Sane Bimihi Nɛ Je Ní Kaneli A Ngɔ

Ke nyɛmi ko kɛ nɔ kpa nɛ tsa pi e yo loo e huno hwɔ tsu mi ngɛ si fɔfɔɛ ko nɛ sɛ mi ɔ, anɛ e ji yayami nɛ e biɔ nɛ a hla sane yemi ajla toli nɛ a ye sane ɔ lo?

Ee, ke nikɔtɔmahi a kuu ɔ na odase nɛ tsɔɔ heii kaa a bɔ ajuama a, e sa nɛ a hla sane yemi ajla toli konɛ a ye sane ɔ. Lɛɛ ja odase ko be nɛ tsɔɔ kaa a tɔ̃, se si fɔfɔɛ nɛ a be nyɛe maa pee he nɔ́ ko lɛ ha nɛ a hwɔ tsu ɔ mi.​—1 Kor. 6:18.

Nikɔtɔmahi a kuu ɔ hlaa sane fɛɛ sane mi saminya konɛ a hyɛ kaa e he hia nɛ a hla sane yemi ajla toli nɛ a tsu sane ɔ he ní lo. Kaa nɔ hyɛmi nɔ́ ɔ: Anɛ a suɔ nɛ a sɛ gba si himi mi, nɛ lɔ ɔ he je ɔ, a pɔɔ nyɛɛmi lo? Anɛ nikɔtɔma amɛ wo mɛ ga ngɛ bɔ nɛ a peeɔ a ní ngɛ a sibi he ha a he hyɛ lo? Mɛni lɛ ha nɛ a hwɔ tsu kake mi ɔ? Anɛ a to a yi mi kaa a maa pee jã lo? Jinɛ a ko nyɛ pee si fɔfɔɛ ɔ he nɔ́ ko lo, aloo si fɔfɔɛ komɛ nɛ a be nyɛe maa pee he nɔ́ ko lɛ ha nɛ e ba jã? Eko ɔ, nɔ́ ko ba tlukaa nɛ lɔ ɔ he je ɔ, e sa nɛ mɛ ni enyɔ ɔmɛ a hwɔ tsu ɔ mi. (Fiɛlɔ 9:11) Jije a ti nɔ fɛɛ nɔ hwɔ ngɛ tsu ɔ mi? Akɛnɛ e slo si fɔfɔɛ fɛɛ si fɔfɔɛ he je ɔ, eko ɔ, ní kpahi ngɛ nɛ e sa nɛ nikɔtɔma amɛ nɛ a susu he.

Ke sane ɔ mi ba tɛ heii ɔ, nikɔtɔmahi a kuu ɔ maa hyɛ kaa e sa nɛ a hla sane yemi ajla toli aloo e sɛ nɛ a hla.