɔ ɔ he ɔ, e kɛ Baiblo kanemi nɛ a fiaa nɛ a buɔ tue, kɛ Baiblo kasemi womi kpahi nɛ a fiaa nɛ a buɔ tue ɔ tsuɔ ní.a E de ke “Ke pi blɔ nɔ́ tomi nɛ ɔmɛ a heɔ jinɛ i li bɔ nɛ huɛ bɔmi nɛ ngɛ i kɛ Mawu wa kpɛti ɔ ko pee ha.”

Ke Rose hao ngɛ níhi nɛ be ko nɛ be ɔ e nyɛɔ peeɔ, se amlɔ nɛ ɔ lɛɛ e nyɛ we peemi ɔ, e kaiɔ bua womi munyu nɛ ngɛ 2 Korinto Bi 8:12 nɛ de ke: “kekleekle ɔ, ke nɔ ko suɔ wawɛɛ nɛ e je nɔ́ nɛ e ngɛ ɔ mi kɛ ha se pi nɔ́ nɛ e be ɔ mi ɔ, lɔ ɔ lɛ saa nɔ hɛ mi saminya.” Munyu nɛ ɔmɛ kaiɔ Rose kaa Yehowa bua jɔ nɔ́ fɛɛ nɔ́ nɛ e ngɛ peeɔ he, ejakaa e daa e si fɔfɔɛ ɔ nɔ kɛ peeɔ bɔ nɛ e ma nyɛ.

AYWILƐHO YEMI

Delphine nɛ wa wo e ta kɛ sɛ hlami ɔ de ke: “Benɛ ye biyo nɛ ye jeha 18 ɔ gbo ɔ, ye tsui ywia nɛ i susu we kaa ma nyɛ ma tsa si himi ɔ nɔ hu. Nɔ́ ko be nɛ ma kɛ to nane mi.” Se e na bua womi nitsɛ kɛ je munyu nɛ ngɛ La 94:19 ɔ. La polɔ ɔ de Mawu ke: “Ke yi mi susumi tsɔ ha nɛ i pee basaa kikɛ nɛ ɔ, mo lɛ o haa mi bua jɔmi, nɛ ye nɔ gbagba tee ekohu.” E de ke, “I sɔle ha Yehowa nɛ i de lɛ ke e ye bua mi konɛ ma pee ní komɛ nɛ ma ha nɛ aywilɛho nɛ i ngɛ yee ɔ maa ba si.”

Enɛ ɔ ha nɛ e ngɔ he kɛ ha faa kaa e maa ye bua kɛ tsu ní tsumi kpakpa komɛ. Bɔɔbɔɔbɔɔ ɔ, e kɛ e he ba to jokuɛwi a kɔla tsohi a he, ke e ku poɔ e he baa se nami. Jã kɛ̃ nɛ e nu he kaa peepee ta e he mohu lɛɛ, se e kase kaa loloolo ɔ, e ma nyɛ maa ye bua ni kpahi. E de ke: “I ba yɔse kaa ke i da Baiblo sisi tomi mlaahi kɛ Baiblo nile nɔ nɛ i wo nihi nɛ i kɛ mɛ kaseɔ Baiblo ɔ a bua a, Yehowa guɔ lɔ ɔ nɔ kɛ jɔɔ imi hu ye bua.” E ngma nimli komɛ nɛ Baiblo ɔ wo a ta, nɛ mɛ hu a kɛ aywilɛho si himi nɛ nya wa kpe ɔ a biɛ kɛ fɔ si. E de ke: “Mɛ tsuo pɛpɛɛpɛ a ji nihi nɛ a kɛ sɔlemi fiɛɛ we.” E ba na kaa “Ke o kane we Baiblo ɔ, lɛɛ o be o nyagba a he tsaba náe.”

Baiblo ɔ nɛ Delphine kase ɔ ha nɛ e ba na kaa e sa nɛ e hyɛ hwɔɔ se blɔ se pi nɛ e kɛ e juɛmi maa ma níhi nɛ be ɔ a nɔ. Hɛ nɔ kami nɛ ngɛ Ní Tsumi 24:15 ɔ woɔ lɛ bua. E de ke: “A ma tle nihi nɛ a da kɛ nihi nɛ a dɛ tsuo si kɛ je gbeje.” Anɛ e ngɛ nɔ mi mami wawɛɛ kaa Yehowa ma tle e biyo ɔ si lo? Delphine nitsɛ ma ha heto: “I ngɛ ye biyo ɔ nɛ a tle lɛ si kɛ je gbeje ɔ hyɛe. E ngɛ kaa nɔ́ nɛ ye hiɔwe Tsɛ ɔ to be nɛ i kɛ ye biyo ɔ maa kpe ɔ momo. I ngɛ hyɛe nɛ i kɛ lɛ wa hii si ngɛ wa abɔɔ ɔ mi heii, kaa ligbi nɛ i fɔ lɛ nɛ i na lɛ nɛ ye tsui gbo e nɔ ɔ.”