Moo Kase Kã Nɛ Yesu Kɛ Tsu Fiɛɛmi Ní Tsumi ɔ

1. Mɛni ji su ko nɛ haa nɛ Yehowa sɔmɔli je ekpa kulaa ngɛ nihi nɛ a tsɛɔ a he ke Kristofohi ɔ a he?

YEHOWA sɔmɔli tsuɔ fiɛɛmi ní tsumi ɔ kɛ kãa wawɛɛ. Su nɛ ɔ ha nɛ a je ekpa kulaa ngɛ nihi nɛ a tsɛɔ a he ke Kristofohi ɔ a he. (Tito 2:14) Se be komɛ ɔ, e he ma nyɛ maa wa ha wɔ kaa waa kɛ bua jɔmi maa fiɛɛ. Eko ɔ, wa maa nu he kaa bɔ nɛ asafo mi nɔkɔtɔma ko nɛ e tsuɔ ní wawɛɛ ɔ nu he ɔ. E de ke, “Pi be fɛɛ be nɛ i nuɔ he kaa ma fiɛɛ.”

2. Mɛni ma nyɛ ma ha nɛ e he nɛ wa ha wɔ be komɛ kaa waa kɛ kã maa fiɛɛ?

² Eko ɔ, wa bua jɔɔ he kaa wa maa pee ní kpahi ngɛ Yehowa sɔmɔmi mi wawɛɛ mohu pe nɛ wa maa fiɛɛ ha nihi. Mɛni he je? Ejakaa ke wa ye bua ngɛ Matsɛ Yemi Asahi a mami mi loo a dlami mi, aloo wa ye bua wa nyɛmimɛ ngɛ oslaa be mi, aloo wa wo mɛ he wami ngɛ be kpahi a mi ɔ, wa naa kaa e woɔ yiblii oya nɔuu, nɛ lɔ ɔ haa nɛ wa tsui nɔɔ wa mi. Jehanɛ hu ɔ, ke waa kɛ wa nyɛmimɛ ɔmɛ ngɛ ní tsue ɔ, wa bua jɔɔ suɔmi kɛ kake peemi nɛ ngɛ wa kpɛti ɔ he, nɛ wa naa kaa a hɛ sa nɔ́ nɛ wa ngɛ pee ɔ. Se eko ɔ, waa kɛ jehahi babauu fiɛɛ ngɛ zugba kpɔ ko mi se nɔ́ kpakpa ko ji mi kɛ bɛ. Aloo eko ɔ, nihi nɛ wa fiɛɛɔ kɛ haa mɛ ɔ bui wa sɛ gbi ɔ tue. Jehanɛ hu ɔ, wa le kaa akɛnɛ wa ngɛ nyagbe ɔ he sue haa he je ɔ, nihi fuu maa te si kɛ wo wɔ. (Mat. 10:22) Ke jã a, lɛɛ mɛni maa ye bua wɔ konɛ waa ya nɔ nɛ waa fiɛɛ kɛ kã wawɛɛ?

3. Mɛni blɔ nɔ nɛ nɔ́ he tomi nɔ́ nɛ ngɛ Luka 13:​6-9 ɔ haa nɛ wa naa kaa Yesu fiɛɛ kɛ kã?

³ Ke wa susu kã nɛ Yesu kɛ fiɛɛ ɔ he ɔ, e maa ye bua wɔ nɛ waa pee kã ngɛ fiɛɛmi mi. Benɛ Yesu ngɛ zugba a nɔ ɔ, e ha we nɛ nɔ́ ko nɛ jɔ̃ e kɔni mi nɛ e kpa fiɛɛmi. Ngɛ anɔkuale mi ɔ, benɛ be ngɛ mi puee ɔ, e ya nɔ nɛ e fiɛɛ wawɛɛ kɛ kã. (Kane Luka 13:​6-9.) Yesu ngɔ e fiɛɛmi ní tsumi ɔ kɛ to wai ngmɔ nɔ hyɛlɔ ko he. Wai ngmɔ nɔ hyɛlɔ ɔ ngɔ jeha etɛ kɛ hyɛ fig tso ko nɛ a du ngɛ wai ngmɔ ɔ nɔ saminya, se kɛ̃ ɔ, e nɛ yiblii kake ngmelu po ngɛ fig tso ɔ nɔ. Jã nɔuu kɛ̃ nɛ Yesu hu ngɔ jeha etɛ kɛ fiɛɛ ha Yudabi ɔmɛ, se a kpɛti nihi fuu bui lɛ tue fɛɛ. Se kaa bɔ nɛ wai ngmɔ nɔ hyɛlɔ ɔ kɔni mi jɔ̃ we nɛ e ngɛ hɛnɔkami kaa fig tso ɔ maa wo yiblii ɔ, jã kɛ̃ nɛ Yesu hu kɔni mi jɔ̃ we ngɛ Yudabi ɔmɛ a he. E ya nɔ nɛ e kɛ kã fiɛɛ wawɛɛ konɛ e su a tsui he.

4. Mɛni ji níhi eywiɛ komɛ nɛ wa ma nyɛ maa kase ngɛ Yesu nɔ hyɛmi nɔ́ ɔ mi?

⁴ Ngɛ ní kasemi nɛ ɔ mi ɔ, wa maa na blɔ nɔ nɛ Yesu gu kɛ pee kã, titli benɛ e piɛ nyɔhiɔ ekpa nɛ e maa gbe e sɔmɔmi ní tsumi ɔ nya a. (Luka 10:1) Ke wa kase ní kɛ je níhi nɛ Yesu tsɔɔ kɛ níhi nɛ e pee ɔ mi ɔ, lɔ ɔ maa wo wɔ he wami nɛ waa ya nɔ nɛ waa pee kã. Enɛ ɔ he ɔ, nyɛ ha nɛ wa susu níhi eywiɛ nɛ Yesu pee nɛ wa ma nyɛ maa kase: (1) E ngɔ e juɛmi kɛ ma Yehowa suɔmi nya ní peemi nɔ, (2) e ngɔ e juɛmi kɛ ma Baiblo gbamihi a nɔ, (3) e ngɔ e hɛ kɛ fɔ Yehowa nɔ, kɛ (4) e ná juɛmi nɛ da kaa ni komɛ maa bu lɛ tue.

E NGƆ E JUƐMI KƐ MA YEHOWA SUƆMI NYA NÍ PEEMI NƆ

5. Mɛni Yesu pee kɛ tsɔɔ kaa Mawu suɔmi nya ní peemi ji nɔ́ nɛ he hia lɛ wawɛɛ?

⁵ Yesu kɛ kã fiɛɛ “Matsɛ Yemi ɔ he sane kpakpa a,” ejakaa e le kaa lɔ ɔ ji ní tsumi nɛ Mawu suɔ kaa e tsu. (Luka 4:43) Yesu ngɔ fiɛɛmi ní tsumi ɔ kɛ pee nɔ́ titli ngɛ e si himi mi. Benɛ e piɛ bɔɔ nɛ e maa gbe e sɔmɔmi ní tsumi ɔ nya po ɔ, e hia blɔ kɛ “je mahi a mi kɛ ya mahi a mi, kɛ kɔpehi a mi kɛ ya kɔpehi a mi” nɛ e ya tsɔɔ nihi ní. (Luka 13:22) Jehanɛ hu ɔ, e tsɔse kaseli kpa komɛ konɛ mɛ hu a fiɛɛ kɛ kã.—Luka 10:1.

6. Mɛni blɔ nɔ nɛ fiɛɛmi ní tsumi ɔ kɛ ní tsumi kpahi nɛ wa tsuɔ ngɛ Yehowa sɔmɔmi mi ɔ ngɛ tsakpa? (Hyɛ foni ɔ hulɔ.)

⁶ Mwɔnɛ hu ɔ, sane kpakpa a nɛ wa maa fiɛɛ ɔ ji nɔ́ titli nɛ Yehowa kɛ Yesu suɔ kaa waa ngɔ wa juɛmi kɛ ma nɔ. (Mat. 24:14; 28:​19, 20) Fiɛɛmi ní tsumi ɔ kɛ ní tsumi kpahi nɛ wa tsuɔ ngɛ Yehowa sɔmɔmi mi ɔ ngɛ tsakpa wawɛɛ. Kaa nɔ hyɛmi nɔ́ ɔ, wa maa Matsɛ Yemi Asahi bɔ nɛ pee nɛ nihi nɛ wa fiɛɛɔ kɛ haa mɛ ɔ nɛ a ba sɔmɔ Yehowa ngɛ mi. Jehanɛ hu ɔ, ní tsumihi nɛ a tsuɔ ngɛ Betel kɛ he kpahi ɔ yeɔ buaa nɛ fiɛɛmi nɛ ní tsumi ɔ yaa nɔ saminya. Wa yeɔ buaa nihi nɛ oslaa ba a nɔ ɔ konɛ a nine nɛ su a hiami níhi a nɔ konɛ a nyɛ nɛ a ya asafo mi kpehi kɛ fiɛɛmi ekohu. Ke wa yɔse kaa fiɛɛmi ní tsumi ɔ he hia saminya, nɛ wa kai kaa lɔ ɔ ji nɔ́ titli nɛ Yehowa suɔ kaa wa tsu ɔ, e maa wo wɔ he wami konɛ waa kɛ wa he nɛ wo mi be fɛɛ be. János nɛ e ji asafo mi nɔkɔtɔma ngɛ Hungary ɔ de ke, “I kaiɔ ye he kaa waa kɛ teokrase ní tsumi ko be nyɛe maa da fiɛɛmi ní tsumi ɔ nane mi. Lɔ ɔ ji wa ní tsumi titli.”

7. Mɛni he je nɛ Yehowa suɔ nɛ waa ya nɔ nɛ waa fiɛɛ ɔ? (1 Timoteo 2:​3, 4)

⁷ Ke wa naa nihi kaa bɔ nɛ Yehowa naa mɛ ɔ, lɔ ɔ maa ye bua wɔ konɛ waa kɛ kã nɛ tsu fiɛɛmi ní tsumi ɔ wawɛɛ. Yehowa suɔ nɛ nihi fuu nɛ a bu sane kpakpa a tue nɛ a kɛ tsu ní. (Kane 1 Timoteo 2:​3, 4.) Enɛ ɔ he ɔ, e tsɔseɔ wɔ konɛ wa nyɛ nɛ waa fiɛɛ yi wami hemi sɛ gbi ɔ saminya. Kaa nɔ hyɛmi nɔ́ ɔ, womiyo nɛ ji, Moo Suɔ Nihi—Moo Pee Mɛ Kaseli ɔ tsɔɔ ní komɛ nɛ maa ye bua wɔ konɛ wa nyɛ nɛ waa kɛ nihi nɛ je ní sɛɛmi sisi kɛ yi mi tomi ɔ kaa wa maa pee mɛ kaseli. Ke nihi bui wɔ tue amlɔ nɛ ɔ po ɔ, eko ɔ, a ma ná he blɔ kɛ pee jã pee se loko amanehlu ngua a maa ba nyagbe. Níhi nɛ wa deɔ mɛ amlɔ nɛ ɔ ma ha nɛ eko ɔ, a maa bu wɔ tue hwɔɔ se. Se e ma nyɛ maa ba jã ke ji kaa wa ya nɔ nɛ wa fiɛɛ.

E NGƆ E JUƐMI KƐ MA BAIBLO GBAMIHI A NƆ

8. Kɛ Baiblo gbami ye bua Yesu nɛ e kɛ e be tsu ní ha kɛɛ?

⁸ Yesu nu bɔ nɛ Baiblo gbamihi ma plɛ kɛ ba mi ha a sisi. E le kaa e kɛ jeha etɛ kɛ fã pɛ lɛ ma tsu e sɔmɔmi ní tsumi ɔ. (Dan. 9:​26, 27) Jehanɛ hu ɔ, e le gbami nɛ a gba kɛ kɔ be nɛ e ma gbo kɛ blɔ nɔ nɛ e maa gu kɛ gbo ɔ he. (Luka 18:​31-34) Enɛ ɔ nɛ Yesu le ɔ ha nɛ e kɛ e be tsu ní saminya. Enɛ ɔ ha nɛ e kɛ kã fiɛɛ bɔ nɛ pee nɛ e nyɛ nɛ e gbe ní tsumi nɛ a kɛ wo e dɛ ɔ nya.

9. Mɛni he je nɛ Baiblo gbamihi woɔ wɔ he wami nɛ wa fiɛɛɔ kɛ kã a?

⁹ Ke wa nu bɔ nɛ Baiblo gbamihi ma plɛ kɛ ba mi ha a sisi ɔ, lɔ ɔ maa ye bua wɔ konɛ waa kɛ kã nɛ fiɛɛ. Wa le kaa be nɛ e piɛ nɛ Satan je yaya nɛ ɔ maa ba nyagbe ɔ pi kulaa. Níhi nɛ ngɛ nɔ yae mwɔnɛ ɔ kɛ bɔ nɛ nihi ngɛ a ní pee ha a haa nɛ wa naa kaa wa ngɛ nyagbe ligbi ɔmɛ a mi kaa bɔ nɛ Baiblo ɔ gba kɛ fɔ si ɔ. Ninyɛ nɛ ngɛ Anglo-Amerika kɛ Russia kɛ mahi nɛ a fĩ Russia se ɔ a kpɛti ɔ haa nɛ gbami nɛ kɔɔ woyi je matsɛ ɔ kɛ omleyi je matsɛ ɔ he ɔ ngɛ mi bae ‘ngɛ nyagbe be nɛ ɔ mi.’ (Dan. 11:40) Jehanɛ hu ɔ, wa nu sisi kaa Anglo-Amerika nɛ ji nɔ yemi nɛ ngɛ he wami ngɛ je ɔ mi tsuo ɔ daa si kɛ ha amaga ngua a nanewɛɛ ɔ nɛ Daniel 2:​43-45 ɔ tu he munyu ɔ. Ngɛ anɔkuale mi ɔ, gbami nɛ ɔ haa nɛ wa náa nɔ mi mami kaa e be kɛe kulaa nɛ Mawu Matsɛ Yemi ɔ ma kpata adesa nɔ yemi tsuo hɛ mi. Gbami nɛ ɔmɛ tsuo tsɔɔ kaa wa su nyagbe ɔ he haa. Enɛ ɔ he ɔ, e sa nɛ waa ngɔ wa be ɔ kɛ tsu ní saminya konɛ waa kɛ hɛdɔ nɛ fiɛɛ sane kpakpa a.

10. Ngɛ mɛni blɔ kpahi a nɔ nɛ Baiblo gbamihi ma nyɛ maa wo wɔ he wami nɛ waa fiɛɛ kɛ kã?

¹⁰ Baiblo gbamihi hu haa nɛ wa naa sɛ gbi nɛ e sa kaa waa fiɛɛ. Nyɛmiyo ko nɛ a tsɛɛ lɛ ke Carrie nɛ e ngɛ sɔmɔe ngɛ Dominican Republic ɔ de ke: “Ke i susu Yehowa si womihi nɛ a taa nɔ tsui he nɛ a maa ba mi ɔ he ɔ, e woɔ mi he wami nɛ i fiɛɛɔ anɔkuale ɔ kɛ tsɔɔ ni kpahi. Ke i na si fɔfɔɛhi nɛ nihi kɛ ngɛ kpee mwɔnɛ ɔ, i naa kaa si womi nɛ ɔmɛ maa ye bua i kɛ mɛ tsuo.” Baiblo gbamihi woɔ wɔ he wami nɛ wa kɔni mi jɔ̃ we, ejakaa wa le kaa Yehowa yeɔ buaa wɔ ngɛ fiɛɛmi ní tsumi ɔ mi. Leila nɛ e ngɛ Hungary ɔ de ke: “Yesaya 11:​6-9 ɔ woɔ mi he wami nɛ i suɔ nɛ ma fiɛɛ sane kpakpa a kɛ ha nihi nɛ eko ɔ, a be suɔe kaa a maa bu mi tue ɔ po. I le kaa Yehowa ma nyɛ maa ye bua nɔ fɛɛ nɔ nɛ e pee tsakemihi.” Nyɛminyumu ko nɛ a tsɛɛ lɛ ke Christopher nɛ e ngɛ Zambia a hu de ke: “Kaa bɔ nɛ a gba ngɛ Maako 13:​10, fiɛɛmi ní tsumi ɔ yi ngɛ blie wawɛɛ ngɛ je kɛ wɛ, nɛ i suɔ nɛ ma ye bua kɛ ha nɛ gbami nɛ ɔ nɛ ba mi.” Mɛni Baiblo gbamihi nɛ woɔ mo he wami konɛ o ya nɔ nɛ o fiɛɛ?

E NGƆ E HƐ KƐ FƆ YEHOWA NƆ KONƐ E YE BUA LƐ

11. Mɛni he je nɛ e sa nɛ Yesu nɛ ngɔ e hɛ kɛ fɔ Yehowa nɔ konɛ e ya nɔ nɛ e kɛ kã nɛ fiɛɛ ɔ? (Luka 12:​49, 53)

¹¹ Yesu ngɔ e hɛ kɛ fɔ Yehowa nɔ konɛ e ye bua lɛ nɛ e ya nɔ nɛ e kɛ kã nɛ fiɛɛ. E ngɛ mi kaa Yesu kɛ hɛ si kami tsu ní mohu lɛɛ, se e le hu kaa sane kpakpa a nɛ kɔɔ Mawu Matsɛ Yemi ɔ he ɔ nɛ e maa fiɛɛ ɔ ma ha nɛ nihi fuu a mi mi ma fu nɛ a maa te si kɛ wo lɛ. (Kane Luka 12:​49, 53.) Akɛnɛ Yesu ya nɔ nɛ e fiɛɛ he je ɔ, jami hɛ mi nyɛɛli ɔmɛ bɔ mɔde si abɔ kaa a maa gbe lɛ. (Yoh. 8:59; 10:​31, 39) Se Yesu ya nɔ nɛ e fiɛɛ ejakaa e le kaa Yehowa piɛɛ e he. E de ke: “Pi imi nɔ kake too nɛ i ngɛ, mohu ɔ, Tsɛ ɔ nɛ e tsɔ mi ɔ piɛɛ ye he . . . E si we imi nɔ kake too, ejakaa i peeɔ níhi nɛ e bua jɔ he be fɛɛ be.”—Yoh. 8:​16, 29.

12. Mɛni Yesu pee kɛ ye bua e kaseli ɔmɛ konɛ a ya nɔ nɛ a fiɛɛ ke nihi ngɛ si tee kɛ ngɛ mɛ woe po?

¹² Yesu kai e kaseli ɔmɛ kaa ke a ngɔ a hɛ kɛ fɔ Yehowa nɔ ɔ, e maa ye bua mɛ. E wo mɛ he wami si abɔ kaa Yehowa maa ye bua mɛ ke nihi ngɛ mɛ yi mi wae po. (Mat. 10:​18-20; Luka 12:​11, 12) Akɛnɛ Yesu le kaa nihi fuu ma kua sane kpakpa a he je ɔ, e bɔ mɛ kɔkɔ kaa a kɛ hɛ si kami nɛ tsu ní. (Mat. 10:16; Luka 10:3) E de mɛ kaa a ko ngɔ sɛ gbi ɔ kɛ nyɛ nihi nɛ a sume kaa a maa bu tue ɔ a nɔ. (Luka 10:​10, 11) E de mɛ hu kaa ke a ngɛ mɛ yi mi wae ɔ, a tu fo. (Mat. 10:23) E ngɛ mi kaa Yesu pee kã nɛ e kɛ e hɛ fɔ Yehowa nɔ mohu lɛɛ, se e yu e he ngɛ si fɔfɔɛhi nɛ ma nyɛ maa pee oslaa kɛ ha lɛ ɔ a he.—Yoh. 11:​53, 54.

13. Mɛni he je nɛ o ma nyɛ ma ná nɔ mi mami kaa Yehowa maa ye bua mo?

¹³ Mwɔnɛ ɔ, wa hia Yehowa yemi kɛ buami konɛ wa nyɛ nɛ waa fiɛɛ kɛ kã ke nihi te si kɛ wo wɔ. (Kpoj. 12:17) Mɛni maa ye bua mo konɛ o ná nɔ mi mami kaa Yehowa maa ye bua mo? Mo susu sɔlemi nɛ Yesu sɔle nɛ a ngma ngɛ Yohane yi 17 ɔ he nɛ o hyɛ. Yesu de Yehowa kaa e bu bɔfo ɔmɛ a he, nɛ Yehowa hu ha jamɛ a sɔlemi ɔ heto. Ní Tsumi womi ɔ tsɔɔ bɔ nɛ Yehowa ye bua kaseli ɔmɛ nɛ a kɛ kã fiɛɛ benɛ nihi te si kɛ wo mɛ ɔ. Jehanɛ hu ɔ, benɛ Yesu ngɛ sɔlee ɔ, e kpa Yehowa pɛɛ kaa e bu ni nɛmɛ nɛ a ma ná hemi kɛ yemi ngɛ sane kpakpa a nɛ bɔfo ɔmɛ ngɛ fiɛɛe ɔ mi ɔ a he. Nɛ mo hu o piɛɛ he. Ngɛ anɔkuale mi ɔ, Yehowa ngɛ Yesu sɔlemi nɛ ɔ heto hae loloolo. E maa ya nɔ maa ye bua mo kaa bɔ nɛ e ye bua bɔfo ɔmɛ ɔ.—Yoh. 17:​11, 15, 20.

14. Mɛni he je nɛ wa ma nyɛ ma ná nɔ mi mami kaa waa kɛ kã ma nyɛ maa fiɛɛ ngɛ haomi behi a mi po ɔ? (Hyɛ foni ɔ hulɔ.)

¹⁴ Be mi nɛ wa ngɛ nyagbe ɔ he sue haa nɛ ɔ, e he ma nyɛ maa wa ha wɔ kaa wa maa fiɛɛ sane kpakpa a. Se Yesu ha nɛ wa ná nɔ mi mami kaa Yehowa maa ye bua wɔ konɛ waa kɛ kã nɛ tsu ní tsumi ɔ. (Luka 21:​12-15) Kaa bɔ nɛ e ji ngɛ Yesu kɛ e bɔfo ɔmɛ a blɔ fa mi ɔ, wɔ hu wa ngmɛɛɔ nihi blɔ kaa mɛ nitsɛmɛ a mwɔ a yi mi kpɔ kaa a maa bu wɔ tue loo a be wɔ tue bue. Jehanɛ hu ɔ, waa kɛ mɛ sɛ̃ nya. Ngɛ mahi nɛ a tsi wa fiɛɛmi ní tsumi ɔ nya ngɛ po ɔ, nyɛmimɛ ɔmɛ nyɛɔ nɛ a yaa nɔ nɛ a fiɛɛɔ sane kpakpa a, ejakaa a ngɔɔ a hɛ kɛ fɔɔ Yehowa nɔ se pi mɛ nitsɛmɛ a nɔ. Kaa bɔ nɛ Yehowa wo e sɔmɔli he wami ngɛ kaseli ɔmɛ a be ɔ mi ɔ, jã nɔuu kɛ̃ nɛ mwɔnɛ ɔ hu ɔ, e woɔ wɔ he wami ‘konɛ wa tsu fiɛɛmi ní tsumi ɔ kɛ pi si’ kaa bɔ nɛ Yehowa suɔ ɔ. (2 Tim. 4:17) Ngɛ anɔkuale mi ɔ, o ma nyɛ ma ná nɔ mi mami kaa ke o ngɔ o hɛ kɛ fɔ Yehowa nɔ ɔ, e maa ye bua mo konɛ o kɛ kã nɛ fiɛɛ be fɛɛ be.

E YA NƆ NƐ E NÁ JUƐMI NƐ DA

15. Mɛni tsɔɔ kaa Yesu ná juɛmi nɛ da ngɛ fiɛɛmi ní tsumi ɔ he?

¹⁵ Yesu ná nɔ mi mami kaa ni komɛ maa bu sane kpakpa a nɛ e ngɛ fiɛɛe ɔ tue. Enɛ ɔ ye bua lɛ nɛ e kɛ gɛjɛmi tsu e sɔmɔmi ní tsumi ɔ. Kaa nɔ hyɛmi nɔ́ ɔ, kɛ yaa jeha 30 ɔ nyagbe ɔ, Yesu na kaa nihi babauu pee klaalo kaa a maa bu sane kpakpa a tue. Enɛ ɔ he ɔ, e ngɔ mɛ kɛ to ngmɔ nɛ e ba ní nɛ e sa kaa a kpa a he. (Yoh. 4:35) Maa pee jeha kake se ɔ, e de e kaseli ɔmɛ ke: “Ní nɛ a ma kpa a hiɛ.” (Mat. 9:​37, 38) Pee se hu ɔ, e ma nɔ mi kɛ ha mɛ ke: “Ní nɛ a ma kpa a hiɛ . . . Nyɛ kpa Ngmɔtsɛ ɔ pɛɛ konɛ e wo ní tsuli blɔ nɛ a ba kpa ní ha lɛ.” (Luka 10:2) Yesu ya nɔ nɛ e ná hɛnɔkami kaa nihi maa bu sane kpakpa a tue, nɛ benɛ a pee jã a, e bua jɔ wawɛɛ.—Luka 10:21.

16. Mɛni blɔ nɔ nɛ nɔ́ he tomi ní nɛ Yesu kɛ tsu ní ɔ haa nɛ wa naa kaa e sa nɛ wa ná juɛmi nɛ da ngɛ fiɛɛmi ní tsumi ɔ he? (Luka 13:​18-21) (Hyɛ foni ɔ hulɔ.)

¹⁶ Yesu tsɔɔ e kaseli ɔmɛ kaa a ya nɔ nɛ a ná juɛmi nɛ da ngɛ sɛ gbi nɛ a ngɛ fiɛɛe ɔ he, nɛ lɔ ɔ maa ye bua mɛ konɛ kã nɛ a ngɛ ɔ nya nɛ ko ba si. Kaa nɔ hyɛmi nɔ́ ɔ, mo susu nɔ́ he tomi níhi enyɔ nɛ Yesu kɛ tsu ní ɔ he nɛ o hyɛ. (Kane Luka 13:​18-21.) Ngɛ nɔ́ he tomi nɔ́ kake ɔ mi ɔ, Yesu ngɔ Matsɛ Yemi sɛ gbi ɔ kɛ to sinapi wu nyafii ko nɛ e wa nɛ e ba pee tso ngua a he. Enɛ ɔ tsɔɔ kaa nihi babauu maa kplɛɛ sane kpakpa a nɔ nɛ nɔ́ ko nɔ́ ko be nyɛe maa tsi nya nɛ e ko wa. Ngɛ nɔ́ he tomi nɔ́ kpa a mi ɔ, e ngɔ Matsɛ Yemi sɛ gbi ɔ kɛ to masa he. E pee jã ejakaa sɛ gbi ɔ nɛ a maa fiɛɛ ngɛ je kɛ wɛ ɔ ma ná nihi a nɔ he wami nɛ a maa pee tsakemihi, nɛ eko ɔ, wa be tsakemi nɛ ɔmɛ nae oya nɔuu. Enɛ ɔ he ɔ, Yesu ye bua e kaseli ɔmɛ nɛ a na kaa sɛ gbi nɛ a ngɛ fiɛɛe ɔ maa ye bua nihi fuu ngɛ a si himi mi.

17. Mɛni he je nɛ e sa nɛ waa ya nɔ nɛ wa ná juɛmi nɛ da ngɛ fiɛɛmi ní tsumi ɔ he ɔ?

¹⁷ Ke wa susu bɔ nɛ fiɛɛmi ní tsumi ɔ ngɛ yiblii woe ha mwɔnɛ ɔ ngɛ je kɛ wɛ ɔ he ɔ, lɔ ɔ maa ye bua wɔ nɛ waa ya nɔ nɛ waa kɛ kã nɛ fiɛɛ. Daa jeha a, nihi ayɔhi abɔ nɛ a bua jɔ sane kpakpa a he ɔ baa Kaimi ɔ, nɛ a kplɛɛɔ nɔ kaa a maa kase Baiblo ɔ hulɔ. Nihi akpe lafahi abɔ hu haa nɛ a baptisiɔ mɛ nɛ a ba piɛɛɔ wa he kɛ fiɛɛɔ sane kpakpa a. Ngɛ anɔkuale mi ɔ, wa li nihi abɔ nɛ a maa bu sɛ gbi ɔ nɛ wa ngɛ fiɛɛe ɔ tue, se kɛ̃ ɔ, wa le kaa Yehowa ngɛ asafo kuu ngua ko nɛ a maa po amanehlu ngua a nya buae. (Kpoj. 7:​9, 14) Yehowa nɛ ji ní kpami Nyɔmtsɛ ɔ ngɛ nɔ mi mami kaa nihi fuu maa kplɛɛ sane kpakpa a nɔ. Enɛ ɔ he ɔ, wa maa ya nɔ maa fiɛɛ.

18. Mɛni nɛ wa suɔ nɛ nihi nɛ a yɔse ngɛ wa he?

¹⁸ Yesu se nyɛli anɔkualetsɛmɛ ɔmɛ kɛ kã fiɛɛɔ be fɛɛ be. Kaa nɔ hyɛmi nɔ́ ɔ, benɛ ni ɔmɛ na kã kɛ gɛjɛmi nɛ bɔfo ɔmɛ kɛ fiɛɛ ɔ, a nya kpɛ a he wawɛɛ, nɛ a “kɔ se kaa a kɛ Yesu lɛ hi si.” (Níts. 4:13) Enɛ ɔ he ɔ, wɔ hu wa suɔ nɛ waa kɛ bua jɔmi kɛ kã nɛ fiɛɛ konɛ nihi nɛ a na kaa wa ngɛ Yesu nɔ hyɛmi nɔ́ ɔ kasee.