Anɛ O Kɛ He Blɔ ɔ Ma Tsu Ní Lo?
Kaimi ɔ Yemi ɔ Maa Ye Bua Wɔ Konɛ Wa Je Hɛsa Kpo
1. Mɛni he blɔ klɛdɛɛ nɛ wa ma ná ngɛ Kaimi be ɔ?
1 Kaimi ɔ yemi ngɛ April 14 ɔ ma ha wɔ he blɔ nɛ se be nɛ waa kɛ maa je hɛsa kpo ngɛ ni kpakpahi nɛ Yehowa pee ha wɔ ɔ he. Munyu ngɛ Luka 17:11-18 tsɔɔ bɔ nɛ Yehowa kɛ Yesu naa hɛsa nɛ nihi jeɔ kpo ɔ ha. Se aywilɛho sane ji kaa, ngɛ nyumuhi nyɔngma nɛ Yesu tsa mɛ ɔ a kpɛti ɔ, nɔ kake pɛ lɛ e ba na si. Hwɔɔ se ɔ, kpɔmi nɔ́ ɔ nɛ a kɛ ha a maa tsa wa he mi hiɔhi tsuo, nɛ e ma ha wa ma ná neneene wami! Atsinyɛ jemi ko be he kaa, wa maa na Yehowa si daa ligbi ngɛ jɔɔmi nɛ ɔmɛ a he. Se mɛni blɔ nɔ nɛ wa ma nyɛ maa gu kɛ je hɛsa kpo ngɛ otsihi nɛ maa ba a mi?
2. Mɛni blɔ nɔ wa maa gu kɛ ná kpɔmi nɔ́ ɔ he hɛsa?
2 Mo Ná Hɛsa: E ngɛ heii kaa ja wa susu nɔ́ ko he loko wa ma ná nɔ́ ɔ he hɛsa. A ngma Kaimi ɔ he Baiblo kanemi he blɔ nya tomi ɔ kɛ wo hehi fuu konɛ e ye bua wɔ nɛ wa ná kpɔmi nɔ́ ɔ he hɛsa; eko ngɛ New World Translation nɛ a tsake pee ɔ se appendix B12 ɔ, kalenda a kɛ Examining the Scriptures Daily ɔ mi. E maa hi kaa nyɛ maa susu munyu nɛ ɔ he kaa weku. Ke wa pee jã a, kpɔmi nɔ́ ɔ he hɛsa nɛ wa ngɛ ɔ mi maa wa. Nɛ enɛ ɔ ma ná wa nɔ he wami nɛ wa maa ba wa jemi saminya.—2 Kor. 5:14, 15; 1 Yoh. 4:11.
3. Mɛni blɔhi a nɔ nɛ wa ma nyɛ maa gu kɛ je hɛsa nɛ wa ngɛ ɔ kpo ngɛ Kaimi ɔ yemi be ɔ mi?
3 Mo Je Hɛsa Kpo: Waa kɛ wa ní peepee lɛ tsɔɔ kaa wa ngɛ hɛsa. (Kol. 3:15) Akɛnɛ kpititsɛ ɔ bua jɔ nɔ́ nɛ Yesu pee ha lɛ ɔ he ɔ, e hla Yesu nɛ e na lɛ si. Atsinyɛ jemi ko be he kaa e kɛ kã sɛɛ nyakpɛ blɔ nɔ nɛ a gu kɛ tsa lɛ ɔ he ní kɛ tsɔɔ ni kpahi. (Luka 6:45) Anɛ kpɔmi nɔ́ ɔ he hɛsa nɛ wa ngɛ ɔ maa wo wɔ kã nɛ waa kɛ wa he maa wo Kaimi ɔ he nine fɔmi womi ɔ gbami mi lo? Blɔ gbali a wami ní tsumi ɔ nɛ wa ma tsu eko, loo ngmlɛfia fuu nɛ waa kɛ ma tsu ni ngɛ fiɛɛmi tso mi ɔ ji blɔ kpakpa nɛ wa maa gu nɔ kɛ tsɔɔ hɛsa. Ke wa ngɛ hɛsa ngɛ wa tsui mi ɔ, wa ma nya nibwɔhi nɛ a maa ba Kaimi ɔ a he, nɛ wa ma ha a sane bimi ɔmɛ a heto.
4. Mɛni wa ma nyɛ maa pee ngɛ Kaimi be nɛ ɔ mi konɛ wa ko pia wa he?
4 Anɛ Kaimi ɔ yemi nɛ ɔ maa pee wa nyagbe nɔ́ lo? (1 Kor. 11:26) Wa li. Se wa le kaa ke Kaimi ɔ be ɔ, he blɔ klɛdɛɛ nɛ ɔ nɛ wa ná nɛ waa kɛ ma je wa hɛsa kpo ɔ hu maa be. Anɛ o kɛ he blɔ nɛ ɔ ma tsu ní saminya lo? E ba mi kaa wa nya mi munyu, kɛ wa tsui mi susumihi maa sa Yehowa, Nɔ nɛ e je e tsui mi nɛ e ha wɔ kpɔmi nɔ́ ɔ hɛ mi.—La 19:14.