KRISTOFOHI A SI HIMI
O Kɛ Je Mi Bami He Mlaahi Nɛ Yehowa Wo ɔ Nɛ Tsu Ní
Yehowa Mawu tsɔɔ adesahi bɔ nɛ e sa kaa a ba a je mi ha. Kaa nɔ hyɛmi nɔ́ ɔ, Yehowa wo mlaa kaa, ke nyumu kɛ yo sɛ gba si himi mi ɔ, e sɛ nɛ a po gba a mi. (Mat 19:4-6, 9) Yehowa sume ajuama bɔmi mi mi slɔɔtoslɔɔto ɔmɛ ekoeko. (1Kor 6:9, 10) E ha e we bi sisi tomi mlaahi nɛ a ma nyɛ maa da nɔ kɛ le tade nɛ e sa kaa a wo, kɛ bɔ nɛ e sa kaa a dla a he ha, konɛ e slo mɛ ngɛ ni kpahi a he.—5Mo 22:5; 1Tim 2:9, 10.
Mwɔnɛ ɔ, nihi fuu yi Yehowa mlaa amɛ a nɔ. (Rom 1:18-32) Nihi hyɛɔ tade nɛ nihi woɔ, bɔ nɛ nihi dlaa a he ha, kɛ bɔ nɛ a baa a je mi ha, nɛ a kaseɔ mɛ. Ní yayahi nɛ a peeɔ ɔ pee we mɛ zo, nɛ a tuɔ munyu kɛ siɔ nihi nɛ a baa a je mi saminya a.—1Pet 4:3, 4.
Wa ji Yehowa Odasefohi, enɛ ɔ he ɔ, e sa nɛ wa mia wa hɛ mi nɛ waa ye je mi bami he mlaahi nɛ Mawu wo ɔ nɔ. (Rom 12:9) Mɛni blɔ nɔ wa maa gu kɛ pee jã? E sa nɛ waa kɛ hɛ si kami nɛ tsu ní konɛ waa tsɔɔ nihi nɛ a le níhi nɛ sa Mawu hɛ mi. Jehanɛ hu ɔ, e sa nɛ wɔ nitsɛmɛ hu waa ba wa je mi saminya. Kaa nɔ hyɛmi nɔ́ ɔ, ke wa ngɛ hlae ma he tade ko, aloo wa ma dla wa he ɔ, e sa nɛ wa bi wa he ke: ‘Anɛ tadehi nɛ i woɔ kɛ bɔ nɛ i dlaa ye he ha a tsɔɔ kaa i kɛ Yehowa mlaa amɛ tsuɔ ní, aloo i ngɛ je ɔ kasee? Anɛ tadehi nɛ i woɔ, kɛ bɔ nɛ i dlaa ye he ha a tsɔɔ kaa i ji Kristofo no nɛ yeɔ Mawu gbeye lo?’ Ke wa ngɛ hlae nɛ waa hyɛ sini ko hu ɔ, e sa nɛ wa bi wa he ke: ‘Anɛ Yehowa bua maa jɔ nɔ́ nɛ i yaa hyɛ ɔ he lo? Mɛnɔ hɛ mi nyami lɛ jamɛ a sini ɔ woɔ? Anɛ níhi nɛ i kɛ jeɔ ye hɛ ja a ma nyɛ ma puɛ ye je mi bami lo? (La 101:3) Anɛ e ma nyɛ maa tɔ̃tɔ̃ ye weku li, loo ni kpahi a nane lo?’—1Kor 10:31-33.
Mɛni he je nɛ e he hia kaa waa ye je mi bami he mlaahi nɛ Yehowa wo ɔ nɔ ɔ? E be kɛe nɛ Yesu Kristo ma kpata je ma amɛ a hɛ mi, nɛ e ma je ní yayahi tsuo kɛ je zugba a nɔ. (Eze 9:4-7) Nihi nɛ a peeɔ Mawu suɔmi nya ní pɛ nɛ a maa hi zugba a nɔ. (1Yoh 2:15-17) Ke wa ye je mi bami he mlaahi nɛ Yehowa wo ɔ nɔ ɔ, lɔ ɔ ma nyɛ ma ha nɛ nihi nɛ a wo Mawu hɛ mi nyami.—1Pet 2:11, 12.
Ke nihi na tade nɛ i wo, kɛ bɔ nɛ i dla ye he ha a, anɛ a maa na mi kaa nɔ ko nɛ baa e je mi saminya lo?
NYƐƐ HYƐ VIDEO NƐ JI, MOO PEE YEHOWA HUƐ—NYUMU KAKE, YO KAKE. LƆ Ɔ SE Ɔ, NYƐ HA SANE BIMI NƐ ƆMƐ A HETO:
Mɛni he je nɛ nile ngɛ mi kaa wa maa ye je mi bami he mlaahi nɛ Yehowa wo ɔ a nɔ ɔ?
Mɛni he je nɛ e sa kaa fɔli nɛ a tsɔɔ a bimɛ je mi bami he mlaahi nɛ Yehowa wo ɔ kɛ je a jokuɛ mi ɔ?
Mɛni jokuɛwi kɛ nikɔtɔmahi tsuo ma nyɛ maa pee kɛ ye bua nihi konɛ a ná Mawu kpakpa peemi ɔ he se?