Anɛ O Sɔmɔ Kaa Daa Blɔ Gbalɔ Hyɛ Lo?
1. Mɛni he blɔ nɛ nihi fuu ná, se mɛni e he ba hia kaa ni komɛ nɛ a pee?
1 Ngɛ jehahi nɛ be ɔ a mi ɔ, nihi akpehi abɔ ngɔ a he kɛ wo be tsuo sɔmɔmi nítsumi ɔ mi nɛ a ‘tsɔɔ nihi ní, nɛ a fiɛɛ sane kpakpa a.’ (Níts. 5:42) Se e he ba hia kaa ni komɛ nɛ a kpa blɔ gbami nítsumi ɔ ngɛ yi mi tomi slɔɔtohi komɛ a heje. Ke o sɔmɔ hyɛ kaa daa blɔ gbalɔ ɔ, anɛ o susu o si himi amlɔ nɛ ɔ he nɛ o na kaa o ma nyɛ ma sɔmɔ ekohu kaa blɔ gbalɔ lo?
2. Mɛni heje nɛ e sa nɛ nihi nɛ a tsu blɔ gbami nítsumi ɔ ngɛ be ko nɛ be ɔ mi ɔ, a susu a si himi amlɔ nɛ ɔ he ɔ?
2 Si Himi Tsakeɔ: Eko ɔ, nɔ́ nɛ ha nɛ o kpa blɔ gbami nítsumi ɔ be hu. Kaa nɔ hyɛmi nɔ́ ɔ, ke o kpa blɔ gbami nítsumi ɔ ngɛ ngmlɛfia 90 nɛ o ná we ngɛ nyɔhiɔ ɔ mi heje ɔ, anɛ o ma nyɛ ma tsu ekohu akɛnɛ a je ngmlɛfia a nɔ kɛ ba 70 ɔ lo? Anɛ be nɛ o kɛ tsuɔ ní loo o weku blɔ nya nítsumi nɔ gbɔ kɛ je be mi nɛ o jɔɔ blɔ gbami nítsumi ɔ tsumi lo? Nyɛmiyo ko nɛ e jɔɔ blɔ gbami nítsumi ɔ tsumi akɛnɛ e be nɔmlɔtso mi he wami kpakpa heje ɔ nyɛ nɛ e tsu ekohu benɛ e ye jeha 89. E yɛ hiɔ tsami he jeha kake kɛ se nɛ lɔɔ heje ɔ, e nu he kaa e ngɛ nɔmlɔtso mi he wami bɔnɛ sa nɛ e ma nyɛ ma tsu blɔ gbami nítsumi ɔ ekohu!
3. Mɛni ji nɔ́ nɛ weku mi bimɛ ma nyɛ maa pee kɛ ye bua weku ɔ mi nɔ ko konɛ e tsu blɔ gbami nítsumi ɔ?
3 Eko ɔ, o tsu we blɔ gbami nítsumi ɔ gblee, se o weku ɔ mi nɔ ko kpa blɔ gbami nítsumi ɔ bɔnɛ pee nɛ e hyɛ weku ɔ mi nɔ ko kaa fɔlɔ nɛ e bwɔ nɔ. (1 Tim. 5:4, 8) Ke jã a, anɛ mo loo ni kpahi nɛ a ngɛ weku ɔ mi ɔ ma nyɛ maa ye bua lo? Mɛni heje nɛ nyɛ pee we kake kɛ susu munyu nɛ ɔ he? (Abɛ 15:22) Ke weku mi bimɛ pee kake bɔnɛ pee nɛ a kpɛti nɔ kake nɛ e nyɛ nɛ e tsu blɔ gbami nítsumi ɔ, mɛ tsuo a ma nyɛ maa nu he kaa a ngɛ a blɔ fami nɔ́ tsue.
4. Nɛ ke o si himi amlɔ nɛ ɔ ngmɛ́ mo blɔ konɛ o kpale tsu blɔ gbami nítsumi ɔ hu nɛɛ?
4 Ke o si himi amlɔ nɛ ɔ be mo blɔ ngmɛe nɛ o tsu blɔ gbami nítsumi ɔ ekohu ɔ, o kɔni mi ko jɔ. Yehowa bua jɔ suɔmi nɛ o ngɛ kaa o ma tsu ɔ he. (2 Kor. 8:12) Amlɔ nɛ ɔ, ngɔɔ he bemi nɛ o ná kaa blɔ gbalɔ ɔ kɛ tsu ní ngɛ o sɔmɔmi nítsumi ɔ mi. Moo sɔle ngɛ nɔ́ nɛ o suɔ kaa o maa pee ɔ he nɛ o pee klaalo kaa o maa da he blɔhi nɛ o maa ná a nɔ kɛ pee tsakemihi ngɛ o si himi mi. (1 Yoh. 5:14) Eko ɔ, e be kɛe nɛ Yehowa ma ‘bli blɔ’ ha mo bɔnɛ pee nɛ o nyɛ nɛ o tsu daa blɔ gbami nítsumi nɛ haa nɔ bua jɔmi ɔ ekohu!—1 Kor. 16:9.