O Bua Nɛ Jɔ Kaa O Ná He Blɔ Kɛ Ngɛ Yehowa Sɔmɔe Ngɛ E Mumi Mi Sɔlemi We ɔ

1. Mɛni nɛ bɔfo ko ngɛ dee, nɛ mɛni e sa nɛ lɔ ɔ nɛ ha nɛ waa pee?

KE BƆFO ko suɔ kaa e kɛ mo maa tu munyu ɔ, anɛ o maa bu lɛ tue lo? Ngɛ anɔkuale mi ɔ, mwɔnɛ ɔ, bɔfo ko kɛ “je ma fɛɛ je ma kɛ wɛtso kɛ lilɛ kɛ nihi” ngɛ munyu tue. Mɛni nɛ bɔfo ɔ ngɛ dee? E ngɛ dee ke, “Nyɛɛ ye Mawu gbeye nɛ nyɛɛ wo e hɛ mi nyami . . . Nyɛ ja Nɔ nɛ e bɔ hiɔwe ɔ kɛ zugba a.” (Kpoj. 14:​6, 7) E sa nɛ nɔ fɛɛ nɔ nɛ ja Yehowa nɛ ji anɔkuale Mawu ɔ pɛ. Wa bua jɔ wawɛɛ kaa e ha wɔ he blɔ konɛ wa ja lɛ ngɛ e mumi mi sɔlemi we ngua a mi!

2. Mɛni ji Yehowa mumi mi sɔlemi we ɔ? (Hyɛ daka nɛ ji, “Nɔ́ Nɛ E Tsɔɔ We” ɔ hulɔ.)

² Mɛni tutuutu ji mumi mi sɔlemi we ɔ, nɛ ngmami te nɛɛ lɛ tsɔɔ mi fitsofitso? Mumi mi sɔlemi we ɔ pi tsu nitsɛ nɛ o maa na kɛ o hɛngmɛ. E ji blɔ nya nɛ Yehowa to konɛ kɛ gu Yesu kpɔmi afɔle sami ɔ nɔ ɔ, Yehowa nɛ kplɛɛ wa jami ɔ nɔ. Bɔfo Paulo tsɔɔ blɔ nya tomi nɛ ɔ mi ngɛ sɛ womi nɛ e ngma kɛ ya ha Hebri bi nɛ a ji Kristofohi nɛ ngɛ Yudea a.b

3-4. Mɛni ha nɛ Paulo hao ngɛ Hebri bi nɛ a ji Kristofohi nɛ a ngɛ Yuda a he, nɛ mɛni e pee kɛ ye bua mɛ?

³ Mɛni he je nɛ Paulo ngma sɛ womi kɛ ya ha Hebri bi nɛ a ji Kristofohi nɛ a ngɛ Yudea a? Eko ɔ, ngɛ yi mi tomi titli enyɔ komɛ a he je. Kekleekle ɔ, e pee jã konɛ e kɛ wo mɛ he wami. Loko Hebri bi nɛ ɔmɛ ma ba pee Kristofohi ɔ, a kpɛti nihi fuu ngɛ Yuda jami ɔ mi. Aloo eko ɔ, Yuda jami hɛ mi nyɛɛli ɔmɛ yeɔ a he fɛu akɛnɛ a ba pee Kristofohi ɔ he je. Mɛni he je? Ejakaa Kristofo ɔmɛ be sɔlemi we nɛ a jaa Mawu ngɛ mi, a be afɔle sami la tɛhi nɛ a sãa afɔle ngɛ nɔ, nɛ a be osɔfohi nɛ a tsɔɔ mɛ ní hulɔ. Enɛ ɔ ma nyɛ ma ha nɛ a kɔni mi nɛ jɔ̃, nɛ a hemi kɛ yemi ɔ mi ma gbɔjɔ. (Heb. 2:1; 3:​12, 14) A kpɛti ni komɛ po ma nyɛ maa kpale kɛ ho Yuda jami ɔ mi ya.

⁴ Enyɔne ɔ, Paulo tsɔɔ kaa Hebri bi nɛ ɔmɛ nɛ a ba pee Kristofohi ɔ bɔɛ mɔde kaa a maa nu tsɔɔmi ehehi nɛ ngɛ Mawu Munyu ɔ mi ɔ sisi, nɛ a bɔɛ mɔde kaa a maa nu anɔkualehi nɛ a mi kuɔ, nɛ ji “niye ní nɛ he wa” a sisi hulɔ. (Heb. 5:​11-14) E ngɛ heii kaa ngɛ jamɛ a be ɔ mi ɔ, a ti ni komɛ kɛ Mose Mlaa a ngɛ ní tsue loloolo. Paulo tsɔɔ nya kaa afɔlehi nɛ a sãa ngɛ Mlaa a nya a be nyɛe ma je a he yayami ɔmɛ kɛ je. Enɛ ɔ he je nɛ ‘a po kita momo ɔ mi’ ɔ nɛ. Lɔ ɔ he ɔ, Paulo tsɔɔ mɛ anɔkualehi nɛ a mi kuɔ ɔ ekomɛ. E kai e nyɛmimɛ Kristofo ɔmɛ kaa kɛ gu Yesu kpɔmi afɔle sami ɔ nɔ ɔ, a ma nyɛ ma ná “hɛ kɛ nɔ fɔmi nɛ hi pe kekle nɔ́ ɔ,” nɛ lɔ ɔ ma nyɛ ma ha nɛ a ‘hɛ kɛ su Mawu he.’—Heb. 7:​18, 19.

5. Mɛni nɛ e he hia nɛ waa nu sisi ngɛ Hebri Bi ɔmɛ a womi ɔ mi, nɛ mɛni he je?

⁵ Paulo ha nɛ e nyɛmimɛ Hebri bi nɛ a ji Kristofohi ɔ na kaa bɔ nɛ a jaa Yehowa ha a nɔ kuɔ kulaa pe bɔ nɛ a ja lɛ blema a. Blɔ nɔ nɛ Yuda bi ɔmɛ gu kɛ ja Yehowa a ji “níhi nɛ maa ba amɛ a nini, se nɔ́ ɔ nitsɛnitsɛ ɔ ji Kristo ɔ nɛ.” (Kol. 2:17) Nini ji nɔ́ ko he foni kɛkɛ, se pi nɔ́ ɔ nitsɛ. Jã kɛ̃ nɛ bɔ nɛ Yuda bi ɔmɛ ja Mawu blema a, ji jami nɛ Kristofohi ma ja Mawu ngɛ anɔkuale mi hwɔɔ se ɔ he nini kɛkɛ. E sa nɛ waa nu blɔ nya nɛ Yehowa to konɛ e nyɛ nɛ e ngɔ wa tɔmihi kɛ ke wɔ ɔ sisi konɛ wa nyɛ nɛ wa ja lɛ bɔ nɛ e suɔ. Kaa bɔ nɛ a tsɔɔ ngɛ Hebri Bi ɔmɛ a womi ɔ mi ɔ, nyɛ ha nɛ waa ngɔ “nini” ɔ (nɛ ji blɔ nɔ nɛ Yuda bi ɔmɛ gu kɛ ja Mawu blema a) kɛ to “nɔ́ ɔ nitsɛnitsɛ” (nɛ ji blɔ nɔ nɛ Kristofohi guɔ kɛ jaa Yehowa) a he nɛ waa hyɛ. Jã nɛ wa maa pee ɔ maa ye bua wɔ konɛ waa le nɔ́ nɛ mumi mi sɔlemi we ɔ tsɔɔ nitsɛnitsɛ kɛ bɔ nɛ e kɔɔ wa he ha.

KPE HE BO TSU Ɔ

6. Kɛ a kɛ kpe he bo tsu ɔ tsu ní ha kɛɛ?

⁶ Bɔ nɛ Yuda bi ɔmɛ ja Yehowa ha blema. Paulo ngɔ e munyu ɔ kɛ da kpe he bo tsu ɔ nɛ Mose ma ngɛ jeha 1512 loko a fɔ Kristo ɔ nɔ. (Hyɛ daka nɛ ji, “Bɔ Nɛ Yuda Bi Ɔmɛ Ja Yehowa Ha Kɛ Bɔ Nɛ Kristofohi Jaa Yehowa Ha.”) Kpe he bo tsu ɔ ji tsu nɛ a kɛ bo pee nɛ Israel bi ɔmɛ ngɔɔ kɛ yaa he fɛɛ he ko nɛ a yaa. A kɛ bo tsu nɛ ɔ tsu ní jeha 500 kɛ ya si benɛ a ma Yerusalem sɔlemi we ɔ. (2 Mose 25:​8, 9; 4 Mose 9:22) He nɛ a ma “kpe he bo tsu” ɔ ngɛ ɔ ji he nɛ Israel bi ɔmɛ buaa a he nya nɛ a jaa Mawu nɛ a sãa afɔlehi kɛ haa lɛ ngɛ. (2 Mose 29:​43-46) Se kɛ̃ ɔ, kpe he bo tsu ɔ hu daa si kɛ ha nɔ́ kpakpa ko nɛ maa ba kɛ ha Kristofohi.

7. Mɛni be nɛ mumi mi sɔlemi we ɔ bɔni ní tsumi?

⁷ Bɔ nɛ Kristofohi jaa Yehowa ha. Blema kpe he bo tsu ɔ ngɛ “kaa hiɔwe ní ɔmɛ a henɔ tutuutu kɛ a nini,” nɛ e daa si kɛ ha Yehowa mumi mi sɔlemi we ngua a. Paulo tsɔɔ kaa “bo tsu nɛ ɔ [loo kpe he bo tsu ɔ] ji nɔ́ he tomi nɔ́ kɛ ha mwɔnɛ ɔ be ɔ.” (Heb. 8:5; 9:9) Lɔ ɔ he ɔ, benɛ Paulo ngma sɛ womi ɔ kɛ ya ha Hebri bi nɛ a ji Kristofohi ɔ, mumi mi sɔlemi we ɔ ngɛ ní tsue momo. Mumi mi sɔlemi we ɔ je ní tsumi sisi ngɛ jeha 29 ɔ mi. Jamɛ a jeha a nɛ a baptisi Yesu nɛ a ngɔ mumi klɔuklɔu ɔ kɛ pɔ lɛ nu. Kɛ je lɔ ɔ se ɔ, e bɔni sɔmɔmi kaa “osɔfo nɔkɔtɔma ngua pe kulaa” ngɛ Yehowa mumi mi sɔlemi we ɔ.c—Heb. 4:14; Níts. 10:​37, 38.

OSƆFO NƆKƆTƆMA A

8-9. Ngɛ Hebri Bi 7:​23-27 ɔ nya a, mɛni slɔɔto lɛ ngɛ Israel osɔfo nikɔtɔma amɛ kɛ Yesu Kristo nɛ ji Osɔfo Nɔkɔtɔma ngua a, a kpɛti?

⁸ Bɔ nɛ Yuda bi ɔmɛ ja Yehowa ha blema. Osɔfo nɔkɔtɔma a daa ni ɔmɛ a nane mi kɛ yaa Mawu hɛ mi. Aaron ji nɔ kekleekle nɛ Yehowa hla lɛ kaa osɔfo nɔkɔtɔma ngɛ Israel benɛ a jɔɔ bo tsu ɔ nɔ ɔ. Se Paulo tsɔɔ kaa “e sa nɛ nihi babauu nɛ a ba ye osɔfohi a se, ejakaa gbenɔ ha we nɛ a nyɛ nɛ a ye osɔfo daa.”d (Kane Hebri Bi 7:​23-27.) Akɛnɛ osɔfo nikɔtɔma nɛ ɔmɛ yi mluku he je ɔ, e sa nɛ a sã afɔle ngɛ mɛ nitsɛmɛ a yayami ɔmɛ a he. Enɛ ɔ ha nɛ wa na kaa slɔɔto agbo ngɛ osɔfo nikɔtɔmahi nɛ a hi blema Israel ɔ kɛ Yesu Kristo nɛ ji Osɔfo Nɔkɔtɔma ngua a kpɛti.

⁹ Bɔ nɛ Kristofohi jaa Yehowa ha. Yesu Kristo nɛ ji wa we Osɔfo Nɔkɔtɔma a ji “bo tsu nitsɛnitsɛ ɔ nɛ Yehowa ma se pi adesa nɛ e ma a mi sɔmɔlɔ.” (Heb. 8:​1, 2) Paulo tsɔɔ kaa “akɛnɛ e ngɛ wami mi kɛ yaa neneene he je ɔ, e we osɔfo yemi ɔ be se yeli.” Paulo de hu kaa Yesu ɔ, “mu ko be e he, a je lɛ kɛ je yayami peeli a he.” E kpale de ke, “e he hia we nɛ e sã afɔlehi daa ligbi” kɛ ha lɛ nitsɛ e he yayamihi kaa bɔ nɛ e ji ngɛ osɔfohi nɛ a hi Israel ɔ a blɔ fa mi ɔ. Jehanɛ hu ɔ, wa maa hyɛ slɔɔto nɛ ngɛ afɔle sami la tɛhi kɛ afɔlehi nɛ a sã blema, kɛ blɔ nɔ nɛ Kristofohi guɔ kɛ jaa Yehowa mwɔnɛ ɔ a kpɛti.

AFƆLE SAMI LA TƐHI KƐ AFƆLEHI NƐ A SÃ

10. Mɛni nɛ afɔlehi nɛ a sãa ngɛ akɔblee la tɛ ɔ nɔ ɔ tsɔɔ?

¹⁰ Bɔ nɛ Yuda bi ɔmɛ ja Yehowa ha blema. A pee akɔblee afɔle sami la tɛ ngɛ kpe he bo tsu ɔ nya, nɛ a kɛ lohwehi sãa afɔle ngɛ nɔ. (2 Mose 27:​1, 2; 40:29) Se jamɛ afɔle ɔmɛ nɛ a sãa a nyɛ we nɛ e je ni ɔmɛ a he yayami ɔmɛ kɛ je. (Heb. 10:​1-4) Afɔlehi nɛ a kɛ lohwehi sãa ngɛ bo tsu ɔ nya a daa si kɛ ha afɔle nɛ a maa sã si kake too kɛ kpɔ̃ adesahi kɛ je yayami kɛ gbenɔ dɛ mi ɔ.

11. Mɛni afɔle sami la tɛ nɛ Yesu ngɔ e he kɛ sã afɔle ngɛ nɔ? (Hebri Bi 10:​5-7, 10)

¹¹ Bɔ nɛ Kristofohi jaa Yehowa ha. Yesu le kaa Yehowa tsɔ lɛ kɛ ba zugba a nɔ konɛ e ba ngɔ e wami kɛ ha nɛ e kɛ kpɔ̃ adesahi. (Mat. 20:28) Enɛ ɔ he ɔ, benɛ a baptisi Yesu ɔ, e ngɔ e he kɛ ha kaa e maa pee Yehowa suɔmi nya ní. (Yoh. 6:38; Gal. 1:4) Afɔle sami la tɛ nɛ Yesu ngɔ e he kɛ sã afɔle ngɛ nɔ ɔ daa si kɛ ha Mawu “suɔmi nya ní,” se pi la tɛ nitsɛnitsɛ. Yehowa suɔmi nya ní ji kaa e Bi ɔ nɛ ngɔ e wami nɛ ye mluku ɔ kɛ ha ngɛ adesahi a he. Yesu ngɔ e wami kɛ sã afɔle “si kake nyɔngloo” konɛ e kɛ je nihi tsuo nɛ a ma ná hemi kɛ yemi ngɛ e mi ɔ a he yayami ɔmɛ kɛ je kulaa. (Kane Hebri Bi 10:​5-7, 10.) Amlɔ nɛ ɔ, nyɛ ha nɛ waa hyɛ nɔ́ nɛ kpe he bo tsu ɔ mi ní ɔmɛ daa si kɛ ha.

HE KLƆUKLƆU Ɔ KƐ HE KLƆUKLƆU PE KULAA A

12. Mɛnɔ nɛ e ma nyɛ maa sɛ tsu fɛɛ tsu nɛ ngɛ kpe he bo tsu ɔ mi ɔ mi?

¹² Bɔ nɛ Yuda bi ɔmɛ ja Yehowa ha blema. Sɔlemi we ɔ nɛ a ma ngɛ Yerusalem pee se ɔ, bɔ nɛ e mi ngɛ ha a, ngɛ kaa kpe he bo tsu ɔ mi nɔuu. Tsu enyɔ lɛ ngɛ mi. Lɔ ɔmɛ ji “He Klɔuklɔu” ɔ kɛ “He Klɔuklɔu Pe Kulaa” a, nɛ a ngɔ tsu mi pomi bo kɛ po a kpɛti. (Heb. 9:​2-5; 2 Mose 26:​31-33) Kane tso nɛ a kɛ sika tsu pee, la tɛ nɛ a kɛ sãa tsopa kɛ he via, kɛ okplɔɔ nɛ a kɛ hɛ mi mami abolo maa nɔ ngɛ He Klɔuklɔu ɔ. Nihi ‘nɛ a pɔ mɛ nu, nɛ a wo mɛ osɔfo’ ɔ pɛ nɛ a ngɛ he blɔ kaa a yaa He Klɔuklɔu ɔ, nɛ a ya tsuɔ a ní tsumihi nɛ ngɛ klɔuklɔu ɔ. (4 Mose 3:​3, 7, 10) Somi daka a nɛ a kɛ sika tsu pee ɔ ngɛ He Klɔuklɔu Pe Kulaa a, nɛ lɔ ɔ ji nɔ́ nɛ tsɔɔ kaa Yehowa ngɛ lejɛ ɔ. (2 Mose 25:​21, 22) Daa jeha ngɛ Kpatami Ligbi ɔ nɔ ɔ, osɔfo nɔkɔtɔma a pɛ lɛ ngɛ he blɔ kaa e guɔ he nɛ tsu mi pomi bo ɔ ngɛ ɔ kɛ ya sɛɔ He Klɔuklɔu Pe Kulaa a. (3 Mose 16:​2, 17) Daa jeha a, e ngɔɔ lohwehi nɛ a kɛ maa sã afɔle ɔ a muɔ kɛ yaa lejɛ ɔ nɛ e kɛ ya sãa kpatami afɔle kɛ haa lɛ nitsɛ e he kɛ ma a tsuo. Bɔɔbɔɔbɔɔ ɔ, Yehowa gu e mumi klɔuklɔu ɔ nɔ kɛ ha nɛ wa na heii kaa níhi nɛ ya nɔ ngɛ bo tsu ɔ mi ɔ ji níhi nɛ maa ba hwɔɔ se ɔ a he nini.—Heb. 9:​6-8.e

13. Kɛ Kristofohi nu He Klɔuklɔu kɛ He Klɔuklɔu Pe Kulaa nɛ ngɛ bo tsu ɔ mi ɔ sisi ha kɛɛ?

¹³ Bɔ nɛ Kristofohi jaa Yehowa ha. A pɔ Kristo kaseli ɔmɛ ekomɛ nu kɛ mumi klɔuklɔu ɔ, nɛ huɛ bɔmi klɛdɛɛ ko ba ngɛ a kɛ Yehowa a kpɛti. Nimli nɛ ɔmɛ a yibɔ ji 144,000, nɛ a kɛ Yesu ma sɔmɔ kaa osɔfohi ngɛ hiɔwe. (Kpoj. 1:6; 14:1) He Klɔuklɔu ɔ nɛ ngɛ bo tsu mi ɔ daa si kɛ ha nimli 144,000 ɔ, nɛ Mawu kplɛɛ a nɔ kaa e mumi mi bimɛ be mi nɛ a ngɛ zugba a nɔ loloolo. (Rom. 8:​15-17) He Klɔuklɔu Pe Kulaa a nɛ ngɛ bo tsu ɔ mi ɔ daa si kɛ ha hiɔwe, he nɛ Yehowa ngɛ ɔ. “Tsu mi pomi bo ɔ” nɛ a kɛ po He Klɔuklɔu ɔ kɛ He Klɔuklɔu Pe Kulaa a kpɛti ɔ daa si ha Yesu nɔmlɔ tso loo e he lo ɔ. Akɛnɛ Yesu ji nɔmlɔ he je ɔ, e be nyɛe maa ya hiɔwe kaa Osɔfo Nɔkɔtɔma Ngua pe kulaa ngɛ mumi mi sɔlemi we ɔ mi. Yesu ngɔ e nɔmlɔ tso ɔ kɛ sã afɔle ngɛ adesahi a he, nɛ lɔ ɔ bli blɔ kɛ ha Kristofohi tsuo nɛ a pɔ mɛ nu ɔ konɛ a nyɛ nɛ a ya hiɔwe. Akɛnɛ nihi nɛ a pɔ mɛ nu ɔ be nyɛe maa ngɔ adesa nɔmlɔ tso kɛ ya hiɔwe he je ɔ, e ma bi nɛ a ngmɛɛ he. (Heb. 10:​19, 20; 1 Kor. 15:50) Benɛ a tle Yesu si se ɔ, e sɛ He Klɔuklɔu Pe Kulaa a ngɛ mumi mi sɔlemi we ɔ, nɛ nyagbenyagbe ɔ, nihi tsuo nɛ a pɔ mɛ nu ɔ hu ma ya piɛɛ e he ngɛ lejɛ ɔ.

14. Ngɛ Hebri Bi 9:​12, 24-26 nya a, mɛni ha nɛ bɔ nɛ a jaa Yehowa ha ngɛ e mumi mi sɔlemi we ɔ hi kulaa pe bɔ nɛ Yuda bi ɔmɛ ja lɛ ha blema a?

¹⁴ Kɛ gu Yesu Kristo kpɔmi afɔle sami kɛ e we osɔfo yemi ɔ nɔ ɔ, Yehowa to blɔ nya nɛ́ a ja lɛ ngɛ anɔkuale mi. E ngɛ heii kaa blɔ nya tomi nɛ ɔ nɔ kuɔ kulaa pe bɔ nɛ Yuda bi ɔmɛ ja Yehowa ha blema a. Ngɛ blema Israel ɔ, osɔfo nɔkɔtɔma a ngɔɔ lohwehi nɛ a kɛ sã afɔlehi ɔ a muɔ kɛ sɛɛ He Klɔuklɔu Pe Kulaa nɛ a kɛ nine pee ɔ, se Yesu lɛɛ e sɛ he klɔuklɔu pe kulaa nɛ ji “hiɔwe nitsɛ,” ngɛ Yehowa hɛ mi. Enɛ ɔ pã nɔ́ nɛ a kɛ nine pee ɔ. Lejɛ ɔ nɛ Yesu ngɔ he blɔ nɛ e ngɛ kaa e maa hi si ngɛ zugba a nɔ kaa adesa nɛ e ye mluku ɔ kɛ ha ngɛ, “konɛ kɛ gu lɛ nitsɛ e he nɛ e kɛ sã afɔle ɔ nɔ ɔ, e je yayami kɛ je.” (Kane Hebri Bi 9:​12, 24-26.) Yesu afɔle sami ɔ pɛ lɛ ma nyɛ ma je yayami kɛ je kulaa. Wa maa na kaa ke wa ngɛ hɛ nɔ kami kaa wa maa ya hiɔwe jio, wa ngɛ hɛ nɔ kami kaa wa maa hi si kɛ ya neneene ngɛ zugba a nɔ jio, wɔ tsuo wa ma nyɛ ma sɔmɔ Yehowa ngɛ e mumi mi sɔlemi we ɔ.

BO TSU Ɔ YALE ƆMƐ

15. Mɛnɔ nɛ e sɔmɔɔ ngɛ yale ɔ mi ngɛ kpe he bo tsu ɔ mi?

¹⁵ Bɔ nɛ Yuda bi ɔmɛ ja Yehowa ha blema. Yale kake pɛ lɛ ngɛ kpe he bo tsu ɔ mi. Yale ɔ ji he ko nɛ e kle nɛ a po piɛ kɛ bɔle lɛ, nɛ osɔfo ɔmɛ tsuɔ a ní tsumi ɔmɛ ngɛ lejɛ ɔ. Akɔblee la tɛ ngua a nɛ a sãa sami afɔle ngɛ nɔ, kɛ akɔblee kã nɛ nyu ngɛ mi nɛ osɔfo ɔmɛ kɛ fɔɔ a dɛ kɛ a nane he loko a tsuɔ ní tsumi nɛ ngɛ klɔuklɔu ɔ ngɛ yale ɔ mi. (2 Mose 30:​17-20; 40:​6-8) Se ngɛ sɔlemi wehi nɛ a ma pee se ɔ a mi ɔ, a po yale ngɛ kpo ɔ nɔ, konɛ nihi nɛ a pi osɔfohi ɔ nɛ a da lejɛ ɔ kɛ sɔmɔ Mawu.

16. Mɛnɔmɛ nɛ a sɔmɔɔ ngɛ yale ɔmɛ eko fɛɛ eko mi ngɛ mumi mi sɔlemi we ngua a mi?

¹⁶ Bɔ nɛ Kristofohi jaa Yehowa ha. Loko nihi nɛ a pɔ mɛ nu nɛ a piɛ ngɛ zugba a nɔ ɔ ma ya piɛɛ Yesu he kɛ sɔmɔ kaa osɔfohi ngɛ hiɔwe ɔ, e sa nɛ a kɛ anɔkuale yemi nɛ sɔmɔ Yehowa ngɛ mumi mi sɔlemi we ɔ yale ɔ mi. Kã ngua a nɛ nyu ngɛ mi ngɛ kpe he bo tsu ɔ he ɔ kaiɔ osɔfo ɔmɛ kaa e sa nɛ a he nɛ tsɔ, nɛ jã nɔuu nɛ e sa nɛ Kristofohi tsuo hu a he nɛ tsɔ ngɛ he lo mi kɛ mumi mi tsuo. Ke jã a, lɛɛ jije nɛ “asafo kuu ngua” a nɛ a kɛ anɔkuale yemi fĩɔ nihi nɛ a pɔ mɛ nu ɔ a se ɔ sɔmɔɔ Yehowa ngɛ? Bɔfo Yohane na mɛ nɛ a “daa si ngɛ matsɛ sɛ ɔ” hɛ mi, nɛ ji sɔlemi we ɔ yale nɛ ngɛ kpo ɔ nɔ ɔ mi, “nɛ a ngɛ [Mawu] sɔmɔe ngɛ blɔ nɛ ngɛ klɔuu nɔ nyɔ kɛ pia ngɛ e sɔlemi we ɔ.” (Kpoj. 7:​9, 13-15) Wa bua jɔ wawɛɛ kaa Yehowa ha wɔ he blɔ ngua nɛ ɔ kaa wa sɔmɔ lɛ ngɛ anɔkuale mi ngɛ e mumi mi sɔlemi we ngua a mi!

WA NÁ HE BLƆ KƐ NGƐ YEHOWA SƆMƆE

17. Mɛni afɔlehi nɛ wa ná he blɔ kaa wa maa sã ha Yehowa?

¹⁷ Mwɔnɛ ɔ, Kristofohi tsuo ná he blɔ kɛ ngɛ Yehowa sɔmɔe, nɛ a ngɔɔ a be, a he wami kɛ a he lo nya níhi kɛ fĩɔ Mawu Matsɛ Yemi ɔ se. Kaa bɔ nɛ bɔfo Paulo de Hebri bi nɛ a ji Kristofohi ɔ, wa ma nyɛ maa “sã yi jemi afɔle ha Mawu be fɛɛ be, lɔ ɔ ji yiblii nɛ wa nya woɔ nɛ e jajeɔ e biɛ ɔ ngɛ ma hɛ mi ɔ nɛ.” (Heb. 13:15) Ke waa kɛ wa nyɛmi tsuo sɔmɔ Yehowa a, lɔ ɔ tsɔɔ kaa wa bua jɔ he blɔ nɛ wa ná kɛ ngɛ lɛ sɔmɔe ɔ he.

18. Ngɛ Hebri Bi 10:​22-25 ɔ nya a, mɛni nɛ e sɛ kaa wa ma wa hɛ kɛ fɔ nɔ, nɛ mɛni nɛ e sɛ nɛ wa hɛ nɛ je nɔ kɔkɔɔkɔ?

¹⁸ Kane Hebri Bi 10:​22-25. Benɛ bɔfo Paulo yaa mwɔ sɛ womi nɛ e ngma kɛ ha Hebri bi ɔmɛ ɔ nya a, e tu níhi nɛ a he hia nɛ e sa nɛ waa pee konɛ wa nyɛ nɛ wa sɔmɔ Mawu ɔ he munyu. Ní nɛ ɔmɛ ekomɛ ji sɔlemi, fiɛɛmi ní tsumi ɔ, kɛ asafo mi kpehi nɛ wa maa ya. Jehanɛ hu ɔ, e sa nɛ waa wo wa sibi he wami “nɛ waa hi jã pee wawɛɛ nitsɛ be mi nɛ [wa] na kaa [Yehowa] ligbi ɔ ngɛ sue ɔ.” Benɛ e piɛ bɔɔ nɛ a maa gbe Kpo Jemi womi ɔ ngmami nya a, Yehowa bɔfo ko de ke: “[Nyɛ] ja Mawu!” Bɔfo ɔ ti munyu nɛ ɔ mi si enyɔ sɔuu. (Kpoj. 19:10; 22:9) Wa kase anɔkuale komɛ nɛ a mi kuɔ kɛ kɔ Yehowa mumi mi sɔlemi we ngua a he. E sɛ nɛ wa hɛ nɛ je anɔkuale nɛ ɔmɛ a nɔ gblegbleegble. Jehanɛ hu ɔ, e sa nɛ wa bua nɛ jɔ wawɛɛ kaa wa ná he blɔ kɛ ngɛ Yehowa sɔmɔe!