Mo Susu Otihi Nɛ O Kase ɔ He Ekohu

Anɛ e he waa ha mo kaa o ma kai níhi nɛ o kase ɔ lo? Be komɛ ɔ, e baa jã ngɛ wɔ tsuo wa blɔ fa mi. Mɛni ma nyɛ maa ye bua mo? Mo susu oti ɔmɛ a he ekohu.

Ke o ngɛ ní kasee ɔ, mo ná tsui nɛ o susu otihi nɛ a he hia wawɛɛ ɔ a he. Bɔfo Paulo wo nyɛmimɛ nɛ a kase e sɛ womi ɔ he wami kaa a pee jã. E de mɛ ke: “Jehanɛ ɔ, oti ɔ nɛ ngɛ nɔ́ nɛ wa ngɛ dee ɔ mi ɔ ji nɛ ɔ nɛ.” (Heb. 8:1) Enɛ ɔ nɛ e de ɔ ye bua nihi nɛ a ngɛ lɛ tue bue ɔ nɛ a nu oti ɔ sisi, nɛ a na bɔ nɛ oti ɔmɛ kɔɔ e munyuyi ɔ he ha.

Ke o kase ní ta a, o ma nyɛ maa ngɔ be bɔɔ kaa hɛngmɛfia nyɔngma kɛ pue o yi mi tɛ ngɛ otihi nɛ o kase ɔ a he. Ke o kaii we oti ɔmɛ saminya a, moo hyɛ munyuyi nyafinyafi ɔmɛ ekohu loo moo kane kekleekle munyu nɛ je kuku fɛɛ kuku sisi ɔ konɛ o nyɛ nɛ o kai nɔ́ nɛ o kase ɔ. Ke o kase nɔ́ ehe ko ɔ, moo bɔ mɔde kaa o maa ngɔ mo nitsɛ o munyu kɛ tsɔɔ mi. Ke o susu otihi nɛ o kase ɔ he ekohu ɔ, e maa ye bua mo konɛ o kai níhi nɛ o kase ɔ, nɛ o na bɔ nɛ e kɔɔ o he ha.