A Pee Wa Womi Tɛtlɛɛ Ɔmɛ Konɛ Nihi Fuu A Bua Nɛ Jɔ He
1. Mɛni blɔ nɔ tsɔlɔ anɔkualetsɛ kɛ ní lelɔ ɔ kase bɔfo Paulo ngɛ?
1 Kaa bɔnɛ bɔfo Paulo fiɛɛ sane kpakpa a ngɛ blɔ nɛ ma ha nɛ e nine maa su ‘nɔ tsuaa nɔ’ nɔ ɔ nɔ ɔ, jã nɔuu kɛ̃ nɛ tsɔlɔ anɔkualetsɛ kɛ ní lelɔ ɔ hu guɔ wa womi tɛtlɛɛ ɔmɛ a nɔ kɛ suu nihi nɛ a ngɛ si himi slɔɔtoslɔɔtohi a mi nɛ e slo a hemi kɛ yemi ɔ a he. (1 Kor. 9:22, 23) Loko wa ma nyɛ maa ngɔ Watchtower kɛ Awake! ɔmɛ kɛ tsu ní saminya a, e sa nɛ waa le nihi nɛ a ngma womi tɛtlɛɛ nɛ ɔmɛ kɛ ha.
2. Mɛnɔmɛ a he nɛ a ngma Awake! ɔ ngɛ?
2 Awake!: Yi mi tomi heje nɛ a pee womi tɛtlɛɛ nɛ ɔ ji kaa a kɛ ye bua nihi nɛ a ngɛ kaa nihi nɛ bɔfo Paulo tsɛ mɛ ke “Atenebi” ɔ. (Níts. 17:22) Nimli nɛ ɔmɛ li Kristo jami he nɔ́ ko, nɛ jã kɛ̃ nɛ a li nɔ́ ko tsɔ ngɛ Ngmami ɔ he. Nihi nɛ a he nɛ a ngma Awake! ɔ ngɛ ɔ, mɛ hu a li Baiblo ɔ he nɔ́ ko, loo ke a le Baiblo ɔ he nɔ́ ko po ɔ, pi tsɔ. Eko ɔ, a li nɔ́ ko ngɛ Kristofoli a tsɔɔmi ɔmɛ a he, loo a he we jami ko yi, loo a li kaa se nami ngɛ Baiblo ɔ he nitsɛnitsɛ. Yi mi tomi titli heje nɛ a ngma Awake! ɔ ngɛ ji, konɛ nihi nɛ a maa kane ɔ nɛ a le kaa anɔkuale Mawu ko ngɛ. Yi mi tomi kpa hu heje nɛ a ngma Awake! ɔ ngɛ ji, nɛ e ha nɛ nihi nɛ a ná hemi kɛ yemi ngɛ Baiblo ɔ mi, nɛ a nu sisi hu kaa e slo Yehowa Odasefoli ngɛ jami kpa amɛ a he.
3. Mɛnɔmɛ a he nɛ a pee Watchtower slɔɔto enyɔ ɔmɛ ngɛ?
3 Watchtower: A pee mabi a Watchtower a kɛ ha nihi nɛ a ngɛ bumi bɔɔ kɛ ha Mawu kɛ Ngmami ɔ. A le nɔ́ ko bɔɔ kɛ kɔ Baiblo ɔ he mohu lɛɛ, se a nui e mi tsɔɔmi ɔmɛ a sisi fitsofitso. A ngɛ kaa nihi nɛ Paulo de ngɛ a he ke a “yee Mawu gbeye” ɔ. (Níts. 13:14-16) Watchtower nɛ wa kaseɔ ɔ lɛɛ a pee kɛ ha Yehowa Odasefoli titli. Paulo le kaa nihi nɛ kaneɔ e sɛ womi ɔmɛ le Ngmami ɔ mi, nɛ a ngɛ anɔkuale ɔ he nile. (1 Kor. 1:1, 2) Jã kɛ̃ nɛ munyuhi nɛ a ngmaa kɛ woɔ Watchtower nɛ a pee kɛ ha Yehowa Odasefoli ɔ mi ɔ ngɛ kɛ ha nihi nɛ a baa wa kpehi nɛ a le munyu komɛ nɛ Odasefoli kɛ tsuɔ ní.
4. Mɛni heje nɛ e sa kaa waa le womi tɛtlɛɛ ɔmɛ eko tsuaa eko mi munyu ngɛ?
4 E ngɛ mi kaa wa blaa womi tɛtlɛɛ enyɔ ɔmɛ kɛ haa nihi mohu lɛɛ, se kake pɛ he munyu lɛ wa tuɔ. Enɛ ɔ he ɔ, moo bɔ mɔde nɛ o le munyu nɛ ngɛ womi tɛtlɛɛ ɔmɛ eko tsuaa eko mi. Lɔɔ ma ha nɛ o maa le womi tɛtlɛɛ nɛ ke o kɛ ha nɔ nɛ o kɛ lɛ kpe ɔ, e bua maa jɔ he.