KRISTOFOHI A SI HIMI
‘Nyɛ Jé Ma Se Mawu Ɔmɛ Ngɔ Pue He’
Yakob le kaa e sa nɛ a ja Yehowa pɛ, e ngɛ mi kaa jamɛ a be ɔ mi ɔ, Yehowa wui mlaa kɛ kɔ amaga jami he lolo. (2Mo 20:3-5) Enɛ ɔ he ɔ, benɛ Yehowa de lɛ kaa e kpale kɛ ho Betel ya a, Yakob de e we bi ɔmɛ tsuo kaa a je amaga amɛ nɛ ngɛ a dɛ ɔ tsuo kɛ fɔ he. Yakob pu amaga amɛ kɛ tue nya níhi nɛ a wo konɛ a kɛ po a he piɛ ɔ tsuo. (1Mo 35:1-4) Nɔ́ jemi ko be he kaa Yehowa bua jɔ nɔ́ nɛ Yakob pee ɔ he.
Ngɛ wa be nɛ ɔ mi hu ɔ, mɛni wa ma nyɛ maa pee kɛ tsɔɔ kaa wa jaa Yehowa pɛ? Nɔ́ kake nɛ e he hia wawɛɛ nɛ e sa nɛ waa pee ji kaa, wa ma je wa he kɛ je amaga jami aloo mumi yayami kɛ ní tsumi he. Enɛ ɔ biɔ nɛ ke wa ngɛ níhi nɛ kɛ mumi yayamihi ngɛ tsakpa a, wa puɛ mɛ, nɛ jehanɛ se hu ɔ, waa hyɛ níhi nɛ waa kɛ jeɔ wa hɛja a saminya. Kaa nɔ hyɛmi nɔ́ ɔ, mo bi o he ke: ‘Anɛ sinihi nɛ i hyɛɔ aloo womihi nɛ i kaneɔ ɔ kɔɔ nihi nɛ a nuɔ nihi a muɔ, loo gbogboehi nɛ a te si nɛ a yeɔ nihi awi, aloo nihi nɛ a ngɛ he wami slɔɔto ko ɔ a he lo? Anɛ níhi nɛ i kɛ jeɔ ye hɛja a haa nɛ kunya tsumi, nɔ nyuami kɛ nɔ gbiɛmi peeɔ kaa fiɛmi nɔ́ ko kɛkɛ nɛ yi nɔ awi lo?’ E sa nɛ wa je wa he kulaa kɛ je níhi nɛ Yehowa sume ɔmɛ a he.—La 97:10.
NYƐƐ HYƐ VIDEO NƐ JI, “NYƐƐ TE SI KƐ WO ABOSIAMI,” LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Mɛni nyagba nɛ Baiblo mi ní kaselɔ ko nɛ a tsɛɛ lɛ ke Palesa a kɛ kpe?
Mɛni he je nɛ nile ngɛ mi kaa wa ma bi yemi kɛ buami kɛ je asafo mi nikɔtɔma amɛ a ngɔ, ke waa kɛ si fɔfɔɛ ko nɛ kɔɔ mumi yayamihi a he ngɛ kpee ɔ?
Tee si kɛ wo Abosiami, nɛ o hɛ mo kɛ su Mawu he.—Yak 4:7, 8
Ke wa suɔ nɛ Yehowa nɛ po wa he piɛ ɔ, lɛɛ mɛni ji níhi nɛ e sa kaa waa yu wa he kulaa ngɛ a he?
Kɛ Palesa tsu e si fɔfɔɛ ɔ he ní ha kɛɛ?
Ngɛ o kpɔ ɔ mi ɔ, mɛni ji blɔ komɛ a nɔ nɛ o maa gu kɛ yu o he ngɛ daimoniohi a he konɛ a ko ná o nɔ he wami?