Bɔ Nɛ O Maa Pee Ha Konɛ O Baiblo Kasemi Nɛ Pee Bua Jɔmi

Yoshua ngɛ Mawu Mlaa a kanee; Yeriko gbogbo ɔmɛ ku se Rahab tsu ɔ lɛɛ e maa si; Yoshua wo e nine nɔ kɛ tsɔɔ hiɔwe nɛ e ngɛ sɔlee

YEHOWA hla Yoshua kaa e nyɛɛ Israel ma a hɛ mi kɛ ya Si Womi Zugba a nɔ. Ní tsumi nɛ ɔ he maa wa wawɛɛ ha lɛ ejakaa e kɛ haomihi fuu maa kpe. Se Yehowa ma nɔ mi ha lɛ kaa e maa ye manye, nɛ e wo lɛ he wami ke: ‘O he nɛ wa, nɛ o pee kã. Moo ye ye Mlaa amɛ a nɔ. Moo kane Mlaa womi ɔ nyɔ kɛ pia, nɛ o ye nɔ́ tsuaa nɔ́ nɛ a ngma ngɛ mi ɔ nɔ. Kɛkɛ ɔ, o maa ye manye, nɛ o maa pee o ní ngɛ nile mi.’—Yosh. 1:7, 8.

Ngɛ “behi nɛ a mi wa nɛ a nya dami yee” nɛ ɔmɛ a mi ɔ, wɔ hu waa kɛ nyagbahi fuu ngɛ kpee. (2 Tim. 3:1) Se ke wa ngɔ ga nɛ Yehowa wo Yoshua a kɛ tsu ní ɔ, wɔ hu wa ma nyɛ maa ye manye. E sa nɛ waa kane Baiblo ɔ daa, nɛ waa ngɔ sisi tomi mlaahi nɛ ngɛ mi ɔ kɛ tsu ní titli ke waa kɛ kahi ngɛ kpee.

Se wa ti nihi fuu maa tu anɔkuale kaa wa li ní kasemi, nɛ wa bua jɔɛ ní kasemi he tsɔ̃. Se kɛ̃ ɔ, akɛnɛ Baiblo kasemi he hia wawɛɛ he je ɔ, o ma nyɛ ma susu munyu nɛ ji “Ní Komɛ Nɛ Maa Ye Bua Mo” ɔ he konɛ o ní kasemi nɛ nu tso nɛ o bua nɛ jɔ ní kasemi ɔ he hulɔ.

La polɔ ɔ de ke: ‘Ha nɛ ma ye o mlaa a nɔ; ejakaa e haa mi bua jɔmi.’ (La 119:35) Ke o kase Mawu Munyu ɔ, o bua maa jɔ wawɛɛ. Ke o bɔ mɔde nɛ o hla Mawu Munyu ɔ mi ɔ, o nine maa su junehi fuu a nɔ.

E ngɛ mi kaa o si fɔfɔɛ ɔ be kaa Yoshua nɛ e nyɛɛ Israel ma a hɛ mi ɔ mohu lɛɛ, se o ngɛ mo nitsɛ o nyagbahi nɛ e sa kaa o tsu a he ní. Enɛ ɔ he ɔ, moo kase Mawu Munyu ɔ nɛ o ye nɔ kaa bɔ nɛ Yoshua pee ɔ. Ke o pee jã a, o maa mwɔ yi mi kpɔhi nɛ da, nɛ o ma ná he se.

NÍ KOMƐ NƐ MAA YE BUA MO

Moo sɔle loko o je ní kasemi sisi. Mawu Ope ɔ ha nɛ a ngma e susumihi ngɛ Baiblo ɔ mi konɛ o ná he se. Enɛ ɔ he ɔ, ke o ngɛ Baiblo ɔ kanee ɔ, moo sɔle konɛ Mawu nɛ ye bua mo nɛ o nu nɔ́ nɛ o ngɛ kanee ɔ sisi, nɛ́ e tlɔ o yi mi nɛ o kɛ tsu ní ngɛ o si himi mi.—Ezra 7:10.
Mo bi o he sanehi. Ke o ngɛ Baiblo ɔ loo Baiblo kasemi womihi kanee ɔ, o ma nyɛ ma bi o he ke: ‘Mɛni sane nɛ ɔ tsɔɔ mi ngɛ Yehowa he? Kɛ sane nɛ ɔ kɛ sɛ gbi nɛ Baiblo ɔ hɛɛ ɔ ngɛ tsakpa ha kɛɛ? Kɛ ma nyɛ ma ngɔ munyu nɛ ɔmɛ kɛ ye bua nihi ha kɛɛ?’
Mo pue o yi mi tɛ ngɛ nɔ́ nɛ o ngɛ kasee ɔ he. Mo kpa ní ɔ kanemi nɛ o susu níhi a he. Mo bi o he ke: ‘Kɛ sane ɔ pee mi ha kɛɛ? Mɛni he je nɛ e pee mi jã a? Kɛ e kɔɔ si fɔfɔɛ komɛ nɛ i kɛ kpe, si fɔfɔɛ nɛ i ngɛ mi amlɔ nɛ ɔ, aloo si fɔfɔɛhi nɛ ma nyɛ ma kɛ kpe hwɔɔ se ɔ he ha kɛɛ? Mɛni blɔ nɔ nɛ ma nyɛ ma ngɔ Baiblo sisi tomi mlaa nɛ ɔmɛ kɛ ga womi nɛ ɔ kɛ tsu ní ngɛ ye si himi mi?’ (Hiob 23:5; La 49:3) Moo hyɛ kaa o ma nyɛ maa tsɔɔ nɔ́ he je nɛ Yehowa ke wa ko pee ní komɛ ɔ lo. O ma nyɛ ma susu nɔ́ nɛ o kane ɔ he ngɛ blɔ kpa nɔ hulɔ. Mo bi o he ke, ‘kaa nɔ nɛ i kane e he sane ɔ pee we e ní jã a, jinɛ mɛni ko ba?’—5 Mose 32:28, 29.
Moo po níhi a he foni ngɛ o juɛmi mi ke o ngɛ ní kanee. Kaa nɔ hyɛmi nɔ́ ɔ, moo po benɛ Yosɛf nyɛminyumu ɔmɛ ngɛ lɛ juae kɛ ha Ishmael bi ɔmɛ he foni ngɛ o juɛmi mi nɛ o hyɛ. (1 Mose 37:18-28) Moo ngɔ lɛ kaa o piɛɛ a he ngɛ lejɛ ɔ. Mɛni o ngɛ nae? Mɛni o ngɛ nue? Mɛni he fu o ngɛ nue? Mɛni a ngɛ susue, nɛ kɛ a ngɛ a ní pee ha kɛɛ? Ke o po níhi a he foni ngɛ o juɛmi mi kaa kikɛ nɛ ɔ, o maa nu níhi fuu a sisi nɛ o bua maa jɔ ní kasemi ɔ he.
Ngɔɔ níhi a mi hlami níhi nɛ asafo ɔ pee kɛ ha wɔ ɔ kɛ tsu ní konɛ o kase níhi fuu. Ke ní nɛ ɔmɛ ekomɛ ngɛ o je gbi mi ɔ, moo kase bɔ nɛ a kɛ tsuɔ ní ha. E ko pee mo zo kaa o ma bi ni kpahi nɛ a ye bua mo konɛ o le bɔ nɛ o kɛ níhi a mi hlami ní nɛ ɔmɛ ma tsu ní ha. Kaa nɔ hyɛmi nɔ́ ɔ, Watch Tower Publications Index ɔ loo Research Guide for Jehovah’s Witnesses ɔ maa ye bua mo konɛ o na níhi nɛ a ngma ngɛ munyu komɛ a he kɛ bɔ nɛ a tsɔɔ ngmami komɛ a sisi ha. O ma nyɛ maa hyɛ mi tsɔɔmi munyuhi nɛ a ngɛ New World Translation of the Holy Scriptures ɔ mi ke ji kaa e ngɛ gbi ko nɛ o nyɛ kaneɔ ɔ mi. Mi tsɔɔmi munyu nɛ ɔmɛ haa nɛ wa nuɔ ní komɛ nɛ a tu a he munyu ngɛ Baiblo ɔ mi ɔ sisi. Ekomɛ ji zugbahi, yi nɔ sanehi, susumi níhi kɛ ní kpahi.
Mo kadi oti ɔmɛ ngɛ ní kasemi ɔ mi. Ke o pee jã a, o hɛ be níhi nɛ o kase ɔ nɔ jee. Nɔ́ nɛ hi pe kulaa ji kaa o ma de ni kpahi níhi nɛ o kase ɔ. Anɛ oti ko ngɛ mi nɛ o kɛ ma nyɛ ma tsu ní ngɛ fiɛɛmi mi lo? Enɛ ɔ ma ha nɛ o ma kai níhi nɛ o kase ɔ, nɛ ni kpahi hu ma ná he se.