Sane Bimi He

◼ Mɛni be lɛ e sa kaa waa kɛ Baiblo kaselɔ ko nɛ e ngɛ e hɛ mi yae ɔ nɛ kase ní kɛ ya si?

E hi kaa a kɛ Baiblo kaselɔ ko nɛ e ngɛ e hɛ mi yae ɔ maa ya nɔ maa kase ní kɛ ya si benɛ e maa gbe womi enyɔ nya—Mɛni Tutuutu Ji Baiblo ɔ Tsɔɔmi? kɛ “Nyɛɛ To Nyɛ He ngɛ Mawu Suɔmi ɔ Mi.” Ke e gbi womi enyɔ ɔmɛ tsuo a kasemi nya loko a baptisi lɛ po ɔ, e sa kaa a ya nɔ nɛ a kɛ lɛ nɛ kase kɛ ya si benɛ e maa gbe nya. Wa ma nyɛ maa ya nɔ maa bu be nɛ waa kɛ lɛ kaseɔ ní ɔ, wa se nɛ wa kpaleɔ kɛ ya slaa lɛ ɔ, kɛ Baiblo ɔ nɛ waa kɛ lɛ kaseɔ ɔ he akɔtaa keji a baptisi lɛ se po. Ke fiɛɛlɔ ko piɛɛ wa he kɛ ya Baiblo kaselɔ ɔ ngɔ nɛ fiɛɛlɔ ɔ kɛ e he wo nikasemi ɔ mi ɔ, lɛ hu e ma nyɛ maa bu be nɛ waa kɛ Baiblo kaselɔ ɔ kase ní ɔ he akɔtaa.—Hyɛ March 2009 Wa Matsɛ Yemi Sɔmɔmi ɔ, bafa 2.

E he hia nɛ ni hehi nɛ a kplɛɛ anɔkuale ɔ nɔ ɔ a nane nɛ pi si ngɛ anɔkuale ɔ mi saminya loko a kɛ mɛ nɛ jɔɔ nikasemi. E he hia nɛ a “mɛtɛ” Kristo he nɛ a “hemi kɛ yemi mi nɛ wa” konɛ a nyɛ nɛ a da kahi nɛ a kɛ maa kpe ɔ a nya. (Kol. 2:6, 7; 2 Tim. 3:12; 1 Pet. 5:8, 9) Jehanɛ se hu ɔ, loko a ma nyɛ maa tsɔɔ nihi ní nɛ e maa pi si ɔ, ja a “le anɔkuale ɔ” saminya. (1 Tim. 2:4) Ke waa kɛ wa Baiblo kaseli ɔmɛ kase womi enyɔ ɔmɛ ta a, lɔɔ maa tsɔɔ kaa wa ngɛ mɛ ye buae konɛ a nyɛ nɛ a nyɛɛ ‘blɔ nɛ kɛ nɔ yaa wami mi’ ɔ nɔ pɛpɛɛpɛ.—Mat. 7:14.

Loko asafo mi nikɔtɔma amɛ maa kplɛɛ nɔ ko nɔ kaa a baptisi lɛ ɔ, e sa nɛ a hyɛ kaa e nu Baiblo ɔ mi sisije tsɔɔmi ɔmɛ a sisi saminya nɛ e kɛ ngɛ ní tsue ngɛ e si himi mi lo. Titli ɔ, ke Baiblo kaselɔ ko gbi kekleekle womi ɔ kasemi nya nɛ asafo mi nikɔtɔma amɛ ngɛ he susue keji e sa nɛ a baptisi lɛ ɔ, e sa nɛ a hyɛ saminya. Ke asafo mi nikɔtɔma amɛ na kaa nɔ ko he sui nɛ́ e sa kaa a baptisi lɛ ɔ, e sa nɛ a to blɔ nya nɛ a kɛ yemi kɛ buami nɛ sa nɛ ha jamɛatsɛ ɔ bɔnɛ pee nɛ pee se ɔ, e he nɛ su kɛ ha baptisimi.—Hyɛ Organized to Do Jehovah’s Will womi ɔ, bafa 217-218.

[Bua jɔmi munyu nɛ a ma nɔ mi ngɛ bafa 2]

E he hia nɛ ni hehi nɛ a kplɛɛ anɔkuale ɔ nɔ ɔ a nane nɛ pi si ngɛ anɔkuale ɔ mi saminya