Jehovah’s Witnesses—Faith in Action, Part 1: Out of Darkness
Ngɛ Baiblo ɔ mi ɔ, a kɛ la toɔ anɔkuale he nɛ a kɛ diblii toɔ lakpa he. (La 43:3; Yes. 5:20) Satan ha nɛ je ɔ mi wo diblii benɛ e sisi Hawa a, nɛ nyagbenyagbe ɔ, e tsɛ̃ adesahi tsuo kɛ wo diblii kpii mi. (Kpoj. 12:9) Video nɛ ji Jehovah’s Witnesses—Faith in Action, Part 1: Out of Darkness (Yehowa Odasefoli—A Je A Hemi Kɛ Yemi Kpo, Fã 1: A Je Diblii Mi) ɔ tsɔɔ bɔnɛ mumi mi la je sisi bɔni kpɛmi ngɛ diblii ɔ mi. (Yes. 60:1, 2) Ke o hyɛ video ɔ ta a, hyɛ kaa o ma nyɛ ma ha sane bimi nɛ ɔmɛ a heto lo?
(1) Ngɛ mɛni blɔ nɔ nɛ je ɔ mi wo diblii kpii ngɛ bɔfo ɔmɛ a gbenɔ se? (2) Ngɛ jeha 1100 jeha amɛ a sisije ɔ, mɛni ya nɔ nɛ ha nɛ nihi yɔse kaa sɔlemi ɔmɛ gba kɛ je anɔkuale ɔ he? (3) Mɛnɔmɛ ji Henry Grew kɛ George Storrs ɔ? (4) Mɛni ba Charles Russell nɔ nɛ́ lɔɔ ná e nɔ he wami wawɛɛ? (5) Mɛni blɔ nɔ Nyɛminyumu Russell, kɛ e papaa, kɛ nihi bɔɔ nɛ e le mɛ ɔ guɔ kɛ peeɔ a Baiblo mi nikasemi ɔ, nɛ mɛni níhi a da Ngmami ɔ nɔ kɛ ma nya si? (6) Mɛni blɔ nɔ nɛ Baiblo kasemi kuu nɛ ɔ kɛ a he ya bɔ Nelson Barbour kuu ɔ he ngɛ, se mɛni ha nɛ Nyɛminyumu Russell kɛ lɛ kpa bɔmi? (7) Mɛni ba ngɛ July 1879 nɛ lɔɔ ha nɛ mumi mi la ehe kpɛ? (8) Lɔɔ se ɔ, mɛni ji nɔ́ nɛ Baiblo Kaseli nɛ a he ngɛ hiɛe ɔ pee konɛ a kɛ gbɛ sane kpakpa a kɛ fia? (9) Momoomo loko e su 1914 ɔ, mɛni ji nɔ́ nɛ Baiblo Kaseli ɔmɛ hyɛ blɔ kaa e maa ba ngɛ 1914? (10) Mɛni haomihi Baiblo Kaseli ɔmɛ kɛ kpe ngɛ Nyɛminyumu Russell gbenɔ ɔ se? (11) Mɛni Baiblo Kaseli ɔmɛ pee benɛ a je Nyɛminyumu Rutherford kɛ nihi nɛ a piɛɛ e he ɔ kɛ je tsu nɛ a wo mɛ ɔ mi se? (12) Mɛni blɔ nɔ video nɛ ɔ nɛ o hyɛ ɔ ha nɛ hɛsa nɛ o ngɛ ha Yehowa asafo ɔ mi wa ngɛ? (13) Mɛni blɔ nɔ video nɛ ɔ ha nɛ o yi mi kpɔ nɛ o mwɔ kaa o kɛ kã maa ya nɔ maa fiɛɛ ngɛ yi mi wami nɛ o kɛ maa kpe tsuo se ɔ mi wa ngɛ? (14) Mɛni blɔ nɔ wa maa gu nɛ waa kɛ video nɛ ɔ nɛ ye bua wa wekuli kɛ wa Baiblo kaseli, kɛ ni kpahi?
Blema Baiblo Kaseli ɔmɛ si Mawu jami mi weto ní nɛ he jua wa nitsɛnitsɛ kɛ ha wɔ! A kɛ kã kɛ hɛdɔ hɛɛ mumi mi la ngɛ je nɛ e mi wo diblii ngɛ mumi mi ɔ mi. Nyɛ ha nɛ waa kase nɔ hyɛmi nɔ́ nɛ a pee ɔ nɛ waa ‘ya nɔ nɛ waa nyɛɛ kaa la bimɛ.’—Efe. 5:8.