Moo Ngɔ Wa Womi Momo Ɔmɛ Kɛ Tsu Ní Saminya

Akɛnɛ ke waa kɛ wa womi momo ɔmɛ to, loo wa sake pue he ɔ, wa be he se nae he je ɔ, e sa nɛ waa bɔ mɔde nɛ wa kɛ ha. Womi tɛtlɛɛ kake pɛ ma nyɛ ma ha nɛ nɔ ko bua maa jɔ anɔkuale ɔ he, nɛ e ma ba bɔni Yehowa biɛ tsɛmi. (Rom. 10:13, 14) Blɔ komɛ a nɔ nɛ wa maa gu kɛ ngɔ wa womi momo ɔmɛ kɛ tsu ní saminya lɛ nyɛɛ se ɔ nɛ.

• Ke wa ngɛ fiɛɛe ngɛ zugba kpɔhi nɛ a pɔɛ mi ní tsumi mi nɛ wa nɛ nihi ngɛ we mi ɔ, wa ma nyɛ maa ngɔ eko kɛ wo he ko nɛ wetsɛ ɔ ma ba na.

• Ke o ngɛ ma nɔ odase yee ngɛ he ko nɛ nihi mlɛɔ ngɛ, kaa lɔle loo tlee si dami hehi ɔ, mo bi nihi keji a maa suɔ kaa a maa kane nɔ́ ko lo, nɛ o ngɔ wa womi momo ɔ slɔɔtohi kɛ tsɔɔ mɛ nɛ a hla nɔ́ nɛ a suɔ.

• Ke o ya hiɔ tsami hehi, loo hehi kaa jã ngɛ nyɛ asafo ɔ zugba kpɔ ɔ mi ɔ, mo si wa womi momo ɔmɛ ekomɛ ngɛ lejɛ ɔ. Ke nɔ nɛ hyɛɛ lejɛ ɔ ngɛ ɔ, e sa nɛ wa bi lɛ blɔ kekle. Ke o na kaa wa womi tɛtlɛɛ ɔ ekomɛ ngɛ lejɛ ɔ momo ɔ, ko si eko kɛ piɛɛ he.

• Ke o ngɛ o he dlae nɛ o maa kpale ya slaa nihi ɔ, mo susu níhi nɛ a ti nɔ tsuaa nɔ bua jɔ he ɔ he. Anɛ e ngɛ weku lo? Anɛ e suɔ blɔ hiami lo? Anɛ e bua jɔ ní dumi he lo? Moo hyɛ wa womi momo ɔmɛ a mi kaa o maa na munyu komɛ nɛ nɔ ɔ maa suɔ kaa e maa kane lo, konɛ o kɛ tsɔɔ lɛ ke o kpale ya.

• Ke o ya je nɔ ko nɛ e ngɛ munyu ɔ he bua jɔmi se ngɛ e we mi si abɔ, nɛ pee se o ya na lɛ ɔ, moo ngɔ womi tɛtlɛɛhi nɛ ba ngɛ be nɛ be ɔ mi kɛ tsɔɔ lɛ.