“Ba Nyɛɛ Ye Se”
1. Mɛni ji he blɔ nɛ wa ma ná ngɛ Asafo Baiblo Mi Nikasemi ɔ mi ngɛ nyɔhiɔhi nɛ ma ngɛ wa hɛ mi ɔ mi?
1 Sane Kpakpahi eywiɛ ɔmɛ ha nɛ wa le Yesu nɛ ji Mawu Bi ɔ si himi ngɛ zugba a nɔ ɔ he sane fitsofitso. Akɛnɛ e sa kaa Kristofoli nɛ ‘nyɛɛ e se haa’ heje ɔ, e maa hi wawɛɛ kaa wa ma dla wa he konɛ waa pee tue saminya be mi nɛ wa maa kase “Ba Nyɛɛ Ye Se” womi ɔ ngɛ Asafo Baiblo Mi Nikasemi ɔ kɛ je otsi nɛ je sisi March 1 ɔ. (1 Pet. 2:21; Mar. 10:21) Nɔ́ nɛ wa ma susu he titli ji Yesu si himi mi níhi nɛ ma nyɛ maa wo wɔ he wami ngɛ wa sɔmɔmi nítsumi ɔ mi.
2. Mɛni blɔ nɔ wa ma nyɛ ma ná nɔ hyɛmi nɔ́ nɛ Yesu pee ngɛ tsui si tomi he ɔ he se ngɛ?
2 Nɔ Hyɛmi Nɔ́ Nɛ Yesu Pee: Anɛ o ya fiɛɛmi ngɛ wehi a mi be ko nɛ a bui mo tue lo? Ke waa kɛ si fɔfɔɛ kaa kikɛ kpe ɔ, e sa nɛ wa kai munyu nɛ Yesu tu ɔ, ke: ‘Nɛ́ a wa mi yi mi ɔ, nyɛ hu a maa wa nyɛ yi mi.’ (Yoh. 15:20) Ngɛ anɔkuale mi ɔ, pi nɔ tsuaa nɔ nɛ ma kua wɔ tue bumi ɔ nɛ tsɔɔ kaa e ngɛ wɔ yi mi wae. Se kɛ̃ ɔ, bua jɔmi nɛ Yesu ma ná pee se ɔ ji nɔ́ nɛ ye bua lɛ nɛ e to e tsui si ngɛ kahi kɛ haomi slɔɔtohi a mi ɔ nɛ. Wɔ hu wa ma nyɛ maa ngɔ wa juɛmi kɛ fɔ nɔ́ nɛ wa maa pee kɛ sa Yehowa hɛ mi, kɛ jɔɔmi nɛ e maa jɔɔ wɔ ke wa ye lɛ anɔkuale ɔ nɔ. Enɛ ɔ maa ye bua wɔ nɛ ‘pɔ be wa he tɔe, nɛ wa kɔni mi be jɔ̃e.’ (Heb. 12:2, 3; Abɛ 27:11) Wa ma nyɛ ma ná nɔ mi mami kaa ke wa ya nɔ nɛ wa tsu fiɛɛmi nítsumi ɔ, Kristo Yesu maa ye bua wɔ.—Mat. 28:20.
3. Kɛ wa maa pee kɛɛ kɛ kase blɔ nɔ nɛ Yesu gu kɛ tsu fiɛɛmi nítsumi ɔ?
3 ‘Enɛ ɔ He Nɛ A Tsɔ Mi Ngɛ’: Matsɛ Yemi fiɛɛmi nítsumi ɔ ji nítsumi nɛ Yesu tsu titli ngɛ e si himi mi. (Luka 4:43) E ngɔ e be tsuo kɛ tsu fiɛɛmi nítsumi ɔ. E kɛ hɛdɔ tsu, nɛ be tsuaa be ɔ, e hla he blɔhi nɛ e kɛ maa tu Matsɛ Yemi ɔ he munyu. Akɛnɛ wa ji Yesu se nyɛɛli heje ɔ, mɛni e nɔ hyɛmi nɔ́ ɔ se nɛ wa maa nyɛɛ ɔ ma ha nɛ waa pee? Ngɛ wa daa ligbi yami kɛ bami mi ɔ, anɛ wa ma nyɛ maa fiɛɛ sane kpakpa a kɛ ha nihi lo? E sa nɛ suɔmi nɛ Kristo ngɛ kɛ ha wɔ ɔ nɛ wo wɔ he wami konɛ waa fiɛɛ sane kpakpa a kɛ ha nihi babauu!—2 Kor. 5:14.
4. Mɛni blɔhi a nɔ nɛ wa ma nyɛ maa gu konɛ wa ha nɛ wa fiɛɛmi ɔ nɛ pi si?
4 “Bɔnɛ Nɔmlɔ Nɛ ɔ Tuɔ Munyu ɔ, Nɔ Ko Tu We Munyu Jã Gblee”: Bɔnɛ Yesu plɛ kɛ tsɔɔ ní ɔ, ha nɛ e tue buli ɔmɛ a nya kpɛ a he. (Yoh. 7:46; Mat. 7:28, 29) Mɛni heje nɛ e je ekpa ngɛ tsɔɔli kpahi a he? E suɔ anɔkuale munyuhi nɛ e fiɛɛ ɔ, nɛ e suɔ nihi nɛ e tsɔɔ mɛ ní ɔ, nɛ e gu blɔ slɔɔtohi a nɔ kɛ tsɔɔ nihi ní. Ke wa kase Tsɔɔlɔ Ngua a, lɔɔ ma ha nɛ wa fiɛɛmi ɔ maa pi si.—Luka 6:40.
5. Mɛni mɔde e sa kaa waa bɔ be mi nɛ wa ngɛ “Ba Nyɛɛ Ye Se” womi ɔ kasee ɔ?
5 Ní kpakpahi nɛ wa ma nyɛ maa kase kɛ je Yesu ngɔ ɔ a kpɛti bɔɔ komɛ ji nɛ ɔ nɛ. Mɛni ji ní kpahi nɛ wa ma nyɛ maa kase kɛ je e ngɔ? Benɛ wa ngɛ Yesu si himi he ní kasee ngɛ Asafo Baiblo Mi Nikasemi ɔ mi ɔ, bɔɔ mɔde nɛ o “yɔse Kristo suɔmi” kɛ gu bɔnɛ e tuɔ munyu kɛ bɔnɛ e peeɔ e ní ha a nɛ o maa kase ɔ nɔ.—Efe. 3:19.