Wa Maa Je Kaimi ɔ Yemi He Nine Fɔmi Womi ɔ Gbami Sisi Kɛ Je March 1
1. Mɛni be wa maa je Kaimi ɔ yemi he nine fɔmi womi ɔ gbami sisi, nɛ mɛni heje nɛ waa kɛ be gagaa ma gba womi ɔ jeha nɛ ɔ?
1 Ngɛ Soha, March 1 ɔ, wa ma bɔni nine fɔmi womi nɛ wa gbaa daa jeha kɛ fɔɔ nihi nine konɛ a ba piɛɛ wa he kɛ ye Kaimi ɔ gbami. Wa maa ye Kaimi ɔ ngɛ March 26, nɛ tsɔɔ kaa waa kɛ be gagaa ma gba nine fɔmi womi ɔ pe jehahi nɛ a be ɔ. Enɛ ɔ ma ha nɛ nihi fuu a nine maa su nine fɔmi ɔ nɔ, titli ɔ, ke a ngɛ hehi nɛ asafo ɔ zugba kpɔ kle ngɛ ɔ.
2. Mɛni ji blɔ nɔ tomi kɛ ha nine fɔmi womi ɔ ngɔmi kɛ zugba kpɔ ɔ mi ní tsumi?
2 Blɔ Nɔ Tomi Ngɛ He: Asafo mi nikɔtɔma amɛ maa tsɔɔ bɔnɛ a ma tsu zugba kpɔ ɔ mi ní ha, nɛ a maa de keji wa ma si nine fɔmi womi ɔ ngɛ nihi nɛ a be we mi ɔ a sinyahi a nya loo wa be sie. Ke wa tsu wehi a mi fiɛɛmi ɔ ngɛ zugba kpɔ ɔ mi ɔ tã nɛ nine fɔmi womi ɔ eko piɛ ɔ, wa ma nyɛ ma ha be mi nɛ wa ngɛ fiɛɛe ngɛ ma nɔ ɔ. Sɔmɔmi nitsumi nɔ hyɛlɔ maa hyɛ konɛ a ngɔ nine fɔmi womi ɔ nɛ a ngma nɔ ní ɔ kɛ pue womi ngɔmi he ɔ konɛ fiɛɛli ya ngɔ, se a kɛ nine fɔmi womi ɔ tsuo be si pue si kake. E sa nɛ waa ngɔ nɔ́ nɛ waa kɛ ma ha ngɛ otsi ɔ mi ɔ pɛ.
3. Mɛni lɛ e sa kaa e hi wa juɛmi mi be mi nɛ wa ngɛ nine fɔmi womi ɔ gbae ɔ?
3 Mɛni Wa Ma De? E maa hi wawɛɛ kaa wa maa po munyu ɔ kpiti konɛ wa nyɛ nɛ waa fɔ nihi babauu nine. Wa ma nyɛ maa plɛ fiɛɛmi munyu ngɛ bafa 4 ɔ mi konɛ e kɔ nihi ngɛ wa zugba kpɔ ɔ mi ɔ a he. Se wa ko ye esɔ kɛ je wetsɛ ko he ke e je huɛ bɔmi su kpo loo e bi wɔ sanehi ɔ. Ke wa ngɛ nine fɔmi womi ɔ gbae Hɔ loo Hɔgba a, e sa nɛ wa ha womi tɛtlɛɛ ɔmɛ hu kɛ piɛɛ he ngɛ be nɛ sa mi. Ngɛ March ligbi 2 ɔ nɔ ɔ, wa ma gba nine fɔmi womi ɔ titli mohu pe nɛ wa maa je Baiblo mi nikasemi sisi.
4. Mɛni heje nɛ e sa kaa waa kɛ kã nɛ gba nine fɔmi womi ɔ?
4 Wa ngɛ he kɛ nɔ fɔmi kaa nihi fuu ma ba piɛɛ wa he kɛ ye Kaimi ɔ. Munyu nɛ a maa tu ɔ maa tsɔɔ nɔ tutuutu nɛ Yesu ji. (1 Kor. 11:26) A maa tsɔɔ wɔ bɔnɛ e gbenɔ ɔ yeɔ bua wɔ ha. (Rom. 6:23) Nɛ a ma ha nɛ waa na nɔ́ heje nɛ e he hia kaa wa kai lɛ ɔ. (Yoh. 17:3) Nyɛ ha nɛ waa kɛ kã nɛ gba nine fɔmi womi ɔ!