Bɔ Nɛ Wa Maa Pee Baiblo Mi Ní Kasemi Ha Nɛ E Maa Nu Tso
1. Mɛni he blɔ kɛ blɔ nya ní tsumi lɛ fɔɔ si ngɛ fiɛɛli a nɔ?
1 Nɔ ko be nyɛe ma sɔmɔ Mawu kaa jã Yehowa nitsɛ “gbla lɛ.” (Yoh. 6:44) E ngɛ mi jã mohu lɛɛ, se e sa kaa fiɛɛli nɛ a bɔ mɔde nɛ a tsɔɔ Baiblo mi ní kaseli ní saminya konɛ a nyɛ nɛ a hɛ mɛ kɛ su a hiɔwe Tsɛ ɔ he. (Yak. 4:8) Enɛ ɔ peemi biɔ nɛ wa dla wa he saminya. Ke wa kaneɔ kuku ɔmɛ kɛ sane bimi ɔmɛ pɛ kɛkɛ kɛ tsɔɔ mɛ ɔ, lɔ ɔ be hae a nɛ nu níhi a sisi saminya, nɛ a be nyɛe maa ya a hɛ mi mlamlaamla hulɔ.
2. Ke wa tsɔɔ nihi Baiblo ɔ saminya a, mɛni ma nyɛ maa je mi kɛ ba?
2 Loko wa ní tsɔɔmi maa nu tso ɔ, e sa nɛ waa ye bua nihi nɛ waa kɛ mɛ kaseɔ Baiblo ɔ nɛ (1) a nu nɔ́ nɛ Baiblo ɔ tsɔɔ ɔ sisi, (2) a kplɛɛ nɔ́ nɛ a kase ngɛ Baiblo ɔ mi ɔ nɔ, nɛ (3) a kɛ nɔ́ nɛ a kase ngɛ Baiblo ɔ mi ɔ nɛ tsu ní. (Yoh. 3:16; 17:3; Yak. 2:26) Loko Baiblo mi ní kaselɔ ko ma nyɛ maa su oti nɛ ɔmɛ a he ɔ, jã e kase ní nyɔhiɔhi abɔ. Be tsuaa be nɛ e maa ya e hɛ mi ɔ, huɛ bɔmi nɛ ngɛ e kɛ Yehowa a kpɛti ɔ mi maa wa, nɛ e maa ye bua lɛ nɛ e maa jɔɔ e he nɔ kɛ ha Yehowa.
3. Mɛni he je nɛ nihi nɛ a le ní tsɔɔmi ngɔɔ sane bimihi nɛ ma ha nɛ Baiblo mi ní kaseli ma je a juɛmi kpo kɛ tsuɔ ní ɔ?
3 Mɛni Ji Baiblo Mi Ní Kaselɔ ɔ Juɛmi Ngɛ Sane ɔ He?: Ke o suɔ nɛ o le kaa ní kaselɔ ɔ nu ní kasemi ɔ sisi aloo e kplɛɛ munyu ɔ nɔ ɔ, lɛɛ e sɛ nɛ mo pɛ o hi munyu tue, mohu ɔ, moo wo lɛ he wami nɛ e je e juɛmi kpo. (Yak. 1:19) Anɛ e nu nɔ́ nɛ Baiblo ɔ tsɔɔ ngɛ jamɛ a sane ɔ he ɔ sisi lo? Anɛ lɛ nitsɛ e ma nyɛ maa tsɔɔ jamɛ a munyu ɔ mi lo? Mɛni ji e juɛmi ngɛ nɔ́ nɛ e kase ɔ he? Anɛ e he ye kaa sisi numi ngɛ nɔ́ nɛ Baiblo tsɔɔ ngɛ jamɛ a sane ɔ he ɔ mi lo? (1 Tes. 2:13) Anɛ e nu sisi kaa e sa nɛ e pee tsakemihi ngɛ e si himi mi lo? (Kol. 3:10) Ke o suɔ nɛ o ná sane bimi nɛ ɔmɛ a heto ɔ, lɛɛ mo bi sanehi nɛ ma ha nɛ Baiblo mi ní kaselɔ ɔ ma je e juɛmi kpo, nɛ o bu lɛ tue.—Mat. 16:13-16.
4. Ke e he wa ha Baiblo mi ní kaselɔ ko kaa e maa kplɛɛ nɔ́ ko nɛ Baiblo ɔ tsɔɔ ɔ nɔ, aloo kaa e kɛ ma tsu ní ngɛ e si himi mi ɔ, mɛni e sa kaa wa pee?
4 Susumihi nɛ dɛ a he ngmɛɛmi yee. Su komɛ hu a kpami yee, nɛ e heɔ be fuu loko nɔ ko ma nyɛ ma tsake. (2 Kor. 10:5) Ke wa Baiblo mi ní kaselɔ ɔ kplɛɛ we nɔ́ nɛ wa ngɛ lɛ tsɔɔe ɔ nɔ, aloo e kɛ tsu we ní ngɛ e si himi mi ɔ, mɛni wa ma nyɛ maa pee? E sa kaa waa to wa tsui si, nɛ waa ngmɛ blɔ konɛ Mawu Munyu ɔ, kɛ mumi klɔuklɔu ɔ nɛ tsu nɔ ɔ tsui he ni ngɛ be nɛ sa mi. (1 Kor. 3:6, 7; Heb. 4:12) Ke e ba kaa Baiblo mi ní kaselɔ ɔ nui nɔ́ nɛ wa ngɛ kaseɔ ɔ sisi, aloo e nyɛ we nɛ e kɛ tsu ní ngɛ e si himi mi ɔ, e sɛ nɛ waa nyɛ e nɔ. Mohu ɔ, se nami ngɛ he wawɛɛ kaa wa ma tsake nɔ́ nɛ wa ngɛ kaseɔ. Ke wa ya nɔ nɛ wa to wa tsui si, nɛ wa je suɔmi mi kɛ tsɔɔ lɛ Baiblo ɔ, e maa pee tsakemihi nɛ he hia ngɛ e si himi mi pee se.