Mo Dla O He Saminya Ke O Maa Tsɔɔ Ní
1. Ke wa ngɛ Baiblo mi nikasemi pee ɔ, mɛni heje e sa kaa waa ye bua nikaselɔ ɔ nɛ e ná hɛsa ha nɔ́ nɛ e ngɛ kasee ɔ?
1 Ke wa maa pee Baiblo mi nikasemi ɔ, ja wa dla wa he saminya loko munyu ɔ ma nyɛ maa sɛ nikaselɔ ɔ tsui mi nɛ́ e ba sɔmɔ Yehowa. Wa mɔde bɔmi ɔ maa wo yiblii ke wa ye bua nikaselɔ ɔ nɛ e ná hɛsa ha Baiblo mi anɔkuale ɔ nɛ e ngɛ kasee ɔ. Enɛ ɔ ji nɔ́ nɛ maa wo nikaselɔ ɔ he wami. (5 Mose 6:5; Abɛ 4:23; 1 Kor. 9:26) Se mɛni blɔ nɔ wa maa gu kɛ pee enɛ ɔ?
2. Mɛni blɔ nɔ sɔlemi ma nyɛ maa ye bua wɔ konɛ wa dla wa he kɛ ha nikasemi peemi?
2 Moo Sɔle Kɛ Bi Yemi Kɛ Buami Ke O Ngɛ O He Dlae: Akɛnɛ Yehowa ji nɔ nɛ haa anɔkuale ɔ waa ngɛ nikaselɔ tsui mi heje ɔ, e sa kaa benɛ wa ngɛ wa he dlae ɔ, waa sɔle kekle kɛ ha nikaselɔ ɔ ngɛ e hiami ní pɔtɛɛ a he. (1 Kor. 3:6; Yak. 1:5) Sɔlemi ma nyɛ maa ye bua wɔ hulɔ konɛ waa na nɔ́ nɛ wa maa pee kɛ ye bua nikaselɔ ɔ konɛ Yehowa suɔmi nya ní peemi he ‘anɔkuale nile’ ɔ nɛ hyi e tsui mi tɔtɔɔtɔ.—Kol. 1:9, 10.
3. Ke wa ngɛ wa he dlae ɔ, mɛni blɔ nɔ wa ma nyɛ ma susu nikaselɔ ɔ he ngɛ?
3 Mo Susu Nikaselɔ ɔ He: Yesu le kaa ke ní tsɔɔmi maa nu tso ɔ, e hia kaa a susu tue buli ɔmɛ a he. Be ko ɔ, a bi Yesu sane ko, nɛ be kpa hu a bi lɛ jamɛ a sane ɔ nɔuu ke: “Kɛ ma pee kɛɛ nɛ ma ná neneene wami?” E gu blɔ munomuno nɔ kɛ ha sane bimi ɔ heto. (Luka 10:25-28; 18:18-20) Benɛ wa ngɛ wa he dlae ɔ, e sa nɛ wa susu nɔ́ nɛ hia kaa nikaselɔ ɔ nɛ le ɔ he. Mɛni ngmamihi waa kɛ lɛ maa kane? Nikasemi ɔ hiɛmi enyɛmɛ wa maa pee? Mɛni otihi eko ɔ, a sisi numi maa ye ha nikaselɔ ɔ? Ke wa dla wa he kɛ to sanehi nɛ eko ɔ e ma bi ɔ, wa ma nyɛ maa tsɔɔ lɛ níhi a nya saminya.
4. He dlami saminya tsɔɔ kaa waa pee mɛni?
4 Moo Kase Nɔ́ Nɛ Nyɛ Maa Kase ɔ Mi: Ke wa kase nɔ́ nɛ waa kɛ nikaselɔ ɔ maa kase ɔ hyɛ si abɔ po ɔ, e ji kekleekle be nɛ waa kɛ lɛ yaa kase. Loko wa ní tsɔɔmi ɔ ma nyɛ maa sɛ e tsui mi ɔ, e hia kaa wa dla wa he saminya kɛ ha nikasemi ɔ eko tsuaa eko. Enɛ ɔ tsɔɔ kaa e sa nɛ wɔ nitsɛmɛ waa pee nɔ́ nɛ wa woɔ wa nikaseli ɔmɛ he wami kaa a pee ɔ. Moo kane nɔ́ nɛ nyɛ maa kase ɔ mi, kɛ ngmami ɔmɛ, nɛ́ o hyɛ bɔnɛ e ma kɔ nikaselɔ ɔ he ha, konɛ o po oti ɔmɛ a sisi.—Rom. 2:21, 22.
5. Kɛ wa ma plɛ kɛ kase Yehowa kɛɛ?
5 Yehowa suɔ wawɛɛ kaa wa Baiblo kaseli ɔmɛ a ti nɔ tsuaa nɔ nɛ ya e hɛ mi. (2 Pet. 3:9) Ke wa ná be kɛ dla wa he kɛ ha nikasemi ɔ eko tsuaa eko ɔ, wa tsɔɔ kaa wa jee suɔmi mi kɛ susuɔ wa Baiblo kaseli ɔmɛ a he kaa bɔnɛ Yehowa susuɔ a he ɔ.