Anɔkuale Nɛ Kɔɔ Níhi Nɛ Maa Ba Hwɔɔ Se ɔ He
Anɛ o susu nɔ́ nɛ maa ba hwɔɔ se ɔ he hyɛ lo? Baiblo ɔ tsɔɔ níhi nɛ a he hia nɛ e be kɛe nɛ a maa ba. Ní nɛ ɔmɛ maa sa nimli tsuo nɛ a ngɛ zugba a nɔ ɔ a he.
Yesu tsɔɔ wɔ níhi nɛ ma ha nɛ waa “le kaa Mawu Matsɛ Yemi ɔ su si ta.” (Luka 21:31) E gba kɛ fɔ si kaa tahi, zugba mimiɛɛmihi, hwɔ, gbenɔ hiɔhi nɛ sãa nɔ kɛ ní kpahi maa ba. Ní nɛ ɔmɛ ngɛ mi bae ngɛ wa be nɛ ɔ mi.—Luka 21:10-17.
Jehanɛ hu ɔ, ngɛ adesa nɔ yemi ɔ we “nyagbe ligbi ɔmɛ” a mi ɔ, Baiblo ɔ tsɔɔ kaa nihi a je mi bami ma puɛ kulaa. O ma nyɛ maa kane enɛ ɔ he sane ngɛ 2 Timoteo 3:1-5 ɔ. Atsinyɛ jemi ko be he kaa, bɔ nɛ nihi ngɛ a ní pee ha kɛ bɔ nɛ a ngɛ a je mi bae ha mwɔnɛ ɔ, ha nɛ o na kaa Baiblo gbami nɛ ɔ ngɛ mi bae.
Mɛni enɛ ɔ tsɔɔ? Enɛ ɔ tsɔɔ kaa e be kɛe nɛ Mawu Matsɛ Yemi ɔ ma ha nɛ níhi ma tsake nɛ lɔ ɔ maa ngɔ si himi kpakpa kɛ ba zugba a nɔ. (Luka 21:36) Mawu wo si ngɛ Baiblo ɔ mi kaa e maa pee ní kpakpahi ngɛ zugba a nɔ nɛ nihi nɛ a maa hi nɔ ɔ ma ná si himi kpakpa. Ní nɛ ɔmɛ a kpɛti ekomɛ ji:
NƆ YEMI KPAKPA
“A ngɔ he wami, hɛ mi nyami, kɛ matsɛ yemi ngɔ wo [Yesu] dɛ, konɛ je ma amɛ, kɛ nihi nɛ tuɔ gbi slɔɔtoslɔɔto ɔmɛ nɛ a sɔmɔ lɛ. E he wami ɔ maa hi si kɛ maa ya neneene, nɛ e matsɛ yemi ɔ se be poe gblegbleegble.”—DANIEL 7:14.
Nɔ́ nɛ enɛ ɔ tsɔɔ: O ma nyɛ ma ná bua jɔmi ngɛ si himi mi ngɛ nɔ yemi nɛ Mawu to ɔ sisi. Nɔ yemi nɛ ɔ maa ye je ɔ tsuo nɔ, nɛ Mawu hla e Bi ɔ kaa e nya Matsɛ.
NƆMLƆ TSO MI HE WAMI KPAKPA
“Nihi nɛ ngɛ zugba a nɔ ɔ, a ti nɔ ko nɔ ko be dee hu ke, ‘I be he wami.’”—YESAYA 33:24.
Nɔ́ nɛ enɛ ɔ tsɔɔ: Nɔ ko be kpa jee nɛ nɔ ko be hiɔ nue hu; o ma nyɛ maa hi si kɛ ya daa nɛ o be gboe gblegbleegble.
TUE MI JƆMI MAA HI HE FƐƐ HE
“E haa ta se poɔ ngɛ je ɔ mi tsuo.”— LA 46:9.
Nɔ́ nɛ enɛ ɔ tsɔɔ: A be ta hwue hu, nɛ haomi nɛ jeɔ ta hwumi mi kɛ ba a hu se maa po.
NIMLI KPAKPAHI SƆUU LƐ A MAA HI ZUGBA A NƆ
“O be yayami peeli nae hu . . . Nihi nɛ a he jɔ ɔ, mɛɛ a maa hi zugba a nɔ.”—LA 37:10, 11.
Nɔ́ nɛ enɛ ɔ tsɔɔ: Yayami peeli be si hie hu, nihi nɛ a suɔ kaa a maa bu Mawu tue ɔ pɛ lɛ a maa hi zugba a nɔ.
ZUGBA A TSUO MAA PEE PARADEISO
“A maa po wehi, nɛ mɛ nitsɛmɛ a maa hi mi; a maa pee wai ngmɔhi, nɛ mɛ nitsɛmɛ a maa ye a mi yiblii.”—YESAYA 65:21, 22.
Nɔ́ nɛ enɛ ɔ tsɔɔ: A ma dla zugba a nɔ tsuo nɛ e maa pee fɛu. Mawu ma ha nɛ sɔlemi nɛ wa sɔleɔ kaa a pee e suɔmi nya ní ngɛ “zugba a nɔ” ɔ maa ba mi.—Mateo 6:10.