Anɛ Mumi Yayami Kɛ Ní Tsumi Ji Fiɛmi Nɔ́ Ko Kɛkɛ Nɛ Yi Nɔ Awi lo?

Kɛ o susu kɛɛ?

• Anɛ tɔmi ngɛ he kaa nɔ ko ma ya bi ní ngɛ klali a ngɔ, dodoe mi hyɛli aloo ní peeli a ngɔ lo?

• Anɛ níhi nɛ nihi deɔ ngɛ mumi yayamihi a he ɔ ji nyaziahi kɛkɛ lo? Anɛ e ji koli simi ngɛ nɔ́ kpakpa kɛ nɔ́ yayami he aloo e ji nɔ́ ko nɛ ngɛ nitsɛnitsɛ nɛ e he ngɛ gbeye lo?

Munyu nɛ ɔ maa tsɔɔ wɔ nɔ́ he je nɛ mumi yayamihi kɛ ní tsumi ma nyɛ maa pee kaa nɔ́ ko nɛ e yí nɔ awi, kɛ nɔ́ he je nɛ e sa kaa waa hyɛ wa he saminya ngɛ he.

• Mɛni ha e peeɔ kaa e yí nɔ awi ɔ?

• Mɛni he je nɛ e sa nɛ waa hyɛ wa he nɛ hi ɔ?

• Nɔ́ nɛ o ma nyɛ maa pee

• Nɔ́ nɛ o juami bi de

Mɛni ha e peeɔ kaa e yí nɔ awi ɔ?

Nihi nɛ a peeɔ hɛja jemi níhi ɔ ná sika babauu kɛ je sɛnihi, TV nɔ ní peemihi, video nɔ fiɛmihi, kɛ womihi nɛ a kɔɔ mumi yayamihi a he ɔ mi. Nihewi kɛ yihewi babauu bua ba jɔ ní komɛ kaa dodoe mi hyɛmi, daimoniohi, sinihi nɛ a nuɔ nihi a muɔ ngɛ mi, kɛ aze kpɛmi he. Mɛni he je a peeɔ jã a? Yi mi tomi he je nɛ a peeɔ jã ji:

• Nɔ́ si kpami: A suɔ nɛ a maa le ke ji kaa mumihi a je ko ngɛ niinɛ lo

• Gbeye yemi: A suɔ nɛ a le nɔ́ nɛ maa ba hwɔɔ se

• Suɔmi kɛ ha weku li aloo huɛmɛ: Nihi bɔɔ mɔde kaa a kɛ a suɔli nɛ a gbo ɔ maa sɛɛ ní

Eko ɔ tɔmi ko be yi mi tomi nɛ ɔmɛ a he mohu lɛɛ. Kaa nɔ hyɛmi nɔ́ ɔ, behi fuu ɔ, adesahi suɔ nɛ a le nɔ́ nɛ maa ba hwɔɔ nɛ a hɛ jaa ngɛ a suɔli nɛ a gbo ɔmɛ a he. Se oslaahi komɛ ngɛ nɛ e sa nɛ o le.

Mɛni he je nɛ e sa nɛ waa hyɛ wa he nɛ hi ɔ?

Baiblo ɔ kɛ kɔkɔ bɔmi nɛ mi wa ha ngɛ nɔ́ fɛɛ nɔ́ nɛ e kɛ mumi yayamihi ngɛ tsakpa a he. Kaa nɔ hyɛmi nɔ́ ɔ, ngmami ɔ de ke:

‘Nyɛ ti nɔ ko kó klaa, e ko pee nyakpɛ ní, e ko nu wɔ, e ko tsu kunya, e ko fi kablɛ, e ko tsɛ kpade, nɛ e ko bi ní hulɔ. Yehowa, o Mawu ɔ sume nihi nɛ tsuɔ níhi nɛ a hiɔ nɛ ɔ.’ ​—5 Mose 18:10-12.

Mɛni he je nɛ Baiblo ɔ tuɔ munyu kɛ siɔ níhi nɛ a kɛ mumi yayami ɔmɛ ngɛ tsakpa a?

• Ke waa peeɔ níhi nɛ a kɛ mumi yayami ɔmɛ ngɛ tsakpa a, lɔ ɔ tsɔɔ kaa wa bua jɔ a he. Baiblo ɔ tsɔɔ kaa bɔfo komɛ tsɔ Mawu hɛ mi atua nɛ lɔ ɔ ha nɛ a ba pee e he nyɛli. (1 Mose 6:2; Jud 6) Bɔfo yayami nɛ ɔmɛ nɛ a tsɛɛ mɛ hu ke daimoniohi ɔ guɔ wɔtsɛmɛ, klaali, kɛ dodoe mi hyɛli a nɔ nɛ a kɛ sisi ɔ nihi. Ke wa peeɔ ní nɛ ɔmɛ ɔ, lɔ ɔ ma ha nɛ waa kɛ Mawu he nyɛli maa pee huɛmɛ.

• Mumi yayamihi nɛ nihi kɛ bɔɔ ɔ haa nɛ a heɔ yeɔ kaa ni komɛ ngɛ nɛ a ma nyɛ maa tsɔɔ nɔ́ nɛ maa ba hwɔɔ se. Se ngɛ anɔkuale mi ɔ, Mawu pɛ lɛ e ma nyɛ maa tsɔɔ níhi nɛ ma ba hwɔɔ se. E de ke: “Níhi tsuo nɛ maa ba hwɔɔ se ɔ, imi ji nɔ nɛ gba kɛ to kɛ je blema lokoo; níhi nɛ na we nɛ a ba lolo ɔ hu, imi lɛ i gba kɛ to.” ​—Yesaya 46:10; Yakobo 4:13, 14.

• Mumi yayamihi nɛ nihi kɛ bɔɔ ɔ sisiɔ mɛ nɛ e haa nɛ a heɔ yeɔ kaa a kɛ nihi nɛ a gbo ɔ ma nyɛ maa tu munyu. Se kɛ̃ ɔ, Baiblo ɔ tsɔɔ kaa: ‘Ni gbogboe ɔmɛ lɛɛ a li nɔ́ ko nɔ́ ko. Ní tsumi, loo yi mi susumi, loo nile, loo ga be gbeje.’​​—Fiɛlɔ 9: 5,10.

Enɛ ɔ he ɔ, Yehowa Odasefohi kuaa ní peepeehi nɛ a kɛ mumi yayami ɔmɛ ngɛ tsakpa a tsuo. Jehanɛ hu ɔ, a hyɛ we sinihi loo hɛja jemi nɛ kɔɔ gbogboehi nɛ a teɔ si nɛ a yeɔ nihi awi, nihi nɛ a nuɔ nihi a muɔ kɛ nihi nɛ a ngɛ he wami slɔɔto ko ɔ a he. Nɔ́ nɛ yiheyo ko nɛ a tsɛɛ lɛ Maria de ji, “Ke i ngɛ sini ko hyɛe nɛ i na kaa mumi yayamihi a ní peepee ko ngɛ mi ɔ, i kpaa hyɛmi amlɔ ɔ nɔuu.”a

Nɔ́ nɛ o ma nyɛ maa pee

• Moo fia o pɛɛ si kaa o maa kua ní peepeehi kɛ sinihi nɛ a kɛ mumi yayamihi ngɛ tsakpa a tsuo konɛ o ‘he nile nɛ e ko bu mo fɔ’​—Ní Tsumi 24:16.

• Mo puɛ níhi nɛ o ngɛ nɛ a kɛ mumi yayami ɔmɛ ngɛ tsakpa a tsuo. Moo kane Ní Tsumi 19:19, 20, nɛ o kadi nɔ hyɛmi nɔ́ kpakpa nɛ Kristofohi nɛ a hi si ngɛ kaseli ɔmɛ a be ɔ mi ɔ pee ngɛ enɛ ɔ blɔ fami ɔ.

Mo kai kaa: Ke o kua ní peepeehi kɛ hɛja jemihi nɛ a kɛ mumi yayami ɔmɛ ngɛ tsakpa a, lɔ ɔ tsɔɔ heii kaa o fĩ Yehowa se. Enɛ ɔ haa nɛ e bua jɔɔ nitsɛ!​—Abɛ 27:11.