“Nyɛɛ Pee Enɛ ɔ” Wa Maa Ye Kaimi ɔ Ngɛ April 5 ɔ Nɔ
1. Mɛni heje nɛ e he hia kaa waa ye Kaimi ɔ?
1 “Nyɛɛ pee enɛ ɔ nɛ nyɛ kɛ kai mi.” (Luka 22:19) Yesu tu munyu nɛ ɔ kɛ fã e kaseli ɔmɛ konɛ a kai e we afɔle sami gbenɔ ɔ. Ke wa hyɛ nɔ́ nɛ kpɔmi nɔ́ ɔ tsu ɔ, e sɛ nɛ ligbi ko he nɛ hia Kristofoli wawɛɛ pe ligbi nɛ a kɛ yeɔ Kaimi ɔ daa jeha a. Benɛ e piɛ bɔɔ nɛ wa maa ye jeha nɛ ɔ Kaimi ɔ ngɛ April 5 nɔ ɔ, mɛni wa ma nyɛ maa pee kɛ na Yehowa si?—Kol. 3:15.
2. Mɛni blɔ nɔ ní nɛ wa maa kase kɛ wa yi mi tɛ nɛ wa ma pue ɔ maa tsɔɔ kaa wa bua jɔ Kaimi ɔ he ngɛ?
2 Mo Dla O He: Behi fuu ɔ, wa dlaa wa he loko wa peeɔ níhi nɛ a he hia. Waa kɛ wa weku mi bimɛ ma nyɛ ma dla wa tsui kɛ ha Kaimi ɔ yemi kɛ gu níhi nɛ ya nɔ ngɛ Yesu nyagbe si himi mi ngɛ zugba a nɔ ɔ nɛ wa maa kase nɛ wa ma pue wa yi mi tɛ ngɛ he ɔ nɔ. (Ezra 7:10) A ngma ngmamihi bɔɔ ko nɛ kɔɔ níhi nɛ ya nɔ ngɛ Yesu nyagbe si himi mi ngɛ zugba a nɔ ɔ he ngɛ calendar a kɛ Examining the Scriptures Daily womiyo ɔ mi, nɛ o maa na ngmamihi tsuo nɛ kɔɔ e nyagbe si himi ɔ he ɔ ngɛ Greatest Man womi ɔ bafa 23-24, kɛ February 1, 2011, Watchtower a mi.
3. Mɛni blɔ nɔ ngmlɛfia fuu nɛ waa kɛ maa fiɛɛ ɔ maa tsɔɔ kaa wa bua jɔ Kaimi ɔ he ngɛ?
3 Moo Fiɛɛ: Wa ma nyɛ maa tsɔɔ hu kaa wa bua jɔ Kaimi ɔ he kɛ gu fiɛɛmi nɛ wa maa fiɛɛ wawɛɛ ɔ nɔ. (Luka 6:45) Kɛ je Hɔ, March 17 ɔ nɔ kɛ yaa a, wa ma bɔni Kaimi ɔ yemi he nine fɔmi womi ɔ gbami kɛ ha nihi ngɛ je kɛ wɛ. Anɛ o ma nyɛ maa to o níhi a he blɔ nya konɛ o kɛ ngmlɛfia fuu nɛ fiɛɛ, eko ɔ, nɛ o sɔmɔ kaa blɔ gbali a walɔ lo? Mɛni heje nɛ o kɛ o weku ɔ nyɛ susuu we he ngɛ nyɛ gbɔkuɛ Weku Mawu Jami nɛ nyɛ maa pee ɔ mi?
4. Mɛni se wa ma nyɛ ma ná ngɛ Kaimi ɔ nɛ wa maa ye ɔ he?
4 Wa náa Kaimi ɔ nɛ wa yeɔ daa jeha a he se nitsɛnitsɛ! Ke wa susu mi mi himi nɛ Yehowa je kpo kɛ tsɔɔ wɔ nɛ e ngɔ e Bi kake ɔ kɛ ha kaa kpɔmi nɔ́ ɔ he ɔ, lɔɔ haa nɛ bua jɔmi kɛ suɔmi nɛ wa ngɛ kɛ ha Mawu ɔ mi waa. (Yoh. 3:16; 1 Yoh. 4:9, 10) Enɛ ɔ woɔ wɔ he wami nɛ wa pee we wɔ nitsɛmɛ wa suɔmi nya ní. (2 Kor. 5:14, 15) Jehanɛ se hu ɔ, lɔɔ woɔ wɔ gɛjɛmi nɛ wa jeɔ Yehowa yi ngɛ nihi a hɛ mi. (La 102:19-21) Ngɛ anɔkuale mi ɔ, Yehowa sɔmɔli nɛ a bua jɔ kpɔmi nɔ́ ɔ he ɔ kɛ bua jɔmi ngɛ Kaimi ɔ yemi be nɛ ji, April 5 ɔ blɔ hyɛe konɛ a ‘fiɛɛ Nyɔmtsɛ ɔ gbenɔ ɔ he sane ɔ.’—1 Kor. 11:26.