Anɛ O Maa Je Baiblo Mi Nikasemi Peemi Sisi Ngɛ October Nyɔhiɔ ɔ Nɔ Lo?
1. Mɛni womi lɛ waa kɛ ma ha ngɛ October nyɔhiɔ ɔ nɔ?
1 Womi nɛ waa kɛ ma ha ngɛ October nyɔhiɔ ɔ nɔ ɔ ji, Watchtower kɛ Awake! womi tɛtlɛɛ ɔmɛ. Bɔnɛ pee nɛ waa ye bua nihi nɛ a ná munyu ɔ he bua jɔmi ɔ, a ngɛ wɔ he wami woe nɛ wa ha mɛ dɛ womi nɛ ji, Anɛ O Suɔ Kaa O Le Anɔkuale ɔ Lo? ɔ konɛ waa bɔ mɔde nɛ waa kɛ mɛ nɛ je Baiblo mi nikasemi sisi. Mɛni blɔ nɔ wa maa gu kɛ pee enɛ ɔ ke wa kpale kɛ ya slaa mɛ?
2. Mɛni blɔ nɔ wa maa gu kɛ ngɔ dɛ womi nɛ ji Anɛ O Suɔ Kaa O Le Anɔkuale ɔ Lo? ɔ kɛ je Baiblo mi nikasemi sisi ke wa kpale kɛ ya slaa nɔ ko nɛ e ngɔ womi tɛtlɛɛ ɔmɛ eko?
2 Bɔnɛ Waa Kɛ Dɛ Womi ɔ Ma Tsu Ní Ha: Wa ma nyɛ ma de ke: “Womi tɛtlɛɛ ɔmɛ nɛ i kɛ ha mo ɔ woɔ nihi nɛ a je ma slɔɔtohi a mi kɛ nihi nɛ a ngɛ jami slɔɔtohi a mi ɔ he wami konɛ a kase Baiblo ɔ. [Ngɔɔ dɛ womi nɛ ji Anɛ O Suɔ Kaa O Le Anɔkuale ɔ Lo? ɔ kɛ ha wetsɛ ɔ, nɛ o ngɔ sane bimihi nɛ a ngɛ womi ɔ hɛ mi ɔ kɛ tsɔɔ lɛ.] Hyɛ sane bimi komɛ nɛ Baiblo ɔ ha heto nɛ haa nɛ nɔ tsui nɔɔ nɔ mi. Anɛ o bi sane nɛ ɔmɛ eko hyɛ lo?” Ke wetsɛ ɔ ha heto ɔ, waa kɛ lɛ nɛ susu e sane bimi ɔmɛ a kpɛti kake heto he ngɛ dɛ womi ɔ mi nɛ waa kane ngmamihi nɛ a tsɛ se ɔ a kpɛti kake. Lɔɔ se ɔ, wa de lɛ ke, níhi nɛ Baiblo ɔ tsɔɔ ɔ a kpɛti kake pɛ ji nɛ ɔ nɛ, konɛ wa ha lɛ Baiblo Tsɔɔmi womi ɔ. Lɔɔ se ɔ, waa kɛ lɛ ma nyɛ ma susu yi nɛ e hla ngɛ womi ɔ mi ɔ kekleekle kuku ɔmɛ a he. Aloo wa ma bli womi ɔ kɛ ya yi nɛ tu munyu nɛ waa kɛ lɛ sɛsɛ he ngɛ dɛ womi ɔ mi ɔ mi. Sane bimi komɛ kɛ he nɛ a je kpo ngɛ ngɛ womi ɔ mi ɔ lɛ nyɛɛ se ɔ nɛ:
● Anɛ Mawu susuɔ wa he niinɛ lo? (bf. 9-11, kk. 6-10)
● Anɛ ta kɛ nɔ́ nami se maa po ligbi ko lo? (bf. 12, kk. 12-13)
● Ke nɔmlɔ gbo ɔ, jije e yaa? (bf. 59-60, kk. 7-8)
● Anɛ hɛ kɛ nɔ fɔmi ko ngɛ ha ni gbogboe ɔmɛ lo? (bf. 71, kk. 13-15)
● Kɛ ma plɛ kɛ sɔle konɛ Mawu nɛ bu mi tue kɛɛ? (bf. 166-167, kk. 5-8)
● Kɛ ma pee kɛ ná bua jɔmi ngɛ si himi mi kɛɛ? (bf. 9, kk. 4-5)
3. Kɛ wa ma plɛ kɛ tsake blɔ nɔ nɛ wa maa gu konɛ waa kɛ nihi nɛ je Baiblo mi nikasemi sisi ɔ mi ha kɛɛ?
3 Ngɛ anɔkuale mi ɔ, ke nɔ ko nɛ wa kpale kɛ ya slaa lɛ kekleekle ɔ si fɔfɔɛ ngmɛ́ wɔ blɔ kaa waa ngɔ Baiblo Tsɔɔmi womi ɔ kɛ tsɔɔ lɛ bɔnɛ wa plɛɔ nɛ waa kɛ nihi kaseɔ Baiblo ɔ ha a, wa ma nyɛ maa ya nɔ ma ya hi lɛ slaae konɛ waa kɛ lɛ nɛ tsa ní sɛɛmi ɔ nɔ. E ngɛ bɔnɛ nɔ ɔ ma je bua jɔmi kpo ha nɛ́ lɔɔ ma ha nɛ eko ɔ, waa kɛ lɛ ma susu sane bimi nɛ hiɛ pe kake he ngɛ dɛ womi ɔ mi ngɛ be slɔɔtohi nɛ wa ma ya slaa lɛ ɔ mi loko wa ma je Baiblo Tsɔɔmi womi ɔ kpo kɛ tsɔɔ lɛ. Nyɛ ha nɛ waa ngɔ dɛ womi nɛ ɔ nɛ se nami ngɛ he ɔ kɛ tsu ní ngɛ October nyɔhiɔ ɔ nɔ kɛ je Baiblo mi nikasemi sisi konɛ wa kɛ ye bua nihi nɛ a hɛɛ tsui kpakpa a nɛ a ba “le anɔkuale ɔ.”—Yoh. 8:31, 32.