Mɛni Ji Nɔ́ Nɛ Nihi Kaseɔ Kɛ Jeɔ O Ngɔ?
1. Mɛni ji nɔ́ nɛ Yesu kaseli ɔmɛ kase kɛ je Yesu ngɔ?
1 Yesu de ke: “Nyɛɛ ngɔ ye kuɛpã tso ɔ ngɔ tloo, nɛ nyɛɛ kase mi.” (Mat. 11:29) E ngɛ heii kaa pi Yesu nya mi munyu kɛkɛ nɛ e kɛ tsɔɔ nihi ní, se e pee nɔ hyɛmi nɔ́ kpakpa hu kɛ tsɔɔ mɛ. Mo susu níhi nɛ kaseli ɔmɛ kase kɛ je Yesu ngɔ ɔ he nɛ o hyɛ. E ngɛ kpoo, e mi mi jɔ, nɛ e ngɛ suɔmi. (Mat. 8:1-3; Mar. 6:30-34) E baa e he si kɛ jee e tsui mi. (Yoh. 13:2-5) Benɛ kaseli ɔmɛ piɛɛ Yesu he kɛ tsu sɔmɔmi nítsumi ɔ, a na kaa e ji nɔ ko nɛ e hɛ mi wa kɛ nítsumi, nɛ e tsɔɔ nihi anɔkuale ɔ kɛ pi si. (Luka 8:1; 21:37, 38) Ke nihi na wɔ nɛ wa ngɛ sɔmɔmi nítsumi ɔ tsue ɔ, mɛni a kaseɔ kɛ jeɔ wa ngɔ?
2. Mɛni wa he dlami kɛ jemiba kpakpa kpo nɛ wa jeɔ ɔ tsuɔ ngɛ wa sɔmɔmi nítsumi ɔ mi?
2 Nihi Nɛ Wa Fiɛɛɔ Kɛ Haa Mɛ ɔ: Wa he nɛ wa dlaa bɔnɛ sa, jemiba kpakpa kpo nɛ wa jeɔ, kɛ nihi a he bua jɔmi nɛ wa náa a nyɛɔ haa nɛ nihi náa wa munyu ɔ he bua jɔmi wawɛɛ. (2 Kor. 6:3; Fil. 1:27) A yɔseɔ kaa waa kɛ Baiblo ɔ pɔɔ nítsumi. Ni komɛ hu ngɛ nɛ ke a ngɛ munyu tue nɛ wa je bumi kpo ha mɛ nɛ wa bu mɛ tue ɔ, a náa bua jɔmi. Moo pee nɔ hyɛmi nɔ́ kpakpa ngɛ blɔ nɛ ɔmɛ a nɔ nɛ lɔɔ ma ha nɛ nihi maa bu Matsɛ Yemi sɛgbi ɔ tue.
3. Mɛni su kpakpahi lɛ wa nyɛmimɛ ɔmɛ ma nyɛ maa kase kɛ je wa ngɔ?
3 Wa Nyɛmimɛ Ɔmɛ: Jehanɛ se hu ɔ, mo susu ní kpakpahi nɛ wa nyɛmimɛ ma nyɛ maa kase kɛ je wa ngɔ ɔ he nɛ o hyɛ. Ke waa kɛ kã tsuɔ sɔmɔmi nítsumi ɔ, lɔɔ ma nyɛ maa wo nihi he wami nɛ mɛ hu a pee jã. Kaa bɔnɛ dade duɔɔ dade nya a, jã kɛ̃ nɛ ke wa dla wa he nɛ wa tu munyu saminya ngɛ fiɛɛmi nítsumi ɔ mi ɔ, lɔɔ ma nyɛ maa wo nihi he wami konɛ a ya a hɛ mi ngɛ fiɛɛmi nítsumi ɔ mi. (Abɛ 27:17) Ke wa bɔɔ mɔde nɛ wa ngmaa nihi nɛ a bua jɔ munyu ɔ he ɔ a biɛhi nɛ wa kpaleɔ wa se kɛ ya slaa mɛ mla a, lɔɔ maa wo wa nyɛmimɛ ɔmɛ he wami nɛ mɛ hu a pee jã. Ke wa pee wa he Mawu sɔmɔli kpakpahi ɔ, lɔɔ ma ha nɛ wa nyɛmimɛ ɔmɛ hu maa kase nɛ a maa pee a he sɔmɔli kpakpahi.—2 Tim. 4:5.
4. Mɛni heje nɛ e sa kaa wa hɛ nɛ e hi nɔ hyɛmi nɔ́ nɛ wa peeɔ ɔ he?
4 Mo ha nɛ o hɛ nɛ e hi níhi nɛ o peeɔ, kɛ munyuhi nɛ o tuɔ, kɛ bɔnɛ nɔ hyɛmi nɔ́ nɛ o peeɔ saa nihi a he ha a he? Nɔ hyɛmi nɔ́ kpakpa nɛ wa maa pee ɔ maa sa Yehowa hɛ mi nɛ lɔɔ ma ha nɛ wɔ hu wa ma de kaa bɔnɛ bɔfo Paulo de ɔ; e ke: “Nyɛɛ ngɔ mi ngɔ pee nɔ hyɛmi nɔ́ kaa bɔnɛ imi hu i ngɔ Kristo ngɔ pee ye nɔ hyɛmi nɔ́ ɔ.”—1 Kor. 11:1.