A Hla Nihi Enyɔ Kɛ Piɛɛ Blɔ Tsɔɔmi Ajla Toli Ɔmɛ A He
NGƐ Sɔ January 18, 2023 ɔ nɔ ɔ, a fia adafi klɛdɛɛ ko ngɛ jw.org ɔ nɔ. A ha nɛ wa le kaa a hla Nyɛminyumu Gage Fleegle kɛ Nyɛminyumu Jeffrey Winder kɛ piɛɛ Yehowa Odasefohi a Blɔ Tsɔɔmi Ajla Toli ɔmɛ a he. Nyɛminyumu nɛ ɔmɛ kɛ jehahi babauu sɔmɔ Yehowa ngɛ anɔkuale mi.
Gage Fleegle kɛ e yo Nadia
Nyɛminyumu Fleegle fɔli ji Kristofohi nɛ a yeɔ Mawu gbeye, nɛ a tsɔse lɛ ngɛ anɔkuale ɔ mi ngɛ U.S.A. ma nɛ ji western Pennsylvania a mi. Benɛ e ji niheyo ɔ, e weku ɔ hia kɛ ya hi kɔpe ko nɛ fiɛɛli a he pi ngɛ lejɛ ɔ. Be bɔɔ se ɔ, a baptisi lɛ ngɛ November 20, 1988.
Nyɛminyumu Fleegle fɔli ɔmɛ woɔ lɛ he wami kaa e kɛ e he nɛ wo be tsuo sɔmɔmi ní tsumi ɔ mi. Behi fuu ɔ, kpɔ mi nɔ hyɛli kɛ nihi nɛ a tsuɔ ní ngɛ Betel ba hwɔɔ a we ɔ mi. Enɛ ɔ ha nɛ Nyɛminyumu Fleegle na kaa nyɛmimɛ nɛ ɔmɛ ngɛ bua jɔmi wawɛɛ. Benɛ a baptisi lɛ be bɔɔ se ɔ, e ba pee daa blɔ gbalɔ ngɛ September 1, 1989 ɔ mi. Jeha enyɔ se ɔ, e nyɛ nɛ e su oti nɛ e kɛ ma e hɛ mi benɛ e ye jeha 12 ɔ he, nɛ lɔ ɔ ji kaa e ma ya sɔmɔ ngɛ Betel. E bɔni sɔmɔmi ngɛ Brooklyn Betel ngɛ October 1991 ɔ mi.
Ngɛ Betel ɔ, Nyɛminyumu Fleegle kɛ jeha kpaanyɔ tsu ní ngɛ he nɛ a peeɔ womi ngɛ. Lɔ ɔ se ɔ, a ha nɛ e ya tsu ní ngɛ Service Department. Ngɛ jamɛ a be ɔ mi ɔ, e hi asafo ko nɛ a tuɔ Russia gbi ngɛ mi ɔ mi jeha bɔɔ. Ngɛ Jeha 2006 mi ɔ, e kɛ Nadia sɛ gba si himi mi, nɛ e ba piɛɛ e he kɛ sɔmɔ ngɛ Betel. Mɛ ni enyɔ ɔmɛ tsuo a ye bua kɛ tsu fiɛɛmi ní tsumi ɔ ngɛ Portuguese asafo ko mi, nɛ a kɛ jeha nyɔngma kɛ se ye bua kɛ tsu fiɛɛmi ní tsumi ɔ ngɛ Spanish asafo ko mi hulɔ. Benɛ Nyɛminyumu Fleegle kɛ jeha babauu sɔmɔ ngɛ Service Department ɔ se ɔ, a ha nɛ e ya tsu ní ngɛ Ajla Toli Nɛ A Hyɛɛ Ní Tsɔɔmi Nɔ ɔ a ɔfisi ɔ. Pee se ɔ, e ya tsu ní ngɛ Ajla Toli Nɛ A Hyɛɛ Sɔmɔmi Ní Tsumi ɔ Nɔ ɔ a ɔfisi ɔ. Ngɛ March 2022 ɔ, a hla lɛ kaa Ajla Toli Nɛ A Hyɛɛ Sɔmɔmi Ní Tsumi ɔ Nɔ ɔ a yemi kɛ bualɔ.
Jeffrey Winder kɛ e yo Angela
A tsɔse Nyɛminyumu Winder ngɛ Murrieta ngɛ California ngɛ U.S.A. E fɔli ɔmɛ tsɔse lɛ ngɛ anɔkuale ɔ mi, nɛ a baptisi lɛ ngɛ March 29, 1986 mi. Benɛ a baptisi lɛ ɔ, nyɔhiɔ nɛ nyɛɛ se pɛ ɔ, e ba pee blɔ gbali a walɔ. Akɛnɛ e bua jɔ blɔ gbali a wami ní tsumi ɔ he he je ɔ, e suɔ nɛ e tsa nɔ nɛ e tsu. Benɛ e kɛ nyɔhiɔhi babauu sɔmɔ kaa blɔ gbali a walɔ ɔ, e je daa blɔ gbami ní tsumi ɔ sisi ngɛ October 1, 1986 mi.
Benɛ Nyɛminyumu Winder yi jeha nyingmi enyɔ lolo ɔ, e ya slaa e nyɛminyumu nikɔtɔmahi enyɔ nɛ a ngɛ sɔmɔe ngɛ Betel. Enɛ ɔ ha nɛ e bua jɔ he kaa ke e wa a, e ma ya sɔmɔ ngɛ Betel. Ngɛ May 1990 ɔ mi ɔ, a fɔ lɛ nine kaa e ya sɔmɔ ngɛ Wallkill Betel.
Ngɛ Betel ɔ, Nyɛminyumu Winder tsu ní ngɛ he slɔɔtohi. E tsu ní ngɛ Cleaning Department, kɛ Farm Department, kɛ Bethel Office. E kɛ Angela sɛ gba si himi mi ngɛ jeha 1997 ɔ mi, nɛ mɛ tsuo a ya nɔ nɛ a sɔmɔ ngɛ Betel. Ngɛ jeha 2014 ɔ mi ɔ, a ha nɛ a ho Warwick ya. Ngɛ lejɛ ɔ, Nyɛminyumu Winder ye bua kɛ ma asafo ɔ ní tsumi yi ɔ. Ngɛ jeha 2016 mi ɔ, a ha nɛ a ya sɔmɔ ngɛ Watchtower Educational Center ngɛ Patterson. Ngɛ lejɛ ɔ, Nyɛminyumu Winder ya tsu ní ngɛ Audio/Video Services. Jeha eywiɛ se ɔ, a kpale kɛ ho Warwick ya nɛ Nyɛminyumu Winder ya tsu ní ngɛ Ajla Toli Nɛ A Hyɛɛ Betel Ní Tsuli A Nɔ ɔ a ɔfisi ɔ. Ngɛ March 2022 ɔ mi ɔ, a hla lɛ kaa Ajla Toli Nɛ A Hyɛɛ Betel Ní Tsuli A Nɔ ɔ a yemi kɛ bualɔ.
Wa sɔlemi ji kaa Yehowa maa jɔɔ nyumu nɛ ɔmɛ nɛ a ji ‘nike ní’ kɛ ha wɔ ɔ, be mi nɛ a yaa nɔ nɛ a tsuɔ ní wawɛɛ nɛ a kɛ Matsɛ Yemi ɔ yeɔ kekleekle blɔ he ɔ.—Efe. 4:8.