Ke O Susu Kaa O Kã Nya Tã

Adriana nɛ e je Brazil ɔ de ke: “I pɔɔ he numi kaa ye kã nya tã. Enɛ ɔ ha nɛ i susu kaa ke i gbe ye he ɔ, e maa hi.”

ANƐ MO hu o kɛ haomi ko ngɛ kpee nɛ lɔ ɔ ha o susu kaa afani nɛ o gbo lo? Ke jã a, lɛɛ atsinyɛ jemi ko be he kaa o maa nu Adriana sisi. E pee ɔ yeyeeye nɛ e haoɔ wawɛɛ, enɛ ɔ ha nɛ e ná we bua jɔmi, nɛ e hɛ nɔ kami tsuo ta. E kɛ we nɛ Adriana ba ná juɛmi mi nyagba.

Mo susu nyumu ko nɛ e ngɛ Japan nɛ a tsɛɛ lɛ Kaoru he nɛ o hyɛ. E ngɛ e fɔli nɛ a bwɔ nɛ a be nɔmlɔ tso mi he wami ɔ a nɔ hyɛe. E de ke: “Behi ngɛ nɛ i li bɔ nɛ ma pee ha akɛnɛ i kɛ haomi kpeɔ ngɛ ye ní tsumi he ɔ he je. E suu be nɛ i yi ní ejakaa nɔ́ ko jlo we mi, nɛ i nyɛ we mahe hwɔmi hulɔ. I ba ná susumi kaa ke i gbo mohu ɔ, ye nyagba amɛ a se maa po.”

Nyumu ko nɛ a tsɛɛ lɛ Ojebode nɛ e je Nigeria a de ke: “Daa nɛ ɔ, i haoɔ nɛ lɔ ɔ haa nɛ i foɔ ya. Enɛ ɔ he je ɔ, i hla blɔ nɔ nɛ ma gu konɛ ma gbe ye he.” Bua jɔmi sane ji kaa Ojebode, Kaoru, kɛ Adriana gbi a he. Se nimli ayɔhi abɔ gbeɔ a he daa jeha.

HE NƐ O MA NÁ YEMI KƐ BUAMI KƐ JE

Nyumuhi ji nihi babauu nɛ a gbeɔ a he, akɛnɛ e peeɔ mɛ zo kaa a ma bi yemi kɛ buami ɔ he je. Yesu de ke hiɔtsɛmɛ hia tsopatsɛ. (Luka 5:31) Enɛ ɔ he ɔ, ke o haoɔ nɛ lɔ ɔ haa nɛ o susuɔ kaa o maa gbe o he ɔ, e ko pee mo zo kaa o ma bi nɛ a ye bua mo. Nihi babauu nɛ a ná juɛmi mi nyagba nɛ ɔ na kaa dɔkitahi a tsopa peemi ma nyɛ maa ye bua mɛ konɛ a nyɛ nɛ a da nya. Ojebode, Kaoru, kɛ Adriana tsuo ná dɔkitahi a yemi kɛ buami ɔ he se nɛ lɔ ɔ ha nɛ amlɔ nɛ ɔ, a nyɛ nɛ a da a haomi ɔmɛ a nya.

Dɔkitahi ma nyɛ maa ngɔ tsopa peemi aloo a ma nyɛ ma ha ga womihi nɛ ma tsa juɛmi mi nyagba nɛ ɔ. Jã kɛ̃ nɛ a hia weku li kɛ huɛmɛ nɛ a nuɔ nɔ́ sisi ɔ konɛ a ye kɛ bua mɛ. Yehowa Mawu nɛ e haa wɔ yemi kɛ buami kɛ jeɔ e Munyu nɛ ji Baiblo ɔ mi ɔ ji huɛ nɛ pe kulaa nɛ wa ma nyɛ ma ná.

ANƐ NYAGBA NƐ ƆMƐ A SE MAA PO LIGBI KO LO?

Dɔkitahi ma nyɛ maa ngɔ be kɛkɛɛ kɛ hi tsopa pee ha nihi nɛ a ngɛ juɛmi mi nyagba, nɛ e ma bi hu nɛ ni nɛ ɔmɛ nɛ a tsake bɔ nɛ a peeɔ ní komɛ ha ngɛ a si himi mi. Ke o ngɛ juɛmi mi nyagba po ɔ, o ma nyɛ maa hyɛ hwɔɔ se si himi nɛ ngɛ bua jɔmi blɔ kaa bɔ nɛ Ojebode pee ɔ. E de ke, “I ngɛ gbami nɛ ngɛ Yesaya 33:24 ɔ mi bami blɔ hyɛe, nɛ e de kaa be ma nɛ nɔ ko be dee ngɛ zugba nɛ ɔ nɔ ke ‘I be he wami.’” Kaa bɔ nɛ Ojebode pee ɔ, mo ná bua womi kɛ je si nɛ Mawu wo kaa “zugba ehe,” maa ba nɛ “nɔ́ yeyee” ko be si hie hu ɔ mi. (Kpo Jemi 21:1, 4) Si womi nɛ ɔ tsɔɔ kaa juɛmi mi nyagba kɛ aywilɛho yemi be si hie hu. O haomi ɔmɛ tsuo a se maa po kɛ maa ya neneene. O be o nyagba amɛ ‘kaie hu; o hɛ maa je a nɔ pɛsɛpɛsɛ.’—Yesaya 65:17.

Ngmami Nɛ Ɔmɛ Ma Nyɛ Maa Ye Bua

Mawu nuɔ mo sisi.

‘Imi ji Yehowa, o Mawu ɔ nɛ; imi lɛ i ngɛ mo he wami woe ɔ nɛ, i ngɛ mo dee ke, “koo ye gbeye! Ma piɛ o he!”’—Yesaya 41:13.

Yehowa nuɔ wɔ sisi pe bɔ nɛ nihi nuɔ wɔ sisi ɔ, nɛ e suɔ kaa e maa ye bua wɔ.

Mo puɛ o yi mi tɛ ngɛ Mawu Munyu ɔ he.

Eliya “ná nɛ e gbo. E sɔle ke: ‘Yehowa, moo gbe mi jehanɛ.’”—1 Matsɛmɛ 19:4.

Ojebode de ke: “Mawu Munyu ɔ nɛ i pueɔ ye yi mi tɛ ngɛ he ɔ ye bua mi, nɛ i ba na kaa gbalɔ Eliya nu he kaa bɔ nɛ i nu he ɔ.”

Moo kase ní kɛ je Baiblo ɔ mi nɔ́ hyɛmi ní ɔmɛ a mi.

“I [Yesu] kpa pɛɛ wawɛɛ ha mo [Petro] konɛ o hemi kɛ yemi ɔ nɛ e ko ta.”—Luka 22:32.

Benɛ bɔfo Petro kua Yesu si etɛ ɔ, e hao wawɛɛ nɛ e fo ya. Kaoru de ke: “Petro níhi a si kpami ɔ ye bua mi nɛ i na kaa Yehowa kɛ Yesu nu bɔ nɛ Petro hao ha a sisi wawɛɛ. Enɛ ɔ wo mi he wami.”

O be o nyagba amɛ ‘kaie hu; o hɛ maa je a nɔ pɛsɛpɛsɛ.’—Yesaya 65:17