Nyɛ Ha Nɛ Waa Tsɔɔ Kaa Wa Ngɛ Hɛsa Wa Maa Ye Kaimi ɔ Ngɛ April 17 ɔ Nɔ
1. Mɛni he numi nɛ́ la polɔ ɔ ná lɛ e sa kaa wa je kpo ngɛ Kaimi ɔ Yemi be ɔ mi?
1 Mɔbɔ nami nɛ Yehowa je kpo kɛ tsɔɔ la polɔ ɔ si abɔ nɛ e kpɔ lɛ ɔ ha nɛ e kɛ hɛsa bi ke: ‘Mɛni ma kɛ na Yehowa si ngɛ kpakpa tsuo nɛ e pee mi ɔ he?’ (La 116:12) Mwɔnɛ ɔ, Mawu sɔmɔli ngɛ yi mi tomi babauu nɛ a maa da nɔ nɛ a kɛ na Mawu si. Benɛ Yehowa ha nɛ a ngma munyu nɛ ɔ jeha lafahi abɔ se ɔ, e ha adesa nike ní nɛ pe kulaa nɛ ji kpɔmi nɔ́ ɔ. Be mi nɛ wa ngɛ wa he dlae konɛ wa kai Kristo gbenɔ ɔ ngɛ April 17 ɔ nɔ ɔ, wa ngɛ yi mi tomi kpakpahi a nɔ nɛ wa maa da kɛ na Mawu si.—Kol. 3:15.
2. Mɛni ji yi mi tomi komɛ a heje nɛ wa bua jɔ kpɔmi nɔ́ ɔ he?
2 Jɔɔmihi Nɛ Wa Náa Ngɛ Kpɔmi Nɔ́ ɔ He: Kɛ gu kpɔmi nɔ́ ɔ nɔ ɔ, wa ma nyɛ ma ná ‘yayami pami.’ (Kol. 1:13, 14) Enɛ ɔ yeɔ bua wɔ nɛ waa kɛ he nile kpakpa sɔmɔɔ Yehowa. (Heb. 9:13, 14) Waa kɛ Yehowa ma nyɛ maa tu munyu faa be mi nɛ wa ngɛ sɔlee. (Heb. 4:14-16) Nihi nɛ a náa hemi kɛ yemi ngɛ kpɔmi nɔ́ ɔ mi ɔ ngɛ hɛ kɛ nɔ fɔmi nitsɛ kaa a ma ná neneene wami!—Yoh. 3:16.
3. Mɛni blɔ nɔ wa ma nyɛ maa gu kɛ na Yehowa si ngɛ kpɔmi nɔ́ ɔ he?
3 Blɔhi A Nɔ Nɛ Wa Maa Gu Kɛ Tsɔɔ Kaa Wa Ngɛ Hɛsa: Blɔ kake nɛ wa maa gu nɔ nɛ waa tsɔɔ kaa wa ngɛ hɛsa ji kaa wa maa kane Kaimi ɔ Yemi he ngmami ɔmɛ daa ligbi nɛ waa susu he. A to munyu nɛ e yi ji “Are You Prepared for the Most Important Day of the Year?” (Anɛ O Dla O He Kɛ Ha Ligbi Nɛ He Hia Pe Kulaa Ngɛ Jeha a Mi Lo?) nɛ e je kpo ngɛ February 1, 2011, Watchtower mi ɔ he blɔ nya konɛ e ye bua wɔ nɛ waa pee jã. Wa ma nyɛ maa sɔle kɛ je wa tsui mi nɛ wa de Yehowa bɔnɛ kpɔmi nɔ́ ɔ he jua wa ha wɔ ha hulɔ. (1 Tes. 5:17, 18) Ke wa bu Yesu fami ɔ tue nɛ wa ya Kaimi ɔ, wa tsɔɔ kaa wa ngɛ hɛsa. (1 Kor. 11:24, 25) Jehanɛ se hu ɔ, wa ma nyɛ maa kase suɔmi agbo nɛ Yehowa je kpo ɔ konɛ waa fɔ nihi fuu nine nɛ a ba piɛɛ wa he kɛ ye Kaimi ɔ.—Yes. 55:1-3.
4. Mɛni ji yi mi kpɔ nɛ e sa kaa waa mwɔ?
4 Yehowa sɔmɔli nɛ a jeɔ hɛsa kpo ɔ be Kaimi ɔ Yemi ɔ bue kaa kpe ko kɛkɛ. E ji kpe nɛ he hia pe kulaa ngɛ jeha a mi! Be mi nɛ Kaimi ɔ Yemi ɔ ngɛ sue nɛ ɔ, nyɛ ha nɛ waa mwɔ wa yi mi kpɔ kaa la polɔ ɔ. E ngma ke: ‘Ma je Yehowa yi! Ní kpakpahi nɛ e peeɔ ha mi ɔ, ye hɛ be nɔ jee gblegbleegble.’—La 103:2.