Moo Bu Sɔmɔmi He Blɔ Nɛ O Ná a Kaa Nɔ́ Nɛ He Jua Wa
1. Kɛ nihi babauu nɛ a ngɛ je ɔ mi ɔ buɔ wa fiɛɛmi nítsumi ɔ ha kɛɛ?
1 Nihi babauu nɛ a ngɛ Satan je ɔ mi ɔ buɔ wa fiɛɛmi nítsumi ɔ kaa “kuasiahi a sane.” (1 Kor. 1:18-21) Ke wa hyɛ we nɛ e hi ɔ, juɛmi nɛ e dɛ nɛ ɔ nɛ a hɛɛ ɔ ma nyɛ ma ha nɛ wa kɔni mi maa jɔ, nɛ kã nɛ wa ngɛ ɔ hu nya maa ba si. (Abɛ 24:10; Yes. 5:20) Mɛni yi mi tomihi a heje nɛ e sa kaa waa bu he blɔ nɛ wa ná kaa wa ji Yehowa Odasefoli ɔ kaa nɔ́ ko nɛ he jua wa ngɛ?—Yes. 43:10.
2. Mɛni heje nɛ a ma nyɛ ma tsɛ sɔmɔmi nítsumi ɔ ke “nítsumi klɔuklɔu” ɔ?
2 “Nítsumi Klɔuklɔu”: Bɔfo Paulo tsɔɔ kaa sɔmɔmi nítsumi ɔ ji “nítsumi klɔuklɔu.” (Rom. 15:15, 16, NW) Ngɛ mɛni blɔ nɔ lɛ sɔmɔmi nítsumi ɔ ji “nítsumi klɔuklɔu” ɔ? Wa he nɛ waa kɛ woɔ nítsumi nɛ ɔ mi ɔ haa nɛ wa piɛɛɔ nɔ nɛ “ngɛ klɔuklɔu,” nɛ ji Yehowa a he kɛ tsuɔ ní, nɛ lɔɔ haa nɛ e biɛ ɔ he tsɔ ɔ. (1 Kor. 3:9; 1 Pet. 1:15) Yehowa buɔ fiɛɛmi nɛ wa fiɛɛɔ ɔ kaa e ji “bɔ nɛ wa ngɛ sãe,” enɛ ɔ he ɔ, sɔmɔmi nítsumi ɔ ji wa jami ɔ fã ko nɛ he hia wawɛɛ.—Heb. 13:15.
3. Mɛni heje nɛ sane kpakpa a nɛ wa fiɛɛɔ ɔ ji he blɔ ngua nɛ wa ná?
3 Nihi bɔɔ ko pɛ nɛ a ná he blɔ ngua nɛ ɔ kaa a maa fiɛɛ sane kpakpa a. Atsinyɛ jemi ko be he kaa ke Yehowa kɛ nítsumi nɛ ɔ wo hiɔwe bɔfo ɔmɛ a dɛ kaa a tsu ɔ, a ma tsu lɛ saminya kɛ bua jɔmi. (1 Pet. 1:12) Se Yehowa hla wɔ adesahi nɛ wa yi mluku, nɛ wa ji “zu buɛhi” ɔ, nɛ e ha wɔ he blɔ ngua nɛ ɔ!—2 Kor. 4:7.
4. Mɛni blɔ nɔ wa maa gu kɛ tsɔɔ kaa wa buɔ sɔmɔmi nítsumi ɔ kaa nɔ́ ko nɛ he jua wa?
4 E He Hia Wawɛɛ: Akɛnɛ wa buɔ he blɔ nɛ wa ná a kaa nɔ́ ko nɛ he jua wa heje ɔ, wa naa sɔmɔmi nítsumi ɔ kaa e ji “níhi nɛ a he hia nitsɛnitsɛ” ngɛ wa si himi mi ɔ a kpɛti kake. (Filip. 1:10, NW) Enɛ ɔ heje ɔ, wa toɔ blɔ nya nɛ waa kɛ wa he woɔ mi daa otsi. Ke a ha la fialɔ ko he blɔ kaa e piɛɛ la fiali kpahi nɛ nihi le mɛ ngɛ je ɔ mi tsuo ɔ a he kɛ fia la slɔɔtoslɔɔtohi ɔ, e ma dla e he ngɛ la a eko tsuaa eko mi konɛ e nyɛ nɛ e fia la a saminya pe bɔnɛ e peeɔ daa a. Jã nɔuu kɛ̃ nɛ ke wɔ hu wa dla wa he loko wa ya fiɛɛmi ɔ, wa ma nyɛ maa “tsɔɔ anɔkuale munyu ɔ saminya,” nɛ enɛ ɔ ma ha nɛ wa “ní tsɔɔmi” ɔ maa pi si.—2 Tim. 2:15; 4:2.
5. Mɛnɔ bua jɔɔ wa sɔmɔmi nítsumi ɔ he?
5 Ko ha nɛ juɛmi nɛ e dɛ nɛ nihi fuu hɛɛ ngɛ sɔmɔmi nítsumi ɔ he ɔ nɛ ha nɛ o kɔni mi nɛ jɔ. Mo kai kaa loloolo ɔ, nihi babauu ngɛ wa zugba kpɔ ɔmɛ a mi nɛ a suɔ kaa wa ba slaa mɛ. Se tsa pi nimli a hɛ mi nɛ wa suɔ kaa wa maa sa. Nɔ́ nɛ he hia pe kulaa ji bɔnɛ Yehowa nuɔ níhi a he ha, e bua jɔɔ mɔde nɛ wa bɔɔ ngɛ sɔmɔmi nítsumi ɔ mi ɔ he wawɛɛ.—Yes. 52:7.