Yaa Nɔ Nɛ O Sɔle Konɛ Mawu Nɛ Ye Bua Mo

Mawu ha adesahi he blɔ klɛdɛɛ ko, nɛ lɔ ɔ ji he blɔ nɛ e ha mɛ kaa a kɛ lɛ nɛ sɛɛ ní, nɛ a de lɛ bɔ nɛ a nuɔ he ha kɛ gu sɔlemi nɔ. Gbalɔ David sɔle ke: “Ee, mo pɛ lɛ o buɔ kue fami tue. O ngɔ adesahi tsuo maa ba.” (La 65:2) Se mɛni blɔ nɔ wa maa gu kɛ sɔle konɛ Mawu nɛ e bu wɔ tue nɛ e jɔɔ wɔ?

MOO JE HE SI BAMI MI NƐ O SƆLE KƐ JE O TSUI MI

Sɔlemi nɛ o sɔleɔ ɔ haa nɛ o ngɔɔ o kɔmɔ ɔmɛ tsuo kɛ fɔɔ Mawu hɛ mi, nɛ kɛ gu lɔ ɔ nɔ ɔ, o deɔ lɛ bɔ nɛ o nuɔ he ha tutuutu. (La 142:2) Mawu Ope ɔ bua jɔɔ sɔlemi nɛ wa jeɔ wa tsui mi kɛ sɔleɔ ɔ he.

NGƆƆ MAWU BIƐ KƐ TSƐ LƐ

E ngɛ mi kaa Mawu ngɛ sablaihi fuu mohu lɛɛ, se e ngɛ biɛ kake pɛ. ‘Ye biɛ ji Yehowa; imi pɛ ji Mawu.’ (Yesaya 42:8) Biɛ Yehowa a je kpo maa pee si 7,000 ngɛ Ngmami Klɔuklɔu ɔmɛ a mi. Gbali fuu ngɔ Mawu biɛ ɔ kɛ tsu ní. Abraham, nɛ́ jamɛ a be ɔ mi ɔ a tsɛɛ lɛ ke Abram ɔ de ke: ‘Oo Yehowa Mawu, kɛ ma pee kɛɛ nɛ ma le kaa zugba nɛ ɔ ma ba pee ye nɔ́?’ (1 Mose 15:8) E sa nɛ ke wɔ hu wa ngɛ sɔlee ɔ, waa ngɔ Mawu biɛ nɛ ji Yehowa a kɛ tsu ní.

MOO SƆLE NGƐ MO NITSƐ O JE GBI MI

E ngɛ mi kaa wa tuɔ gbi slɔɔtoslɔɔtohi mohu lɛɛ, se Mawu le wa ti nɔ fɛɛ nɔ susumi kɛ bɔ nɛ e nuɔ he ha. E Munyu ɔ de ke: “Mawu hlɛ nɔ mi, mohu ɔ, ngɛ ma fɛɛ ma mi ɔ, nɔ fɛɛ nɔ nɛ e yeɔ lɛ gbeye nɛ e peeɔ nɔ́ nɛ da a, e kplɛɛɔ e nɔ.”​—Ní Tsumi 10:34, 35.

Se loko Mawu maa jɔɔ wɔ ɔ, níhi fuu ngɛ nɛ e biɔ nɛ waa pee pe sɔlemi pɛ nɛ wa maa sɔle. Ngɛ munyuhi nɛ nyɛɛ se ɔ mi ɔ, wa ma susu níhi nɛ e sa kaa waa pee ɔmɛ a he.