Yi Mi Tomihi Nyɔngma Kɛ Enyɔ A Heje Nɛ Wa Fiɛɛɔ Ngɛ

Mɛni heje nɛ wa fiɛɛɔ sane kpakpa a nɛ wa tsɔɔ nihi ní ɔ? Anɛ yi mi tomi titli heje nɛ wa fiɛɛɔ nɛ wa tsɔɔ nihi ní ɔ ji nɛ́ waa ye bua nihi nɛ a hɛɛ tsui kpakpa a konɛ a nyɛɛ wami blɔ ɔ nɔ lo? (Mat. 7:14) Lɔɔ ji kekleekle yi mi tomi nɛ a wo ta ngɛ sisi ɔ mohu lɛɛ, se pi lɔɔ ji yi mi tomi titli heje nɛ wa fiɛɛɔ nɛ wa tsɔɔ nihi ní ngɛ. Ngɛ yi mi tomihi 12 a heje nɛ wa fiɛɛɔ nɛ wa tsɔɔ nihi ní ɔ a kpɛti ɔ, te nɛ lɛ o susu kaa e he hia pe kulaa?

1. E yeɔ bua kɛ heɔ nihi a yi wami.—Yoh. 17:3.

2. E bɔɔ yayami peeli kɔkɔ.—Eze. 3:18, 19.

3. E ha nɛ Baiblo gbami ngɛ mi bae.—Mat. 24:14.

4. E tsɔɔ kaa Mawu yeɔ dami sane. Ke Yehowa kpata yayami peeli a hɛ mi ɔ, nɔ ko be nyɛe ma pia lɛ kaa e ngmɛ́ yayami peeli ɔmɛ blɔ nɛ a tsake a tsui.—Níts. 17:30, 31; 1 Tim. 2:3, 4.

5. E haa nɛ wa tsuɔ blɔ nya nítsumi nɛ a kɛ wo wa dɛ kaa waa ye bua nihi nɛ Mawu ngɔ Yesu muɔ kɛ he mɛ ɔ konɛ huɛ bɔmi nɛ hi a kɛ Mawu a kpɛti ɔ he ní.—Rom. 1:14, 15.

6. E haa nɛ wa yi nihi a muɔ he fɔ.—Níts. 20:26, 27.

7. Ja wa fiɛɛ loko a ma he wɔ nitsɛmɛ hu wa yi wami.—Eze. 3:19; Rom. 10:9, 10.

8. E tsɔɔ kaa wa suɔ wa nyɛmi nɔmlɔ.—Mat. 22:39.

9. E tsɔɔ kaa wa peeɔ tue bumi kɛ haa Yehowa kɛ e Bi ɔ.—Mat. 28:19, 20.

10. E ji wa jami ɔ fã.—Heb. 13:15.

11. E tsɔɔ kaa wa suɔ Mawu.—1 Yoh. 5:3.

12. E yeɔ bua kɛ tsɔɔ Yehowa biɛ ɔ he.—Yes. 43:10-12; Mat. 6:9.

Ngɛ anɔkuale mi ɔ, pi yi mi tomi nɛ ɔmɛ pɛ a heje nɛ wa fiɛɛɔ nɛ wa tsɔɔ nihi ní ngɛ. Kaa nɔ hyɛmi nɔ́ ɔ, fiɛɛmi nɛ wa fiɛɛɔ ɔ haa nɛ wa hemi kɛ yemi mi waa, nɛ e haa wɔ he blɔ nɛ wa piɛɛɔ Mawu he kɛ tsuɔ ní hulɔ. (1 Kor. 3:9) Se yi mi tomi nɛ he hia pe kulaa heje nɛ wa fiɛɛɔ nɛ wa tsɔɔ nihi ní ɔ ji nyɔngma kɛ enyɔne ɔ nɛ. Nihi bu wɔ tue jio, a bui wɔ tue jio ɔ, fiɛɛmi nɛ wa fiɛɛɔ ɔ hu yeɔ bua kɛ tsɔɔ Mawu biɛ ɔ he, nɛ e haa nɛ Mawu naa heto kɛ haa nɔ nɛ ngɛ lɛ ahlua bɔe ɔ. (Abɛ 27:11) Niinɛ, wa ngɛ yi mi tomi kpakpahi a heje nɛ wa ‘tsɔɔ ní nɛ wa fiɛɛɔ sane kpakpa a daa’ ngɛ.—Níts. 5:42.