Mɛni Wa Ma Nyɛ Maa Kase Kɛ Je Kristofohi Nɛ A Ngɛ Níhi A Si Kpami ɔ A Ngɔ?

Wa ngɛ nyɛmimɛ ngɛ wa we asafo ɔmɛ a mi nɛ a kɛ jehahi babauu sɔmɔ Yehowa. Wa ma nyɛ maa kase ní kɛ je bɔ nɛ a ngɔ a hɛ kɛ fɔ Yehowa nɔ ha a mi. Wa ma nyɛ ma bi mɛ nɛ a de wɔ Yehowa asafo ɔ yi nɔ sane. Jehanɛ hu ɔ, wa ma nyɛ ma bi mɛ nyagbahi nɛ a kɛ kpe kɛ bɔ nɛ Yehowa ye bua mɛ kɛ da nyagba amɛ a nya ha. Wa ma nyɛ maa fɔ nyɛmimɛ nɛ ɔmɛ eko nine nɛ e ba piɛɛ wa he kɛ pee Weku Mawu Jami konɛ wa bi lɛ nɛ e de wɔ níhi a si kpamihi nɛ e ná.

Ke o kɛ jehahi babauu sɔmɔ Yehowa a, moo je o tsui mi nɛ o de nihewi kɛ yihewi níhi a si kpamihi nɛ o ná a. Yakob kɛ Yosef de a bimɛ ɔmɛ a níhi a si kpami ɔmɛ. (1Mo 48:21, 22; 50:24, 25) Pee se ɔ, Yehowa de wekuyihi kaa a tsɔɔ a bimɛ ɔmɛ ní nguanguahi nɛ e tsu ɔ. (5Mo 4:9, 10; La 78:4-7) Mwɔnɛ ɔ hu ɔ, fɔli kɛ ni kpahi nɛ a ngɛ asafo ɔ mi ɔ ma nyɛ ma de nihewi kɛ yihewi ní nguahi nɛ a na kaa Yehowa pee kɛ gu e we asafo ɔ nɔ ɔ.

NYƐƐ HYƐ VIDEO NƐ JI, KAKE PEEMI NGƐ NYA TSIMI SISI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Kɛ asafo ɔ ní tsumi kɔni nɛ ngɛ Austria a ye bua nyɛmimɛ nɛ a ngɛ ma komɛ nɛ a tsi wa ní tsumi ɔ nya ngɛ mi ɔ mi ha kɛɛ?

• Mɛni nyɛmimɛ nɛ a ngɛ ma nɛ ɔmɛ a mi ɔ pee konɛ a hemi kɛ yemi ɔ mi nɛ wa?

• Mɛni he je nɛ fiɛɛli babauu nɛ a ngɛ Romania a je Yehowa asafo ɔ mi ɔ, nɛ mɛni ha nɛ a kpale kɛ ba a?

• Kɛ níhi a si kpami nɛ ɔmɛ woɔ o hemi kɛ yemi ɔ mi he wami ha kɛɛ?