“Nyɛ Ya Pee Nihi . . . Ye Kaseli”

1-2. (a) Ngɛ Yesu fami nɛ ngɛ Mateo 28:18-20 ɔ nya a, mɛni ji Kristofohi asafo ɔ a ní tsumi titli? (b) Mɛni sane bimihi a he wa ma susu ngɛ ní kasemi nɛ ɔ mi?

BENƐ a tle Yesu si ɔ, e to blɔ nya konɛ e bɔfo ɔmɛ kɛ lɛ nɛ kpe ngɛ yoku ko nɔ. Benɛ bɔfo ɔmɛ ya bua a he nya ngɛ lejɛ ɔ nɛ a ngɛ mlɛe ɔ, hyɛ bɔ nɛ a kɛ bua jɔmi maa hi nɔ́ nɛ Yesu ma de mɛ ɔ blɔ hyɛe ha! (Mat. 28:16) Eko ɔ, jamɛ a be ɔ mi nɛ Yesu “je e he kpo ngɔ tsɔɔ nyɛmimɛ nɛ a he hiɛ pe 500 ngɛ be kake mi” ɔ nɛ. (1 Kor. 15:6) Mɛni he je nɛ Yesu de e kaseli ɔmɛ kaa a kɛ lɛ nɛ ba kpe ngɛ lejɛ ɔ? Ejakaa e maa ngɔ ní tsumi ko nɛ ngɛ bua jɔmi kɛ wo a dɛ. Yesu fã mɛ ke: “Enɛ ɔ he ɔ, nyɛɛ ya nɛ nyɛ ya pee nihi nɛ a ngɛ je ma amɛ tsuo a mi ɔ ye kaseli.”​—Kane Mateo 28:18-20.

² Kaseli nɛ a nu Yesu munyu nɛ ɔ ba piɛɛ Kristofohi asafo nɛ a to sisi ngɛ jamɛ a be ɔ mi ɔ he. Ní tsumi titli nɛ a kɛ wo asafo ɔ dɛ ji kaa a ye bua nihi fuu konɛ a ba pee Kristo kaseli.b Mwɔnɛ ɔ, anɔkuale Kristofohi asafohi akpe nyɔngmahi abɔ nɛ a ngɛ je kɛ wɛ, nɛ blɔ nya ní tsumi nɛ ɔ nɔuu lɛ fɔɔ si ngɛ a nɔ. Wa ma susu sane bimi eywiɛ nɛ nyɛɛ se ɔmɛ a he ngɛ ní kasemi nɛ ɔ mi: Mɛni he je nɛ kaselɔ peemi ní tsumi ɔ he hia wawɛɛ ɔ? Mɛni nɛ ní tsumi nɛ ɔ biɔ nɛ waa pee? Anɛ e sa nɛ Kristofohi tsuo kɛ a he nɛ wo kaselɔ peemi ní tsumi ɔ mi lo? Nɛ mɛni he je nɛ tsui si tomi he hia ngɛ ní tsumi nɛ ɔ mi ɔ?

MƐNI HE JE NƐ KASELƆ PEEMI NÍ TSUMI Ɔ HE HIA WAWƐƐ Ɔ?

3. Ngɛ Yohane 14:6 kɛ 17:3 ɔ nya a, mɛni he je nɛ kaselɔ peemi ní tsumi ɔ he hia wawɛɛ ɔ?

³ Mɛni he je nɛ kaselɔ peemi ní tsumi ɔ he hia wawɛɛ ɔ? Ejakaa Kristo kaseli pɛ nɛ a ma nyɛ maa pee Mawu huɛmɛ. Jehanɛ hu ɔ, nihi nɛ a nyɛɛɔ Kristo se ɔ náa si himi kpakpa amlɔ nɛ ɔ, nɛ a ngɛ hɛ kɛ nɔ fɔmi kaa hwɔɔ se ɔ, a maa hi si kɛ ya neneene. (Kane Yohane 14:6; 17:3.) Ngɛ anɔkuale mi ɔ, ní tsumi nɛ Yesu kɛ wo wa dɛ ɔ he hia wawɛɛ, se pi wɔ pɛ nɛ wa ngɛ ní ɔ tsue. Bɔfo Paulo ngma ngɛ e kɛ nihi nɛ a piɛɛ e he kɛ tsu ní tsumi nɛ ɔ a he ke: “Wa ji nihi nɛ a piɛɛ Mawu he kɛ ngɛ ní tsue.” (1 Kor. 3:9) Ní tsumi nɛ ɔ nɛ́ Yehowa kɛ Kristo kɛ ha wɔ nimli adesahi nɛ wa yi mluku ɔ ji he blɔ ngua nitsɛ nɛ wa ná!

4. Mɛni wa ma nyɛ maa kase ngɛ Ivan kɛ Matilde a níhi a si kpami ɔ mi?

⁴ Kaselɔ peemi ní tsumi ɔ ma nyɛ ma ha nɛ wa ná bua jɔmi wawɛɛ. Mo susu Nyɛminyumu Ivan kɛ e yo Matilde nɛ a ngɛ Colombia a níhi a si kpami ɔ he nɛ o hyɛ. Benɛ a fiɛɛ ha niheyo ko nɛ a tsɛɛ lɛ ke Davier a, niheyo ɔ de mɛ ke: “I suɔ nɛ ma pee tsakemihi ngɛ ye si himi mi, se i nyɛ we.” Jinɛ Davier fiaa kɔ̃, e kɛ tsopa yaya tsuɔ ní, e deɔ dã, nɛ e kɛ e plã ko nɛ a tsɛɛ lɛ ke Erika lɛ ngɛ. Ivan de ke: “Waa kɛ lɛ bɔni Baiblo ɔ kasemi ngɛ e kɔpe ɔ mi. Se akɛnɛ lejɛ ɔ kɛ he je ɔ, wa hiɔ baisikle nɔ ngmlɛfiahi abɔ kɛ yaa, nɛ mɔsɔ hu ngɛ blɔ ɔ nɔ. Benɛ Erika na kaa Davier je mi bami bɔni tsakemi ɔ, lɛ hu e ba piɛɛ Davier he kɛ kase Baiblo ɔ.” Bɔɔbɔɔbɔɔ ɔ, Davier kpa tsopa yaya kɛ ní tsumi, e kpa dã numi, nɛ e fiɛ kɔ̃ hu. Jehanɛ hu ɔ, e ya tsu Erika he ní. Matilde de ke: “Benɛ a baptisi Davier kɛ Erika ngɛ jeha 2016 mi ɔ, wa kai nɔ́ nɛ Davier deɔ be ko nɛ be ɔ. E deɔ ke, ‘I suɔ nɛ ma pee tsakemihi ngɛ ye si himi mi, se i nyɛ we.’ Bua jɔmi sɔuu ha nɛ wa fo ya.” Atsinyɛ jemi ko be he kaa ke wa ye bua nihi nɛ a ba pee Kristo kaseli ɔ, wa náa bua jɔmi wawɛɛ.

MƐNI KASELƆ PEEMI NÍ TSUMI Ɔ BIƆ NƐ WAA PEE?

5. Mɛni ji kekleekle nɔ́ nɛ e sa nɛ waa pee loko wa ma nyɛ maa pee nihi kaseli?

⁵ Loko wa ma nyɛ maa ye bua nihi nɛ a ba pee kaseli ɔ, kekleekle ɔ, ja wa “hla” nihi nɛ a hɛɛ tsui kpakpa a. (Mat. 10:11) Ke wa yeɔ nihi tsuo nɛ waa kɛ mɛ kpeɔ ɔ odase ɔ, lɔ ɔ tsɔɔ kaa Yehowa Odasefohi ji wɔ niinɛ. Jehanɛ hu ɔ, ke wa ye fami nɛ Kristo fã wɔ kaa waa fiɛɛ ɔ nɔ ɔ, lɔ ɔ tsɔɔ kaa anɔkuale Kristofohi ji wɔ.

6. Mɛni ma nyɛ maa ye bua wɔ konɛ nihi nɛ a bu sɛ gbi ɔ tue?

⁶ Ni komɛ suɔ wawɛɛ kaa a maa kase Baiblo ɔ mi anɔkuale ɔmɛ, se nihi babauu hu ngɛ nɛ sisije ɔ, e ngɛ kaa nɔ́ nɛ a bua jɔɛ sɛ gbi ɔ he. Enɛ ɔ he ɔ, eko ɔ, e ma bi nɛ waa pee níhi nɛ ma ha nɛ a bua maa jɔ Baiblo ɔ kasemi he. Loko nihi maa bu sɛ gbi nɛ wa ngɛ fiɛɛe ɔ tue ɔ, ja wa dla wa he saminya. Moo hla munyuhi nɛ ni ɔmɛ a bua maa jɔ he. Lɔ ɔ se ɔ, mo susu bɔ nɛ o ma plɛ kɛ je ní sɛɛmi ɔ sisi ha a he.

7. Kɛ o kɛ nɔ ko maa je ní sɛɛmi sisi ha kɛɛ, nɛ mɛni he je nɛ o susu kaa e he hia nɛ waa bu nihi tue saminya nɛ wa je bumi kpo kɛ ha mɛ ɔ?

⁷ Kaa nɔ hyɛmi nɔ́ ɔ, ke o na wetsɛ ko ɔ, o ma nyɛ ma bi lɛ ke: “I kpa mo pɛɛ, i suɔ nɛ ma le o juɛmi ngɛ sane ko he. Nihi nɛ a ngɛ je ɔ mi tsuo kɛ nyagbahi nɛ waa kɛ kpeɔ mwɔnɛ ɔ ngɛ kpee. Anɛ o susu kaa wa hia nɔ yemi ko nɛ e ma nyɛ ma je je ɔ mi nyagba amɛ tsuo kɛ je lo?” Lɔ ɔ se ɔ, o kɛ lɛ ma nyɛ ma susu Daniel 2:44 ɔ he. Aloo eko ɔ, o ma nyɛ ma bi wetsɛ ko ke: “Mɛni ji blɔ kpakpa nɛ fɔli ma nyɛ maa gu nɔ kɛ tsɔse a bimɛ konɛ a ba a je mi saminya? Kɛ o susu kɛɛ?” Lɔ ɔ se ɔ, o kɛ lɛ nɛ susu 5 Mose 6:6, 7 ɔ he. Ke o hla munyu pɔtɛɛ ko nɛ o kɛ nihi maa sɛɛ he ní ɔ, mo susu o tue buli ɔmɛ a he. Mo susu bɔ nɛ a ma ná Baiblo ɔ mi anɔkuale ɔ nɛ a maa kase ɔ he se ha a he. Ke o kɛ mɛ ngɛ ní sɛɛe ɔ, e he hia nɛ o bu mɛ tue saminya, nɛ́ o je bumi kpo kɛ tsɔɔ mɛ ke a tsɔɔ a juɛmi. Lɔ ɔ ma ha nɛ o maa nu o tue buli ɔmɛ sisi saminya, nɛ a maa suɔ kaa a maa bu mo tue.

8. Mɛni he je nɛ e sa nɛ waa ya nɔ nɛ waa kpale ya slaa nihi ɔ?

⁸ Loko nɔ ko maa kplɛɛ nɛ o kɛ lɛ nɛ kase Baiblo ɔ, eko ɔ, e he maa hia nɛ o ná be kɛ ha lɛ nɛ o bɔ mɔde nɛ o hi lɛ slaae. Mɛni he je? Ejakaa eko ɔ, be komɛ ɔ, o be lɛ nae ngɛ we mi, aloo si fɔfɔɛ ɔ be blɔ ngmɛe nɛ e bu mo tue. Jehanɛ hu ɔ, eko ɔ, ni komɛ ngɛ nɛ ja o kpale ya slaa mɛ si abɔ loko a bua maa jɔ he kaa o kɛ mɛ nɛ kase Baiblo ɔ. Mo kai kaa ke a du nɔ́ ko ɔ, ja a pɔɔ nɔ nyu puemi loko e maa wa. Jã nɔuu kɛ̃ nɛ ke waa kɛ nɔ ko pɔɔ Mawu Munyu ɔ he ní sɛɛmi ɔ, lɔ ɔ ma ha nɛ suɔmi nɛ nɔ ɔ ngɛ kɛ ha Yehowa kɛ Yesu Kristo ɔ mi maa wa.

ANƐ E SA NƐ KRISTOFOHI TSUO KƐ A HE NƐ WO KASELƆ PEEMI NÍ TSUMI Ɔ MI LO?

9-10. Mɛni he je nɛ wa ma nyɛ ma de ke anɔkuale Kristofohi tsuo nɛ a yeɔ bua kɛ hlaa tsui kpakpatsɛmɛ ɔ?

⁹ E sa nɛ Kristofo no fɛɛ Kristofo no nɛ ye bua kɛ hla tsui kpakpatsɛmɛ. Wa ma nyɛ maa ngɔ ní tsumi nɛ ɔ kɛ to jokuɛ ko nɛ laa nɛ a ngɛ lɛ hlae ɔ he. Ngɛ mɛni blɔ nɔ? Nɔ́ ko nɛ ya nɔ ji nɛ ɔ nɛ. Be ko nɛ jokuɛ nyumuyo ko nɛ e ye jeha etɛ laa a, nihi maa pee 500 nɛ a ya hla lɛ. Maa pee ngmlɛfia 20 se ɔ, ni ɔmɛ a kpɛti nɔ kake ya na jokuɛ ɔ ngɛ blɛfo ngmɔ ko mi. Nɔ nɛ na jokuɛ ɔ kplɛɛ we nɛ a je e yi kaa lɛ nɛ e na jokuɛ ɔ. E de ke: “Nihi lafahi abɔ nɛ a kpa si kɛ hla lɛ.”

¹⁰ Nihi babauu ngɛ kaa jokuɛ ɔ nɛ e laa a. A be hɛ nɔ kami ko, se a suɔ nɛ a ye bua mɛ. (Efe. 2:12) Wɔ nihi nɛ wa he hiɛ pe ayɔ kpaanyɔ kɛ se lɛ wa ngɛ mɔde bɔe kaa wa ma hla tsui kpakpatsɛmɛ nɛ ɔmɛ. Eko ɔ, o be nɔ ko nae nɛ e bua maa jɔ he kaa o kɛ lɛ nɛ kase Baiblo ɔ. Se eko ɔ, fiɛɛli kpahi nɛ mɛ hu a tsuɔ ní ngɛ nyɛ zugba kpɔ ɔ mi ɔ maa na nɔ ko nɛ e suɔ kaa e maa kase anɔkuale nɛ ngɛ Mawu Munyu ɔ mi ɔ. Ke nyɛmi ko ye bua nɔ ko nɛ e ba pee Kristo kaselɔ ɔ, nɔ fɛɛ nɔ nɛ e ye bua kɛ hla nɔ ɔ náa bua jɔmi.

11. Ke o be nɔ ko nɛ o kɛ lɛ kaseɔ Baiblo ɔ po ɔ, mɛni ji blɔ kpahi nɛ o ma nyɛ maa gu nɔ kɛ pee nihi kaseli?

¹¹ Ke o kɛ nɔ ko kase we Baiblo ɔ amlɔ nɛ ɔ po ɔ, o ma nyɛ maa ye bua kɛ pee nihi kaseli ngɛ blɔ kpahi a nɔ. Kaa nɔ hyɛmi nɔ́ ɔ, o ma nyɛ ma nya ni hehi nɛ a baa Matsɛ Yemi Asa a nɔ ɔ a he, nɛ o kɛ mɛ nɛ pee huɛ. Ke o je suɔmi kpo kɛ tsɔɔ mɛ ɔ, lɔ ɔ ma ha nɛ a na kaa anɔkuale Kristofohi ji wɔ. (Yoh. 13:34, 35) Heto kpiti nɛ o haa ngɛ asafo mi kpehi a sisi ɔ po maa tsɔɔ ni hehi nɛ a baa asafo mi kpe ɔ bɔ nɛ a maa je a tsui mi kɛ ha heto ngɛ bumi mi ha. O kɛ fiɛɛlɔ ehe ko ma nyɛ ma tsu ní ngɛ fiɛɛmi mi konɛ o ye bua lɛ nɛ e le bɔ nɛ e maa ngɔ Baiblo ɔ kɛ tsɔɔ ní ha saminya. Ke o pee jã a, o maa ye bua lɛ nɛ e maa kase Kristo.​—Luka 10:25-28.

12. Anɛ wa hia nyɛmi klɛdɛɛ ko loko wa ma nyɛ maa ye bua nihi nɛ a ba pee kaseli lo? Moo tsɔɔ nya.

¹² E sɛ nɛ wa ti nɔ ko nɛ susu kaa ja wa ngɛ nyɛmi klɛdɛɛ ko loko wa ma nyɛ maa tsɔɔ nihi ní nɛ a ba pee Yesu kaseli. Mɛni he je? Mo susu Faustina nɛ e ngɛ Bolivia níhi a si kpami ɔ he nɛ o hyɛ. Benɛ e kɛ Yehowa Odasefohi bɔni bɔmi ɔ, jamɛ a be ɔ mi ɔ, e li ní kanemi. Se piɔ lɛɛ, e le ní kanemi bɔɔ. Amlɔ nɛ ɔ, a baptisi lɛ, nɛ e kɛ bua jɔmi tsɔɔ ni kpahi ní. Behi fuu ɔ, e kɛ nihi enuɔ kaseɔ Baiblo ɔ daa otsi. E ngɛ mi kaa Faustina Baiblo kaseli ɔmɛ a kpɛti nihi fuu le ní kanemi pe lɛ mohu lɛɛ, se e ye bua nihi ekpa nɛ a baptisi mɛ.​—Luka 10:21.

13. Ke wa be deka po ɔ, mɛni jɔɔmihi wa ma nyɛ ma ná ngɛ kaselɔ peemi ní tsumi ɔ mi?

¹³ Kristofohi babauu be deka ejakaa blɔ nya ní tsumi fuu ngɛ a kuɛ nɔ. Se kɛ̃ ɔ, a náa be nɛ a kɛ nihi kaseɔ Baiblo ɔ, nɛ lɔ ɔ haa nɛ a náa bua jɔmi. Kaa nɔ hyɛmi nɔ́ ɔ, nyɛmiyo ko nɛ a tsɛɛ lɛ ke Melanie nɛ e ji fɔlɔ kake ɔ kɛ e biyo nɛ e ye jeha kpaanyɔ hi Alaska. E kɛ ngmlɛfiahi fuu tsuɔ ní, nɛ e hyɛɛ e papaa nɛ e ná kansa a hulɔ. Melanie pɛ ji Odasefo no ngɛ ma nyafii ko nɛ e tsɔ e he banee ɔ mi. E sɔleɔ konɛ Yehowa nɛ wo lɛ he wami kɛ da fiɛ̃ nɛ yeɔ ngɛ lejɛ ɔ nya konɛ e nyɛ nɛ e ya fiɛɛmi ejakaa e suɔ nɛ e na nɔ ko nɛ e kɛ lɛ maa kase Baiblo ɔ. Nyagbenyagbe ɔ, Melanie ya na yo ko nɛ a tsɛɛ lɛ ke Sara. Sara bua jɔ kaa e ba le Mawu biɛ. Be bɔɔ se ɔ, Sara kplɛɛ nɛ Melanie kɛ lɛ bɔni Baiblo ɔ kasemi. Melanie de ke: “Ke e su Soha gbɔkuɛ ɔ, pɔ tɔɔ ye he wawɛɛ lɛɛ, se i kɛ ye biyo ɔ wa yaa Sara ngɔ nɛ waa kɛ lɛ ya kaseɔ Baiblo ɔ, nɛ wa ná he se wawɛɛ. Ke wa ngɛ Sara sane bimi ɔmɛ a heto hlae ɔ, wa bua jɔɔ wawɛɛ, nɛ benɛ e ba pee Yehowa huɛ hu ɔ, wa bua jɔ wawɛɛ.” Sara pee kã kɛ da si temi kɛ womi nya, e kpa sɔlemi nɛ e ngɛ yae ɔ, nɛ e ha nɛ a baptisi lɛ.

NƆ́ HE JE NƐ TSUI SI TOMI HE HIA NGƐ KASELƆ PEEMI NÍ TSUMI Ɔ MI

14. (a) Ngɛ mɛni blɔ nɔ nɛ kaselɔ peemi ní tsumi ɔ ngɛ kaa wo hɛmi? (b) Kɛ Paulo munyu nɛ ngɛ 2 Timoteo 4:1, 2 ɔ woɔ mo he wami ha kɛɛ?

¹⁴ Ke o fiɛɛmi ní tsumi ɔ wui yiblii po ɔ, o kɔni mi ko jɔ̃. Yaa nɔ nɛ o hla nihi nɛ a sa konɛ a ba pee Kristo kaseli. Mo kai kaa Yesu ngɔ kaselɔ peemi ní tsumi ɔ kɛ to wo hɛmi he. Wo hɛli kɛ ngmlɛfiahi fuu tsuɔ ní loko a gbeɔ lo. A pɔɔ ní tsumi nyɔ mi aloo mɔtu mla, nɛ be komɛ ngɛ nɛ a yaa tsitsaa. (Luka 5:5) Jã nɔuu nɛ fiɛɛli komɛ ngɔɔ ngmlɛfiahi fuu kɛ tsuɔ ní, nɛ a “toɔ a tsui si kɛ hlaa” nihi ngɛ he slɔɔtohi kɛ be slɔɔtohi a mi. Mɛni he je? Ejakaa a suɔ nɛ a nine nɛ su nihi fuu a nɔ. Behi fuu ɔ, fiɛɛli nɛ a bɔɔ mɔde nɛ a peeɔ jã a naa nihi nɛ a bua jɔ sɛ gbi ɔ he. Anɛ o ma nyɛ maa fiɛɛ ngɛ be pɔtɛɛ ko nɛ o ma nyɛ maa na nihi aloo ngɛ he ko nɛ o maa na nihi ngɛ lo?​—Kane 2 Timoteo 4:1, 2.

15. Mɛni he je nɛ e sa nɛ waa to wa tsui si ke wa ngɛ Baiblo mi ní kasemi pee ɔ?

¹⁵ Mɛni he je nɛ e sa nɛ waa to wa tsui si ke wa ngɛ Baiblo mi ní kasemi pee ɔ? Yi mi tomi kake he je ji kaa e sa nɛ waa pee babauu pe Baiblo ɔ tsɔɔmi ɔmɛ pɛ nɛ wa maa ye bua ní kaselɔ ɔ nɛ e le. E sa nɛ waa ye bua ní kaselɔ ɔ konɛ e ba le Yehowa, nɔ nɛ ngma Baiblo ɔ, nɛ́ e suɔ lɛ. Ngɛ nɔ́ nɛ Yesu tsɔɔ e kaseli ɔmɛ kaa a pee nɛ wa maa tsɔɔ wa Baiblo kaselɔ ɔ se ɔ, e sa nɛ waa ye bua lɛ konɛ e ba le bɔ nɛ e maa ba e je mi ha kaa anɔkuale Kristofo no. E sa nɛ waa to wa tsui si nɛ waa ye bua lɛ konɛ e ngɔ Baiblo sisi tomi mlaa amɛ kɛ tsu ní. Ni komɛ nyɛɔ tsakeɔ a susumi kɛ a ní peepeehi ngɛ nyɔhiɔ bɔɔ komɛ pɛ a mi. Ni kpahi hu lɛɛ, e heɔ be babauu.

16. Mɛni o kase ngɛ Raúl níhi a si kpami ɔ mi?

¹⁶ Ma se sane kpakpa fiɛɛlɔ ko nɛ e ngɛ Peru ɔ níhi a si kpami ha nɛ wa na kaa se nami ngɛ tsui si tomi he. E de ke: “I kɛ ye Baiblo kaselɔ ko nɛ a tsɛɛ lɛ ke Raúl ɔ kase womihi enyɔ. Se nyagbahi nɛ e kɛ ngɛ kpee ɔ kle. E gba si himi pee basaa, e nya mi munyu hí, nɛ bɔ nɛ e ngɛ ha he je ɔ, e bimɛ hu bui lɛ. Se, e baa asafo mi kpehi be fɛɛ be, lɔ ɔ he ɔ, i pɔɔ lɛ slaami konɛ ma ye bua e kɛ e weku ɔ. Benɛ i kɛ lɛ je ní kasemi sisi ɔ, jeha etɛ kɛ se loko e pee tsakemihi nɛ sa, nɛ e ha nɛ a baptisi lɛ.”

17. Mɛni he wa ma susu ngɛ ní kasemi nɛ nyɛɛ se ɔ mi?

¹⁷ Yesu de wɔ ke wa “ya pee nihi nɛ a ngɛ je ma amɛ tsuo a mi ɔ [e] kaseli.” Bɔ nɛ pee nɛ wa nyɛ nɛ wa tsu ní tsumi nɛ ɔ, behi fuu ɔ, e he hia nɛ waa kɛ nihi nɛ a susumi je ekpa kulaa ngɛ wa nɔ́ ɔ he ɔ nɛ sɛɛ ní. Nimli nɛ ɔmɛ a kpɛti ni komɛ ji nihi nɛ a be jami ko mi aloo nihi nɛ a he we yi kaa Mawu ngɛ. Ngɛ ní kasemi nɛ nyɛɛ se ɔ mi ɔ, wa maa na bɔ nɛ wa ma plɛ kɛ fiɛɛ ha nihi kaa jã.