Yehowa Bu Ye Sɔlemi Ɔmɛ Tue

SLAAMI KO NƐ TSAKE YE SI HIMI

A fɔ mi ngɛ December 22, 1929 ngɛ Noville. E ji kɔpe ko nɛ e kɛ Bastogne nɛ ngɛ Belgium kpokpa nɛ ji Ardennes he kɛ we. I kaiɔ bua jɔmi nɛ i náa benɛ i kɛ ye fɔli ɔmɛ yaa ngmɔ mi ngɛ ye jokuɛwi a si ɔ. I kɛ ye nyɛminyumu wayoo Raymond ngaa na nyɔ nyu daa ligbi, nɛ wa ngɔɔ kɛ baa we mi. Ngɛ kɔpe nɛ ɔ mi ɔ, wa yeɔ buaa wa sibi kɛ tsuɔ ní.

A tsɛɛ ye papaa ke Emile nɛ a tsɛɛ ye mami hu ke Alice. Mɛ tsuo a bua jɔ Katoliki jami ɔ he wawɛɛ. Daa Hɔgba a, a kɛ a he woɔ gbijlɔ nɛ a tsɛɛ ke Mass ɔ mi. Se maa pee jeha 1939 ɔ mi ɔ, blɔ gbali nɛ a je England ba wa kɔpe ɔ mi, nɛ a de ye papaa kaa a maa to blɔ nya konɛ a bɔni lɛ Consolation womi tɛtlɛɛ ɔ eko hami be fɛɛ be (amlɔ nɛ ɔ, a tsɛɛ womi tɛtlɛɛ nɛ ɔ ke Awake!). Oya nɔuu nɛ ye papaa na kaa níhi nɛ ngɛ womi tɛtlɛɛ nɛ ɔmɛ a mi ɔ ji anɔkuale, nɛ e bɔni Baiblo ɔ kanemi. Benɛ ye papaa kpa Mass yami ɔ, wa huɛmɛ nɛ a ngɛ kpɔ ɔ mi ɔ te si kɛ wo wɔ wawɛɛ. A nyɛ ye papaa nɔ konɛ e hi Katoliki jami ɔ mi, nɛ a kɛ lɛ bɔni munyu he huami.

E dɔ mi wawɛɛ kaa ye papaa kɛ si fɔfɔɛ ko kaa jã kpe. Enɛ ɔ ha nɛ i je ye tsui mi nɛ i sɔle kɛ ha Mawu. Jamɛ a sɔlemi ɔ nɛ i tu he munyu sisije ɔ nɛ. Benɛ i na kaa nihi nɛ waa kɛ mɛ ngɛ kpɔ ɔ mi ɔ kpa ye papaa haomi ɔ, ye bua jɔ wawɛɛ. Enɛ ɔ ha nɛ i ná nɔ mi mami kaa Yehowa ji “sɔlemi Tue Bulɔ.”

NGƐ JE MI TA ENYƆNE Ɔ MI

Nazi nɔ yemi nɛ ngɛ Germany ɔ ya tua Belgium ma a ngɛ May 10, 1940 ɔ mi, nɛ enɛ ɔ ha nɛ nihi fuu tu fo kɛ je ma a mi. Wa weku ɔ tu fo kɛ ho France woyi je ya. Benɛ wa ngɛ blɔ ɔ nɔ kɛ yaa a, wa wami ya je oslaa mi si abɔ, ejakaa wa naa Germany ta buli kɛ France ta buli nɛ a kɛ a sibi ngɛ ta hwue.

Benɛ wa kpale kɛ ba wa ngmɔ ɔ mi ɔ, wa na kaa a muɔɔ wa níhi hiɛhiɛɛ kɛ je. Bobbie nɛ ji wa gbe ɔ pɛ lɛ e piɛ, nɛ e nya wa he. Níhi nɛ ya nɔ ɔ ha nɛ i bi ye he ke, ‘Mɛni he je nɛ a ngɛ ta hwue nɛ nihi ngɛ nɔ́ nae ɔ?’

Jamɛ a be ɔ mi ɔ, Nyɛminyumu Emile Schrantza nɛ e ji asafo mi nɔkɔtɔma kɛ blɔ gbalɔ ɔ ba slaa wɔ, nɛ e wo wɔ he wami wawɛɛ. E da Baiblo ɔ nɔ kɛ tsɔɔ wɔ nɔ́ he je nɛ nihi ngɛ nɔ́ nae, nɛ e ha sane bimihi nɛ a ngɛ ye nyagbae ngɛ si himi mi ɔ a heto. Enɛ ɔ ha nɛ huɛ bɔmi nɛ mi wa hi i kɛ Yehowa wa kpɛti, nɛ i ná nɔ mi mami kaa e ji Mawu nɛ ngɛ suɔmi.

Loko ta a maa ba nyagbe po ɔ, wa weku ɔ kɛ Odasefohi kpahi nyɛɔ nɛ a sɛɛɔ ní saminya. Ngɛ August 1943 ɔ mi ɔ, Nyɛminyumu José-Nicolas Minet ba slaa wɔ ngɛ wa ngmɔ ɔ nɔ, nɛ e tu munyu ko. E bi ke, “Mɛnɔ suɔ kaa a baptisi lɛ?” Ye papaa wo e nine nɔ, nɛ imi hu i pee jã. Enɛ ɔ he ɔ, a baptisi wɔ ngɛ pa nyafii ko nɛ kɛ wa ngmɔ ɔ he kɛ we ɔ mi.

Ngɛ December 1944 ɔ mi ɔ, Germany ta buli ɔmɛ ba tua Yuropa pusinɔ he je. Enɛ ɔ ji nyagbe tuami nɛ nya wa wawɛɛ. A tsɛɛ tuami nɛ ɔ ke Battle of the Bulge. Wa we ɔ kɛ he nɛ a ngɛ ta a hwue ngɛ ɔ kɛ we. Enɛ ɔ he je ɔ, wa ya laa wa he ngɛ tsu bi ko nɛ ngɛ wa we ɔ sisi ɔ mi maa pee nyɔhiɔ kake. Ligbi ko nɛ i yaa ha lohwe ɔmɛ ní ɔ, a fia bomb kɛ ba nɔ wa ngmɔ ɔ mi, nɛ e tle tsu nɛ wa toɔ lohwe ɔmɛ a niye ní ngɛ mi ɔ yi mi. Amerika ta bulɔ ko nɛ ngɛ lohwe ɔmɛ a tsu ɔ mi ɔ kpa ngmlaa ke, “Hwɔ si ngɛ zugba!” I tu fo kɛ ya ná lɛ nɛ i hwɔ si ngɛ e kasa nya, nɛ e ngɔ e dade pɛɛ ɔ kɛ bu ye yi konɛ e kɛ po ye he piɛ.

NÍHI A SI KPAMIHI NƐ I NÁ BENƐ I NGƐ HƐ MI YAE NGƐ ASAFO Ɔ MI

Benɛ ta a se po ɔ, wa nyɛ nɛ waa kɛ nyɛmimɛ nɛ a ngɛ asafo ko mi ngɛ Liège ɔ sɛɛ ní. He nɛ wa ngɛ ɔ kɛ ma nɛ ɔ he kɛmi maa su si tomi 56. Bɔɔbɔɔbɔɔ ɔ, wa nyɛ nɛ wa to kuu nyafii ko sisi ngɛ Bastogne nɛ wa kaseɔ Baiblo ɔ. I bɔni ní tsumi ngɛ ní tsumi he ko nɛ a ngɔɔ tó ngɛ, nɛ i ná he blɔ kɛ kase mlaa he ní. Pee se ɔ, i ya tsu ní ngɛ amlaalo nɛ ngɛ kpɔ ɔ mi ɔ ɔfisi. Ngɛ jeha 1951 ɔ mi ɔ, wa pee kpɔ mi kpe wayoo ko ngɛ Bastogne. Nihi nɛ a ba kpe ɔ maa su lafa, nɛ nyɛmiyo ko nɛ a tsɛɛ lɛ ke Elly Reuter nɛ ji daa blɔ gbalɔ nɛ e kɛ kã tsuɔ fiɛɛmi ní tsumi ɔ hu piɛɛ he. E kuɔ baisikle kɛ ba kpe ɔ, nɛ e he lɛ si tomi maa pee 31. E kɛ we nɛ wa ná wa sibi a he suɔmi, nɛ i wo lɛ si kaa i kɛ lɛ maa sɛ gba si himi mi. Loko i kɛ Elly maa kpe ɔ, a fɔ lɛ nine kaa e ya Gilead Sukuu nɛ a peeɔ ngɛ United States ɔ eko. Enɛ ɔ he ɔ, e ngma kɛ ya asafo ɔ ní tsumi yi ɔ, nɛ e tsɔɔ mɛ nɔ́ he je nɛ e be nyɛe maa ya. Jamɛ a be ɔ, Nyɛminyumu Knorr ji nɔ nɛ ngɛ asafo ɔ hɛ mi nyɛɛe, lɔ ɔ he ɔ, e je mi mi jɔmi mi nɛ e ha lɛ heto ke, eko ɔ, hwɔɔ se ko ɔ, o kɛ o huno ɔ ma ná he blɔ kɛ ya Gilead Sukuu ɔ. Wa sɛ gba si himi mi ngɛ February 1953 ɔ mi.

Ngɛ jamɛ a jeha a mi nɔuu ɔ, i kɛ Elly ya New World Society Assembly kpe nɛ a pee ngɛ Yankee Stadium ngɛ New York ɔ eko. I kɛ nyɛminyumu ko kpe ngɛ lejɛ ɔ, nɛ e ha mi ní tsumi ko nɛ e he hiɔwo ɔ hi, nɛ e de mi kaa ma ba hi United States. I kɛ Elly sɔle ngɛ he, nɛ wa mwɔ wa yi mi kpɔ kaa i be jamɛ a ní tsumi ɔ tsue. Wa kpale kɛ ho Belgium ya nɛ wa ya ye bua kuu nyafii ko nɛ fiɛɛli nyɔngma pɛ lɛ ngɛ mi ngɛ Bastogne ɔ. E we jeha a, wa fɔ binyumu, nɛ wa wo lɛ biɛ ke Serge. Aywilɛho sane ji kaa benɛ jokuɛ ɔ ye nyɔhiɔ kpaago pɛ ɔ, hiɔ ko fia lɛ nɛ e gbo. Enɛ ɔ hao wɔ wawɛɛ, nɛ wa sɔle kɛ ha Yehowa, nɛ gbogboehi a si tlemi ɔ he hɛ kɛ nɔ fɔmi ɔ wo wɔ he wami.

BE TSUO SƆMƆMI NÍ TSUMI Ɔ

Ngɛ October 1961 ɔ, i ná ní tsumi ko nɛ be ye be tsuo ngɔe, nɛ lɔ ɔ ye bua mi nɛ i nyɛ nɛ i tsu blɔ gbami ní tsumi ɔ. Jamɛ a ligbi ɔ, Belgium asafo ní tsumi kɔni ɔ nɔ hyɛlɔ ɔ tsɛ mi ngɛ fon nɔ, nɛ e bi mi ke ji ma suɔ kaa ma sɔmɔ kaa circuit servant lo, (amlɔ nɛ ɔ, a tsɛɛ lɛ ke kpɔ mi nɔ hyɛlɔ). I bi lɛ ke, “Anɛ wa ma nyɛ ma sɔmɔ kaa daa blɔ gbali kekle loko waa kplɛɛ ní tsumi nɛ ɔ nɔ lo?” A kplɛɛ nɔ kaa waa pee jã. Benɛ wa sɔmɔ kaa daa blɔ gbali nyɔhiɔ kpaanyɔ se ɔ, wa je kpɔ mi nɔ hyɛmi ní tsumi ɔ sisi ngɛ September 1962 ɔ mi.

Benɛ wa tsu kpɔ mi nɔ hyɛmi ní tsumi ɔ jeha enyɔ se ɔ, a fɔ wɔ nine kaa wa ya sɔmɔ ngɛ Brussels Betel. Wa bɔni sɔmɔmi ngɛ lejɛ ɔ ngɛ October 1964. Wa ná jɔɔmihi fuu ngɛ ní tsumi nɛ ɔ mi. E kɛ we nɛ Nyɛminyumu Knorr ba slaa jamɛ a Betel ɔ ngɛ jeha 1965 ɔ mi, nɛ e pee mi nyakpɛ kaa e hla mi konɛ ma sɔmɔ kaa asafo ɔ ní tsumi kɔni ɔ nɔ hyɛlɔ. Pee se ɔ, a fɔ i kɛ Elly nine kaa waa ya Gilead Sukuu nɛ to nɔ 41 ɔ. Munyu ko nɛ Nyɛminyumu Knorr tu jeha 13 nɛ be ɔ ba mi! Benɛ wa gbe sukuu ɔ nya a, wa kpale kɛ ya Betel ngɛ Belgium.

WA FÃ YEHOWA WE BI A HE NGƐ MLAA NYA

Akɛnɛ i le mlaa he nɔ́ ko he je ɔ, i ngɔ jamɛ a he blɔ ɔ kɛ fã Yehowa we bi a he ngɛ Yuropa kɛ he kpahi konɛ a nyɛ nɛ a sɔmɔ Yehowa faa. (Filip. 1:7) Enɛ ɔ he ɔ, i ba le ma nikɔtɔmahi fuu nɛ a ngɛ mahi nɛ hiɛ pe 55 nɛ a tsi wa ní tsumi ɔ nya ngɛ mi ɔ mi. Ke wa ngɛ sane ko he ní tsue ɔ, i ha we nɛ nihi leɔ kaa i le mlaa he nɔ́ ko, mohu ɔ, i deɔ mɛ kaa “Mawu nɔmlɔ ji mi.” Be fɛɛ be ɔ, i sɔleɔ, nɛ i ngɔɔ ye hɛ kɛ fɔɔ Yehowa nɔ, ejakaa i le kaa “matsɛ [loo kojolɔ] tsui ngɛ kaa nyu dɔhi ngɛ Yehowa dɛ mi. E kudɔɔ lɛ kɛ yaa he fɛɛ he nɛ e suɔ.”—Abɛ 21:1.

Loloolo ɔ, i kaiɔ ní sɛɛmi ko nɛ ya nɔ ngɛ i kɛ nyumu ko nɛ ji MP ngɛ Yuropa a wa kpɛti. I bɔ mɔde si abɔ kaa i kɛ lɛ maa sɛɛ ní, nɛ nyagbenyagbe ɔ, e kplɛɛ nɔ. E de mi ke, “Ma ha mo hɛngmɛfia enuɔ pɛ.” Kɛkɛ nɛ i ma ye yi si nɛ i bɔni sɔlemi. E pee nyumu ɔ nyakpɛ nɛ e bi mi kaa mɛni i ngɛ pee ɔ. Benɛ i wo ye yi nɔ ɔ, i de lɛ ke, “I sɔle nɛ i na Mawu si, ejakaa o ji e sɔmɔli ɔmɛ a kpɛti nɔ kake.” Nyumu ɔ bi mi ke, “Kɛ o ngɛ tsɔɔe kɛɛ?” Kɛkɛ nɛ i kane Roma Bi 13:4 ɔ kɛ tsɔɔ lɛ. Akɛnɛ nyumu nɛ ɔ ngɛ bumi kɛ ha Baiblo ɔ he je ɔ, ngmami nɛ ɔ ta e tsui he wawɛɛ. Mɛni lɛ je mi kɛ ba? E kɛ mi tu munyu hɛngmɛfia 30 sɔuu, nɛ ní sɛɛmi ɔ wo yiblii wawɛɛ. E tsɔɔ po kaa e bua jɔ ní tsumi nɛ wa ngɛ tsue ɔ he.

Jeha babauu nɛ be ɔ, Yehowa we bi ya kojomi he si abɔ ngɛ Yuropa ngɛ ta buli a ní tsumi nɛ nɔ ko kɛ e he be mi woe kɛ tó womi sanehi a he. Jehanɛ hu ɔ, a ya kojomi hehi konɛ a hla sanehi a mi kɛ kɔɔ nɔ nɛ e sa kaa e hyɛ jokuɛ ko nɔ ke e fɔli po gba mi, kɛ sane kpahi a he. E ji he blɔ ngua nɛ i ná kaa imi nitsɛ i na bɔ nɛ Yehowa ye bua wɔ nɛ wa ye kunimi ngɛ sane nɛ ɔmɛ a mi ha. Yehowa Odasefohi ye kunimi nɛ hiɛ pe 140 ngɛ sanehi nɛ a ye ngɛ European Court of Human Rights ɔ mi!

NYƐMIMƐ ƆMƐ NYƐƆ NƐ A FIƐƐƆ FAA NGƐ CUBA

Pee se ɔ, i kɛ Nyɛminyumu Philip Brumley nɛ e je asafo ɔ ní tsumi yi ɔ, kɛ Nyɛminyumu Valter Farneti nɛ e je Italy ɔ tsu ní wawɛɛ konɛ nyɛmimɛ ɔmɛ nɛ a ngɛ Cuba a nɛ a nyɛ nɛ a fiɛɛ faa, ejakaa a tsi wa ní tsumi ɔ nya ngɛ lejɛ ɔ. I ngma sɛ womi kɛ ya Cuba embassy nɛ ngɛ Belgium ɔ, nɛ lɔ ɔ se ɔ, i kɛ ma nɔkɔtɔma ko nɛ a hla lɛ kaa e tsu wa ní bimi ɔ he ɔ ní ɔ kpe. Kekleekle be nɛ wa kpe ɔ, wa nyɛ we nɛ wa tsu sanehi nɛ ha nɛ ma nikɔtɔma amɛ tsi wa ní tsumi ɔ nya a he ní.

Pee se ɔ, i sɔle kɛ ha Yehowa konɛ e tsɔɔ mi blɔ, lɔ ɔ se ɔ, i bi mɛ kaa a ha mi he blɔ nɛ ma mane Baiblo kakaaka 5,000 kɛ ya Cuba ma a mi, nɛ a kplɛɛ nɔ. Baiblo ɔmɛ ya su Cuba slɔkee, nɛ a gba kɛ ha nyɛmimɛ ɔmɛ. Enɛ ɔ ha nɛ wa ná nɔ mi mami kaa Yehowa ngɛ wa mɔde bɔmi ɔ nɔ jɔɔe. Pee se ɔ, wa kpale bi blɔ konɛ a ha nɛ waa mane Baiblo kakaaka 27,500 kɛ ya Cuba, nɛ a kplɛɛ nɔ ha wɔ ekohu. Akɛnɛ wa ye bua wa nyɛmimɛ nɛ a ngɛ Cuba, nɛ a ná mɛ nitsɛmɛ a Baiblo he je ɔ, e ha nɛ ye bua jɔ wawɛɛ.

I ya Cuba si abɔ konɛ ma ye bua kɛ je nya tsimi ɔ ngɛ wa ní tsumi ɔ nɔ. Enɛ ɔ ha nɛ i kɛ ma nikɔtɔmahi fuu ba pee huɛmɛ.

WA YE BUA NYƐMIMƐ NƐ A NGƐ RWANDA

Ngɛ jeha 1994 ɔ mi ɔ, a gbe nihi 1,000,000 kɛ se ngɛ Rwanda ngɛ Tutsi wɛtso ɔ nɛ a bɔ mɔde kaa a ma kpata hɛ mi ɔ mi. Aywilɛho sane ji kaa wa nyɛmimɛ komɛ piɛɛ nihi nɛ a gbo ɔ he. Be bɔɔ se ɔ, a hla nyɛmimɛ komɛ kaa a ya wo nyɛmimɛ ɔmɛ a bua nɛ a ha mɛ a hiami níhi.

Benɛ wa ya su Rwanda ma ngua nɛ ji Kigali ɔ, wa na kaa a fia tuhi kɛ ná gbi sisi tsɔɔmi ɔfisi ɔ, kɛ he nɛ a kɛ womihi toɔ ngɛ ɔ. Dɔmi sane ji kaa a de wɔ kaa a kɛ klaatehi gbe wa nyɛmimɛ ɔmɛ babauu. Se kɛ̃ ɔ, a de wɔ bɔ nɛ nyɛmimɛ ɔmɛ je suɔmi kpo kɛ tsɔɔ a sibi ha. Kaa nɔ hyɛmi nɔ́ ɔ, waa kɛ nyɛminyumu ko nɛ e ji Tutsino ɔ kpe. E tsɔɔ kaa weku ko nɛ a ji Hutubi nɛ a ji Odasefohi ɔ ngɔ lɛ kɛ laa ngɛ muɔ ko mi ligbi 28 sɔuu. Benɛ waa kɛ nyɛmimɛ nɛ a he hiɛ pe 900 ɔ kpe ngɛ Kigali ɔ, wa wo a bua wawɛɛ.

Pee se ɔ, wa po bɔda a kɛ ho Zaire (amlɔ nɛ ɔ, a tsɛɛ ke Democratic Republic of the Congo) ya konɛ wa ya hla nyɛmimɛ babauu nɛ a je Rwanda nɛ a ya sa we ngɛ wesa he ko nɛ e ngɛ ma nɛ ji Goma a kasa nya a. Se wa nɛ nɔ ko nɔ ko, lɔ ɔ he ɔ, wa sɔle konɛ Yehowa nɛ ye bua wɔ nɛ waa na nɔ ko. Lɔ ɔ se ɔ, wa na nɔ ko nɛ e ngɛ nyɛɛe kɛ ma wa ngɔ, kɛkɛ nɛ wa bi lɛ kaa e le Yehowa Odasefono ko lo. E de ke: “Ee, Odasefono ji mi. Ma suɔ nɛ i kɛ nyɛ nɛ tsɔɔ oslaa be mi yemi kɛ buami ajla toli nɛ a ngɛ hiɛ ɔ.” Benɛ waa kɛ ajla toli ɔmɛ ya sɛɛ ní se ɔ, a ngɔ wɔ kɛ ya tsɔɔ nyɛmimɛ nɛ a hiɛmi maa su 1,600 nɛ a ngɛ wesa he ɔ, nɛ wa da ngmami ɔ nɔ kɛ wo mɛ he wami saminya. Jehanɛ hu ɔ, waa kɛ mɛ susu sɛ womi ko nɛ je Blɔ Tsɔɔmi Ajla Toli ɔmɛ a ngɔ ɔ he. Benɛ wa de nyɛmimɛ ɔmɛ ke: “Wa sɔleɔ ha nyɛ be fɛɛ be, nɛ wa le kaa Yehowa be nyɛ sie” ɔ, a bua jɔ wawɛɛ. Ngɛ anɔkuale mi ɔ, nɔ́ nɛ Blɔ Tsɔɔmi Ajla Toli ɔmɛ de mɛ ɔ ba mi. Amlɔ nɛ ɔ, Odasefohi nɛ a he hiɛ pe 30,000 kɛ bua jɔmi ngɛ Yehowa sɔmɔe ngɛ Rwanda!

WA FIA WA PƐƐ SI KAA WA MAA YA NƆ MAA YE ANƆKUALE

Benɛ wa sɛ gba si himi mi maa pee jeha 58 ɔ se ɔ, ye yo Elly nɛ i suɔ lɛ ɔ gbo ngɛ jeha 2011 ɔ mi. I de Yehowa bɔ nɛ i ngɛ haoe ha, nɛ e wo ye bua wawɛɛ. Jehanɛ hu ɔ, Matsɛ Yemi ɔ he sane kpakpa a nɛ i fiɛɛ kɛ tsɔɔ nihi ɔ wo ye bua.

E ngɛ mi kaa i ye jeha 90 kɛ se mohu lɛɛ, se i tsuɔ fiɛɛmi ní tsumi ɔ daa otsi. Jehanɛ hu ɔ, e ji he blɔ ngua nɛ i ná kaa i kɛ Legal Department nɛ ngɛ Belgium Betel ɔ ngɛ ní tsue, nɛ i kɛ ni kpahi sɛɛɔ níhi a si kpami nɛ i ná a he ní, nɛ i woɔ nihewi kɛ yihewi nɛ a ngɛ Betel ɔ he wami.

Jeha 84 nɛ be ɔ ji kekleekle be nɛ i sɔle kɛ ha Yehowa. Kɛ je lɔ ɔ se ɔ, ye si himi tsake nɛ i hɛ kɛ su Yehowa he wawɛɛ. Ye bua jɔ saminya kaa ngɛ ye si himi mi tsuo ɔ, Yehowa bu ye sɔlemihi tue.—La 66:19.b