Wa Maa Je Kaimi ɔ Yemi He Nine Fɔmi Womi ɔ Gbami Sisi Kɛ Je March 17
1. Mɛni wa ma bɔni gbami kɛ je March 17?
1 Kaimi ɔ nɛ wa yeɔ daa jeha a haa nɛ wa fiɛɛɔ Yesu gbenɔ ɔ. (1 Kor. 11:26) Enɛ ɔ he ɔ, wa suɔ nɛ nihi nɛ a piɛɛ wa he kɛ ye Kaimi ɔ konɛ a nu nike ní nɛ ji kpɔmi nɔ́ ɔ nɛ Yehowa je e suɔmi mi kɛ ha wɔ ɔ he sane. (Yoh. 3:16) Jeha nɛ ɔ, wa maa je Kaimi ɔ yemi he nine fɔmi womi ɔ gbami sisi kɛ je Hɔ, March 17. Anɛ o ngɛ blɔ hyɛe kaa o ma gba fuu lo?
2. Ke waa kɛ nine fɔmi womi ɔ ma ha nɔ ko ɔ, mɛni wa ma nyɛ ma de?
2 Nɔ́ Nɛ Wa Ma Nyɛ Ma De: E hi kaa wa maa po munyu ɔ kpiti. Wa ma nyɛ ma de ke: “I kpa mo pɛɛ, wa suɔ kaa waa fɔ o kɛ o weku ɔ nine kɛ ba gbijlɔ ko nɛ he hia nɛ a maa ye ngɛ je ɔ mi tsuo ngɛ April 5 nɔ ɔ sisi. A maa tu munyu ko kɛ tsɔɔ wɔ nɛ a be nɔ́ ko hee. Munyu nɛ ɔ kɔɔ nɔ́ nɛ Yesu gbenɔ ɔ tsu, kɛ nɔ́ nɛ e ngɛ tsue amlɔ nɛ ɔ he. A tsɔɔ he nɛ a maa pee ngɛ kɛ be nɛ a kɛ maa pee ɔ ngɛ nine fɔmi womi ɔ nɔ.” Ke wa ngɛ nine fɔmi womi ɔ gbae Hɔ kɛ Hɔgba a, ke e maa hi ɔ, wa ha womi tɛtlɛɛ ɔmɛ hu kɛ piɛɛ he.
3. Kɛ wa ma plɛ kɛ fɔ nihi babauu nine kɛɛ?
3 Moo Fɔ Nihi Babauu Nine: Oti nɛ waa kɛ ma wa hɛ mi ji kaa wa maa fɔ nihi babauu nine. Enɛ ɔ he ɔ, bɔɔ mɔde nɛ o fɔ nihi nɛ o kɛ mɛ kaseɔ Baiblo ɔ, nihi nɛ o ya slaa mɛ, o wekuli, nihi nɛ o kɛ mɛ tsuɔ ní, nihi nɛ o kɛ mɛ yaa sukuu, nihi nɛ o kɛ mɛ ngɛ kpɔ mi, kɛ ni kpahi nɛ o le mɛ ɔ nine. Asafo ɔ mi nikɔtɔma amɛ maa tsɔɔ nyɛ bɔnɛ nyɛ ma plɛ kɛ tsu nyɛ zugba kpɔ ɔ mi ní kɛ pi si ha. Nine nɛ wa fɔɔ nihi daa jeha kaa a ba Kaimi ɔ yemi ɔ woɔ yiblii. Jeha nɛ be ɔ, benɛ yo ko ya he nɛ a ye Kaimi ɔ ngɛ ɔ, nibwɔhi a kpeeli ɔmɛ a ti nɔ kake de lɛ kaa e maa ye bua lɛ kɛ hla nɔ nɛ fɔ lɛ nine ɔ. Yo ɔ tsɔɔ kaa e li nɔ ko nɔ ko ngɛ lejɛ ɔ, se mohu nɔ ko nɛ ngɛ fiɛɛe ngɛ wehi a mi jamɛ a ligbi ɔ mɔtu ɔ nɛ e fɔ lɛ nine ɔ nɛ.
4. Mɛni yi mi tomi heje nɛ e sa kaa waa kɛ kã nɛ gba nine fɔmi womi ɔ?
4 Eko ɔ, nɔ ko nɛ o ha lɛ nine fɔmi womi ɔ maa ba Kaimi ɔ yemi ɔ. Ke o fɔ nɔ ko nine nɛ e ba Kaimi ɔ jio, e bɛ jio ɔ, mɔde nɛ o bɔ kɛ fɔ nihi nine ɔ peeɔ odase yemi. Nine fɔmi womi ɔ nɛ o ma gba a, ma ha nɛ a le kaa amlɔ nɛ ɔ, Yesu ji Matsɛ nɛ ngɛ he wami. Kã nɛ o kɛ ma gba nine fɔmi womi nɛ ɔ ma ha nɛ nihi tsuo nɛ a ngɛ o zugba kpɔ ɔ mi, o nyɛmimɛ Odasefoli, kɛ titli ɔ, Yehowa maa na kaa o bua jɔ nike ní nɛ ji kpɔmi nɔ́ ɔ he wawɛɛ nitsɛ.—Kol. 3:15.