Moo Kase Ní Ngɛ Fiɛɛli Nɛ A Ngɛ Níhi A Si Kpami ɔ A Ngɔ

Wa bua jɔ fiɛɛli nɛ a he be nɛ a ngɛ asafo ɔ mi ɔ a he saminya. A kpɛti ni komɛ kɛ jehahi babauu sɔmɔ Yehowa ngɛ anɔkuale yemi mi. A kpɛti ni komɛ hu ná tsɔsemi lingmi nɛ ɔ, nɛ e ha nɛ a he be ngɛ sɔmɔmi ní tsumi ɔ mi. Fiɛɛli nɛ ɔmɛ na bɔ nɛ Yesu ngɛ Kristofohi asafo ɔ kudɔe ha ngɛ nyagbe ligbi nɛ ɔmɛ a mi kɛ gu fiɛɛmi ní tsumi ɔ nɛ E ngɛ mi blie ɔ nɔ. (Mat. 28:19, 20) Fiɛɛmi ní tsumi ɔ nɛ a kɛ a he woɔ mi ɔ haa nɛ ke a kɛ ka ko kpe ɔ, a náa “he wami kpetekpleenyɛ” nɛ a kɛ daa nya. (2 Kor. 4:7) Níhi fuu ngɛ nɛ wa ma nyɛ maa kase ngɛ fiɛɛli nɛ a ngɛ níhi a si kpami ɔ a ngɔ. Ke wa ha mɛ he blɔ ɔ, a bua maa jɔ he kaa a maa tsɔɔ wɔ níhi nɛ a kase ɔ. (La 71:18) Enɛ ɔ he ɔ, e sa nɛ wa hla he blɔ nɛ waa kase ní ngɛ a ngɔ. Mɛni blɔ nɔ wa maa gu kɛ pee jã?

Ngɛ Fiɛɛmi Mi. Loko fiɛɛli hehi ma nyɛ ma tsu fiɛɛmi ní tsumi ɔ kɛ pi si ɔ, ja a ná tsɔsemi ngɛ fiɛɛli nɛ a ngɛ níhi a si kpami ɔ a ngɔ. Ke a toɔ bɔ nɛ fiɛɛli nɛ a nane pi si ɔ plɛɔ kɛ tsɔɔ ní ha a he hɛ ɔ, a ma nyɛ maa kase níhi fuu ngɛ a ngɔ. (Hyɛ munyu nɛ ji “Yaa Nɔ Nɛ O Fiɛɛ Kɛ Kã” nɛ ngɛ February 15, 2015, Hwɔɔmi Mɔ ɔ ba fa 29-30 kuku 7 ɔ mi ɔ.) Kɛ o ná fiɛɛli nɛ a ngɛ níhi a si kpami nɛ o kɛ mɛ tsu ní ngɛ fiɛɛmi mi ɔ a he se ha kɛɛ?

Moo to blɔ nya nɛ o kɛ fiɛɛlɔ ko nɛ e he be ngɛ fiɛɛmi ni tsumi ɔ mi nɛ ya fiɛɛmi. Ke fiɛɛlɔ ɔ be nɔmlɔ tso mi he wami ɔ, o ma nyɛ maa to blɔ nya konɛ o kɛ o Baiblo mi ní kaselɔ ko ya kase ní ngɛ e ngɔ. Pee se ɔ, o ma nyɛ ma bi fiɛɛlɔ ɔ konɛ e tsɔɔ mo bɔ nɛ e na o ní tsɔɔmi ɔ ha, nɛ e wo mo ga ngɛ he.

O Kɛ Mɛ Nɛ Bɔ: Ke o kɛ fiɛɛli nɛ a he be pɔɔ bɔmi ɔ, lɔ ɔ maa ye bua mo nɛ o maa le mɛ saminya. Moo fɔ a ti nɔ ko nine nɛ e ba piɛɛ nyɛ he kɛ pee nyɛ weku Mawu jami ɔ, nɛ nyɛ bi lɛ munyu. Ke fiɛɛlɔ ɔ be nɔmlɔ tso mi he wami ɔ, o ma nyɛ maa to blɔ nya konɛ o ya piɛɛ e he kɛ pee weku Mawu jami ɔ ngɛ e we mi. O ma nyɛ ma bi lɛ blɔ nɔ nɛ e gu kɛ na anɔkuale ɔ. Mɛni jɔɔmihi e ná? Mɛni nɔ yamihi nɛ e na ngɛ asafo ɔ mi? Mɛni lɛ ha nɛ e ngɛ bua jɔmi ngɛ Yehowa nɛ e ngɛ sɔmɔe ɔ mi?

Moo bɔ mɔde nɛ o nu mɛ sisi, nɛ o ko hyɛ babauu blɔ ngɛ a dɛ pe bɔ nɛ a ma nyɛ. Fiɛɛli nɛ a se kɛ ngɛ asafo ɔ mi ɔ ngɛ dloomi nike ní slɔɔtohi nɛ a kɛ tsuɔ ní ngɛ fiɛɛmi ní tsumi ɔ mi kaa bɔ nɛ e ji ngɛ wɔ hu wa blɔ fami ɔ. (Rom. 12:6-8) A ti ni komɛ wa ngɛ jeha mi, nɛ a be nyɛe ma ná be babauu kɛ ha wɔ. Se kɛ̃ ɔ, níhi fuu ngɛ nɛ wa ma nyɛ maa kase ngɛ a ngɔ, ejakaa a kɛ jehahi babauu sɔmɔ Yehowa ngɛ anɔkuale yemi mi.