Ná Bua Jɔmi Kɛ Je O Dengme Gbomi ɔ Mi
1. Mɛni ma ha nɛ kã nɛ waa kɛ tsuɔ sɔmɔmi nítsumi ɔ maa ba si?
1 A bɔ adesa konɛ “e na bua jɔmi kɛ je e dengme gbomi ɔ mi.” (Fiɛlɔ 2:24) Se, ke wa yɔse we yiblii nɛ wa sɔmɔmi nítsumi ɔ ngɛ woe ɔ, e ma ha wa kɔni mi maa wo nyu, nɛ wa be bua jɔmi nae, nɛ kã nɛ wa ngɛ ɔ maa ba si. Mɛni maa ye bua wɔ konɛ wa ná juɛmi nɛ da?
2. Mɛni heje nɛ e sa kaa wa ná juɛmi nɛ da ngɛ bɔnɛ nihi peeɔ a ní ngɛ wa sɔmɔmi nítsumi ɔ he ɔ he?
2 Ná Juɛmi Nɛ Da: Mo kai kaa nihi bɔɔ pɛ nɛ a bu Yesu ní tsɔɔmi ɔ tue, se atsinyɛ jemi ko be he kaa e sɔmɔmi nítsumi ɔ wo yiblii. (Yoh. 17:4) Ngɛ Yesu nɔ́ hetomi nɔ́ nɛ kɔɔ ní dulɔ ɔ he ɔ mi ɔ, e gba kaa nihi fuu a bua be Matsɛ Yemi sɛ gbi nɛ ngɛ kaa wu nɛ a duɔ ɔ he jɔe. (Mat. 13:3-8, 18-22) Se, wa mɔde bɔmi ɔ maa wo yiblii babauu.
3. Ke nihi bui munyu ɔ tue kpakpa ko po ɔ, mɛni blɔ nɔ wa maa gu kɛ ‘wo yiblii’?
3 Bɔnɛ Wa Woɔ Yiblii Babauu: Yesu nɔ́ hetomi nɔ́ ɔ tsɔɔ kaa ni nɛmɛ nɛ a kplɛɛɔ sɛ gbi ɔ nɔ ɔ “woɔ yibli.” (Mat. 13:23) Ke a du ngma nɛ e puɛ, nɛ e wa a, pi ngma nyafii ko kɛkɛ pɛ ji yiblii nɛ e woɔ, se mohu a náa wu ehe nɛ a ma du hulɔ. Lɔɔ he ɔ, tsa pi kaseli hehi nɛ Kristofoli nɛ yeɔ manyɛ ɔ náa a pɛ ji yiblii womi ɔ, se Matsɛ Yemi sɛ gbi ɔ nɛ a yaa nɔ nɛ a fiɛɛɔ babauu ɔ hu piɛɛ he. Ní “kpakpahi” jeɔ mi kɛ baa nɛ ma nyɛ ma ha nɛ wa tsui nɛ́ nɔ wa mi, e kɔ we he eko kaa nihi bu tue loo a bui tue. Wa ngɛ ye buae konɛ Yehowa biɛ ɔ he nɛ tsɔ. (Yes. 43:10-12; Mat. 6:9) Wa bua jɔ he blɔ nɛ wa ná kaa wa maa piɛɛ Mawu he kɛ tsu ní ɔ he. (1 Kor. 3:9) Nɔ́ nɛ waa kɛ “wa nya jajeɔ” haa nɛ Yehowa bua jɔɔ.—Heb. 13:15, 16.
4. Mɛni ma nyɛ maa je wa sɔmɔmi nítsumi ɔ mi kɛ ba nɛ wa be lee?
4 Jehanɛ ɔ hu ɔ, wa mɔde bɔmi ɔ ma nyɛ maa wo yiblii nɛ wa li. Yesu gbe e sɔmɔmi nítsumi ngɛ zugba nɛ ɔ nɔ ɔ nya loko nihi nɛ e fiɛɛ ha mɛ ɔ a ti ni komɛ ba pee e kaseli. Jã nɔuu kɛ̃ nɛ eko ɔ, Matsɛ Yemi ɔ he wu nɛ wa du ɔ be wae amlɔ nɛ ɔ ngɛ nɔ ɔ tsui mi, se eko ɔ, pee se e maa ba anɔkuale ɔ mi nɛ wa be lee. Ngɛ anɔkuale mi ɔ, wa sɔmɔmi nítsumi ɔ tsuɔ ní kpakpahi fuu. Enɛ ɔ he ɔ, nyɛ ha nɛ ‘waa ya nɔ nɛ waa wo yiblii babauu’ nɛ wa kɛ tsɔɔ kaa Yesu kaseli ji wɔ.—Yoh. 15:8.