Wa He Nɛ Maa Be Ngɛ Fiɛɛmi Ní Tsumi ɔ Mi—Ni Hehi Nɛ Wa Ma Tsɔse Mɛ
Nɔ́ He Je Nɛ E He Hia: E sa nɛ nihi nɛ a ba pee Yesu kaseli kɛ we ɔ nɛ a kase bɔ nɛ a maa ye “níhi tsuo” nɛ Yesu fa ke waa pee ɔ nɔ. Fami nɛ ɔ eko ji anɔkuale ɔ nɛ a maa tsɔɔ nihi. (Mat. 28:19, 20) Kaseli ehe komɛ ngma a biɛ ngɛ Teokrase Sɔmɔmi Sukuu ɔ mi, nɛ a ye a weku li, kɛ a huɛmɛ odase. Se ke anɔkuale ɔ ngɛ a tsui mi sɛɛe, nɛ a ná le kaa Yehowa suɔ kaa nihi tsuo nɛ a le anɔkuale ɔ, a bua jɔɔ he kaa mɛ hu a maa ya fiɛɛmi. (Rom. 10:13, 14) Ke a kplɛɛ kaselɔ ko nɔ kaa fiɛɛlɔ nɛ a baptisii we lɛ ɔ, e sa nɛ a tsɔse lɛ konɛ e ná kã kɛ je fiɛɛmi ní tsumi ɔ sisi.—Luka 6:40.
Moo Ka Enɛ ɔ Ngɛ Nyɔhiɔ ɔ Mi:
O kɛ fiɛɛlɔ ehe nɛ o ngɛ lɛ tsɔsee ɔ nɛ bla kɛ ya fiɛɛ ngɛ wehi a mi, nɛ o kɛ lɛ nɛ ya slaa nihi nɛ a ná munyu ɔ he bua jɔmi, aloo o Baiblo mi ní kaseli. Ke o Baiblo kaselɔ ko ji fiɛɛmi sisi lolo ɔ, lɛɛ moo ngɔ fiɛɛlɔ ko nɛ e be níhi a si kpami tsɔ kɛ piɛɛ o he kɛ ya fiɛɛmi nɛ o ye bua lɛ.