Nítsumi Nɛ He Hia Pe Kulaa
1. Ke wa bua jɔ sɔmɔmi nítsumi ɔ he saminya a, lɔɔ maa wo wɔ he wami konɛ waa ngɔ mɛni níhi kɛ sã afɔle?
1 Mɛni heje nɛ daa nɛ ɔ, a woɔ wɔ he wami kaa waa ngɔ wa be, kɛ wa he wami, kɛ níhi nɛ wa ngɛ ɔ kɛ tsu fiɛɛmi nítsumi ɔ? Ejakaa sɔmɔmi nítsumi ɔ he hia pe nítsumihi tsuo! Ke wa susuu nɔ́ nɛ sɔmɔmi nítsumi ɔ tsuɔ ɔ he ɔ, lɔɔ maa wo wɔ he wami wawɛɛ konɛ waa ngɔ wa he kɛ wo nítsumi nɛ a be tsue ekohu nɛ ɔ mi.—Níts. 20:24.
2. Kɛ wa fiɛɛmi nítsumi ɔ plɛɔ kɛ tsɔɔ Yehowa biɛ ɔ he ha kɛɛ?
2 E Tsɔɔ Yehowa Biɛ ɔ He: Fiɛɛmi nítsumi ɔ maa nɔ mi kaa Yehowa Matsɛ Yemi nɛ e ngɛ Kristo Yesu nine nɔ ɔ ma ba da adesa nɔyemihi tsuo a nane mi, nɛ e ma ba tsu adesahi a haomihi a he ní kɛ ha mɛ. (Mat. 6:9, 10) Fiɛɛmi nítsumi ɔ woɔ Yehowa hɛ mi nyami kaa lɛ pɛ ji nɔ nɛ ma nyɛ ma kpɔ wɔ kɛ je hiɔ kɛ gbenɔ dɛ mi. (Yes. 25:8; 33:24) Akɛnɛ a ngɔɔ e biɛ ɔ kɛ tsɛɛ wɔ heje ɔ, ke wa ba wa je mi saminya nɛ waa kɛ kã tsu sɔmɔmi nítsumi ɔ, nihi ma yɔse, nɛ a maa wo e hɛ mi nyami. (1 Pet. 2:12) Ke wa ha nɛ nihi tsuo nɛ ngɛ je ɔ mi ɔ le Nyɔmtsɛ Matsɛ Yehowa biɛ ɔ, lɔɔ ma ha nɛ wa tsui maa nɔ wa mi nitsɛnitsɛ!—La 83:18.
3. Mɛni jɔɔmihi lɛ nihi nɛ a kplɛɛɔ Matsɛ Yemi sɛgbi ɔ nɔ ɔ náa?
3 E Heɔ Nihi A Yi Wami: Yehowa ‘tsui si kɛkɛ nɛ e ngɛ toe, ejakaa e sume nɛ nɔ ko nɔ ko hɛ mi nɛ kpata, se mohu nɔ tsuaa nɔ nɛ tsake e tsui.’ (2 Pet. 3:9) Se kɛ̃ ɔ, ke fiɛɛlɔ ko be ɔ, kɛ nihi ma plɛ kɛ le jemiba nɛ Yehowa kplɛɛ nɔ kɛ jemiba nɛ e kplɛɛ we nɔ ɔ kɛɛ? (Yona 4:11; Rom. 10:13-15) Ke ni kakaakahi bu sane kpakpa a tue nɛ a kpa ní yayamihi peemi ɔ, a si himi peeɔ kpakpa. (Mika 4:1-4) Jehanɛ se hu ɔ, a náa hɛ kɛ nɔ fɔmi nɛ ngɛ bua jɔmi kaa a maa hi si kɛ ya neneene. Ke waa kɛ kã fiɛɛ nɛ wa tsɔɔ nihi ní ɔ, lɔɔ ma ha nɛ wa ma he wɔ nitsɛmɛ, kɛ nihi nɛ a buɔ wɔ tue ɔ, a yi wami. (1 Tim. 4:16) E ji he blɔ ngua nɛ wa ná kaa wa ngɛ nítsumi nɛ he hia pe kulaa nɛ ɔ tsue!
4. Mɛni heje nɛ e sa kaa waa kɛ wa he wami tsuo nɛ e tsu Matsɛ Yemi fiɛɛmi kɛ kaselɔ peemi nítsumi ɔ?
4 E be kɛe nɛ amanehlu ngua a ma ba kpata je yaya nɛ ɔ hɛ mi tlukaa. A ma he nihi nɛ a jaa Yehowa a, a yi wami. Enɛ ɔ he ɔ, fiɛɛmi kɛ kaselɔ peemi nítsumi ɔ ji nítsumi ko nɛ ngɛ nɔ yae mwɔnɛ ɔ nɛ he hia, nɛ́ se nami ngɛ he, nɛ́ e sa kaa a kɛ oya yemi nɛ tsu he ní. Nyɛ ha nɛ waa ngɔ kɛ pee nɔ́ titli ngɛ wa si himi mi!—Mat. 6:33.