Kɛ O Ma Plɛ Kɛ Ná Si Himi Kpakpa Ha Kɛɛ?

MWƆNƐ Ɔ, bɔ nɛ adesahi a si himi ngɛ ha a je ekpa kulaa ngɛ Mawu yi mi tomi kɛ ha mɛ ɔ he. Mawu yi mi tomi ji kaa adesahi nɛ a fĩɔ e nɔ yemi se, nɛ́ a kɛ e blɔ tsɔɔmi tsuɔ ní, nɛ́ a jeɔ e su kpakpa amɛ kpo ɔ nɛ a hyi zugba a nɔ. Mawu suɔ nɛ a ná bua jɔmi ngɛ si himi mi, a to weku sisi, a kase ní hehi, nɛ a pee zugba a tsuo paradeiso.

MAWU WO SI KAA E MA TSAKE SI HIMI NGƐ ZUGBA A NƆ KONƐ E YI MI TOMI NƐ BA MI

• “E haa ta se poɔ ngɛ je ɔ mi tsuo.”—La 46:9.

• “Be nɛ a to ɔ su . . . konɛ a kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.”—Kpo Jemi 11:18.

• “Nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’”—Yesaya 33:24.

• “A ma ná mɛ nitsɛmɛ a nine nya ní tsumi mi ní maa ye, nɛ a bua maa jɔ a he saminya.”—Yesaya 65:22.

Kɛ gbami nɛ ɔmɛ ma plɛ kɛ ba mi ha kɛɛ? Mawu hla e Bi Yesu kaa Matsɛ konɛ e hi hiɔwe kɛ ye zugba a nɔ. Baiblo ɔ tsɛɛ nɔ yemi nɛ ɔ ke Mawu Matsɛ Yemi ɔ. (Daniel 2:44) Baiblo ɔ tu Yesu he munyu ke: ‘Mawu maa ngɔ e matsɛ sɛ ɔ kɛ ha lɛ, nɛ e maa ye Matsɛ.’​—Luka 1:32, 33.

Benɛ Yesu ngɛ zugba a nɔ ɔ, e pee nyakpɛ níhi fuu kɛ tsɔɔ kaa ke e bɔni Nɔ Yemi ɔ, adesahi ma ná si himi kpakpa.

YESU PEE NÍ KPAKPAHI NƐ E MAA PEE KƐ HA ADESAHI NƐ A PEEƆ TUE BUMI Ɔ HE NƆ HYƐMI NƆ́

• E tsa hiɔ slɔɔtohi kɛ tsɔɔ kaa hwɔɔ se ɔ, e ma je adesahi a gbɔjɔmihi tsuo kɛ je.​—Mateo 9:35.

• E jɔɔ wo ɔ he kɛ tsɔɔ bɔ nɛ e ma nyɛ maa po adesahi a he piɛ kɛ je adebɔ he wamihi a he.​—Maako 4:36-39.

• E ha nimli akpehi abɔ niye ní kɛ tsɔɔ kaa hwɔɔ se ɔ, e ma ha adesahi a hiami níhi.​—Maako 6:41-44.

• E ha nɛ nyu plɛ pee wai kɛ tsɔɔ kaa hwɔɔ se ɔ, e ma ha nɛ adesahi a bua nɛ jɔ ngɛ si himi mi.​—Yohane 2:7-11.

Mɛni o ma nyɛ maa pee konɛ o nine nɛ su si himi kpakpa nɛ Mawu to kɛ ha nihi nɛ a suɔ lɛ ɔ nɔ? “Blɔ” ko ngɛ nɛ e sa nɛ o nyɛɛ nɔ. Baiblo ɔ kale blɔ nɛ ɔ kaa e ji ‘blɔ nɛ e nɔ nyɛɛmi yee, nɛ e kɛ nɔ yaa wami mi, nɛ nihi bɔɔ pɛ lɛ a naa jamɛ a blɔ ɔ.’​—Mateo 7:14.

MO HLA BLƆ NƐ KƐ NƆ YAA WAMI NITSƐNITSƐ MI Ɔ

Mɛni ji blɔ nɛ kɛ nɔ yaa wami mi ɔ? Mawu de ke: ‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ, nɛ ma tsɔɔ nyɛ bɔ nɛ nyɛɛ ba nyɛ je mi ha, konɛ e hi ha nyɛ nitsɛmɛ.’ (Yesaya 48:17) Ke waa kɛ ga womi nɛ ɔ tsu ní ɔ, wa si himi maa pee kpakpa.

Yesu de ke: “Imi ji blɔ ɔ kɛ anɔkuale ɔ kɛ wami ɔ nɛ.” (Yohane 14:6) Jã wa ná hemi kɛ yemi ngɛ anɔkuale ɔ nɛ Yesu tsɔɔ ɔ mi, nɛ wa kase e nɔ hyɛmi nɔ́ ɔ loko wa ma nyɛ maa hɛ wɔ kɛ su Mawu he, nɛ́ e hi ha wɔ.

Kɛ o ma plɛ kɛ na blɔ nɛ kɛ nɔ yaa wami mi ɔ ha kɛɛ? Jamihi babauu ngɛ, se Yesu bɔ wɔ kɔkɔ ke: “Pi nɔ fɛɛ nɔ nɛ deɔ mi ke, ‘Nyɔmtsɛ, Nyɔmtsɛ’ ɔ, nɛ e maa sɛ hiɔwe Matsɛ Yemi ɔ mi, mohu ɔ, nɔ nɛ e peeɔ ye Tsɛ nɛ e ngɛ hiɔwe ɔ suɔmi nya ní ɔ pɛ lɛ e maa sɛ mi.” (Mateo 7:21) Jehanɛ hu ɔ, e de ke: “Yiblii nɛ a woɔ ɔ nɛ nyɛɛ kɛ ma yɔse mɛ.” (Mateo 7:16) Baiblo ɔ ma nyɛ maa ye bua mo konɛ o le slɔɔto nɛ ngɛ anɔkuale jami kɛ lakpa jami a kpɛti.​—Yohane 17:17.

Kɛ o ma plɛ kɛ nyɛɛ blɔ nɛ kɛ nɔ yaa wami mi ɔ nɔ ha kɛɛ? E biɔ nɛ o kase wami Halɔ ɔ he ní: Lɛ ji mɛnɔ? Kɛ a tsɛɛ lɛ kɛɛ? Kɛ e ngɛ ha kɛɛ? Mɛni e ngɛ pee? Mɛni e suɔ nɛ waa pee?a

Mawu suɔ nɛ adesahi nɛ a tsu ní, a ye ní, a fiɛ, nɛ́ a to weku sisi. Se pi lɔ ɔ pɛ, wa ma nyɛ maa le wa Bɔlɔ ɔ, nɛ waa pee e huɛmɛ. Wa ma nyɛ maa pee e suɔmi nya ní kɛ tsɔɔ kaa wa suɔ lɛ. Yesu de ke: “Enɛ ɔ ji neneene wami ɔ nɛ, kaa a maa hi mo anɔkuale Mawu kake pɛ ɔ lee.”​—Yohane 17:3.

KEKLEEKLE NƆ́ NƐ O MAA PEE

Ke wa le nɔ́ nɛ Mawu ngɛ hlae nɛ waa pee ɔ, e ma bi nɛ waa pee tsakemihi. Jã peemi be gbɔjɔɔ. Se lɔ ɔ tsɔɔ kaa wa si himi maa pee kpakpa pe sa a ke wa bɔni wami blɔ ɔ nɔ nyɛɛmi. Ke o ngɛ hlae nɛ o le babauu kɛ kɔ Mawu he ɔ, Yehowa Odasefohi kɛ nihi kaseɔ Baiblo ɔ ngɛ be kɛ he nɛ maa da mɛ, nɛ a he we nɔ́ ko. O ma nyɛ ma hla wa se blɔ ngɛ wa wɛbsaiti nɛ ji www.jw.org/ada.