Wa Maa Je Kaimi ɔ Yemi Nine Fɔmi Womi ɔ Gbami Sisi Kɛ Je April 2 ɔ Nɔ
1. Jeha nɛ ɔ, mɛni be nɛ wa ma gba Kaimi ɔ Yemi ɔ he nine fɔmi womi ɔ, nɛ mɛni ji se nami nɛ ngɛ nine fɔmi womi ɔ nɛ wa gbaa daa jeha a he?
1 Kɛ je April 2 ɔ nɔ kɛ ya si April 17 ɔ nɔ ɔ, wa ma gba Kristo gbenɔ ɔ Kaimi ɔ Yemi ɔ nɛ ji gbijlɔ nɛ he hia pe kulaa ngɛ jeha a mi ɔ he nine fɔmi womi ɔ. Ngɛ be nɛ be ɔmɛ a mi ɔ, nihi fuu nɛ a ngɛ munyu ɔ he bua jɔmi ɔ kplɛɛ daa jeha nine fɔmi nɛ ɔ nɔ. Kaa nɔ hyɛmi nɔ́ ɔ, ngɛ Kaimi ɔ Yemi ligbi ko nɔ ɔ, yo ko tsɛ asafo ɔ nítsumi he kɔni ɔ nɛ e de ke: “Piɔ pɛ nɛ i ba we mi, nɛ i na nine fɔmi womi ko ngɛ ye sinya a sisi. I suɔ kaa ma ya, se i li be nɛ a maa pee.” Nyɛminyumu ɔ tsɔɔ yo ɔ he nɛ e maa na be ɔ ngɛ ɔ ngɛ nine fɔmi womi ɔ nɔ. Yo ɔ kɛ ní sɛɛmi ɔ ba nyagbe ke, “Gbɔkuɛ nɛ ɔ, ma ya nyɛ ní peemi ɔ sisi!”
2. Ke waa kɛ nine fɔmi womi ɔ ma ha nɔ ko ɔ, mɛni wa ma nyɛ ma de?
2 Bɔnɛ Wa Ma Tsu He Ní Ha: Akɛnɛ be bɔɔ pɛ nɛ wa ngɛ nɛ waa kɛ ma gba nine fɔmi womi ɔ ngɛ zugba kpɔ ɔ mi heje ɔ, e maa hi wawɛɛ kaa wa maa po munyu ɔ kpiti. Wa ma nyɛ ma de ke: “Kɛ ji lɛ kɛɛ. Wa suɔ kaa waa fɔ o kɛ o weku ɔ nine kɛ ba gbijlɔ yemi ko nɛ he hia nɛ a maa ye ngɛ je ɔ mi tsuo ngɛ Hɔgba, April 17 ɔ nɔ ɔ sisi. [Ngɔɔ nine fɔmi womi ɔ kɛ ha wetsɛ ɔ.] Be nɛ ɔ ji be nɛ waa kɛ ma kai Yesu gbenɔ ɔ nɛ. A maa tu munyu ko nɛ maa tsɔɔ wɔ nɔ́ nɛ wa maa pee konɛ wa ná Kristo kpɔmi nɔ́ ɔ he se ɔ kɛ tsɔɔ wɔ nɛ a be nɔ́ ko hee. A tsɔɔ he nɛ a maa pee ngɛ kɛ be nɛ a kɛ maa pee ɔ ngɛ nine fɔmi womi ɔ nɔ.”
3. Mɛni blɔ nɔ wa ma nyɛ maa gu kɛ fɔ nihi babauu nine?
3 Ke zugba kpɔ nɛ nyɛ asafo ɔ fiɛɛɔ ngɛ mi ɔ kle ɔ, asafo mi nikɔtɔma amɛ ma nyɛ ma de nyɛ konɛ nyɛ si womi ɔ eko ngɛ nihi nɛ be we mi ɔ a sinyahi a nya nɛ nɔ ko kó na. Nyɛɛ bɔ mɔde nɛ nyɛɛ fɔ nihi nɛ nyɛ ya slaa mɛ, nyɛ wekuli, nihi nɛ nyɛɛ kɛ mɛ tsuɔ ní, nihi nɛ nyɛɛ kɛ mɛ yaa sukuu, kɛ ni kpahi nɛ nyɛ le mɛ ɔ nine. Ke nyɛ ngɛ nine fɔmi womi ɔ gbae ngɛ Hɔ kɛ Hɔgba a, nyɛ gba womi tɛtlɛɛ ɔmɛ kɛ piɛɛ he be tsuaa be nɛ jã peemi maa hi. Anɛ o ma nyɛ maa ngɔ o he kɛ wo blɔ gbali a wami nítsumi ɔ mi ngɛ April bɔnɛ pee nɛ o tsu nítsumi nɛ haa nɔ bua jɔmi nɛ ɔ babauu lo?
4. Mɛni heje nɛ wa suɔ kaa nihi nɛ a ngɛ munyu ɔ he bua jɔmi ɔ nɛ a ba Kaimi ɔ Yemi ɔ?
4 Nihi nɛ a ngɛ munyu ɔ he bua jɔmi nɛ a maa ba Kaimi ɔ Yemi ɔ ma ba le níhi fuu nitsɛ! A maa nu suɔmi agbo nɛ Yehowa je kpo kɛ gu kpɔmi nɔ́ ɔ nɛ e kɛ ha a nɔ ɔ he munyu. (Yoh. 3:16) A maa kase níhi nɛ Mawu Matsɛ Yemi ɔ ma ba pee ha adesahi. (Yes. 65:21-23) Jehanɛ se hu ɔ, a ma de mɛ konɛ a su nibwɔhi a kpeeli ɔmɛ a he konɛ a bi nɛ a kɛ mɛ nɛ ba kase Baiblo ɔ konɛ a le babauu. Wa ngɛ sɔlee konɛ tsui kpakpatsɛmɛ fuu nɛ a kplɛɛ nine fɔmi ɔ nɔ konɛ a ba piɛɛ wa he kɛ ye Kaimi ɔ!