Nɔ́ Nɛ Maa Ye Bua Yihi Nɛ A Peeɔ Mɛ Nisɛ Níhi

Munyu nɛ ɔ ji nɔ́ nɛ a kɛ je munyu nɛ e yi ji “Mɛni Ma Ha Nɛ Yihi Maa Nu He Kaa A Ngɛ Slɔkee?—Nɔ́ Nɛ Baiblo ɔ De Ngɛ He” nɛ ngɛ jw.org ɔ nɔ ɔ sisi. Ngɛ jamɛ a munyu ɔ sisi je kulaa a, link ko ngɛ lejɛ ɔ nɛ ke o nyɛ nɔ ɔ, e maa download ha mo. Ke e download ta a, o ma nyɛ maa print lɛ kaa dɛ womi. Nyɛmiyo ko nɛ ngɛ United States nɛ a tsɛɛ lɛ ke Stacy ɔ de ke, “I print munyu nɛ ɔ eko nɛ i kɛ nyɛmiyo ko waa kɛ ya he ko nɛ a hyɛɛ yihi nɛ a be slɔkee ɔ a nɔ ngɛ ɔ ngɛ wa zugba kpɔ ɔ mi.”

Ní tsulɔ ko nɛ e ngɛ lejɛ ɔ bi ke ji kaa wa ma nyɛ ma ha lɛ dɛ womi nɛ ɔ fuu nɛ e gba kɛ ha nihi nɛ a ngɛ lejɛ ɔ. Nyagbenyagbe ɔ, i kɛ nyɛmiyo ɔ wa gba dɛ womi nɛ ɔ kakaaka 40 kɛ se, kɛ jw.org contact card ɔ 30. Be kpa nɛ wa ya lejɛ ɔ, ní tsumitsɛ ɔ bua jɔ nɛ e de wɔ kaa waa kɛ yihi nɛ a ngɛ lejɛ ɔ nɛ je Baiblo ɔ kasemi sisi.

Stacy kɛ nyɛmiyihi enyɔ ya he kpa ko nɛ a hyɛɛ yihi nɛ a be slɔkee ɔ a nɔ ngɛ ɔ, nɛ a ya gba dɛ womi nɛ ɔ enuɔ ngɛ lejɛ ɔ hulɔ. Nɛ ngɛ lejɛ ɔ hu ɔ, ni ɔmɛ bi kaa a ba ha mɛ dɛ womi ɔ fuu. Ní tsulɔ ɔ kake de ke, “Wa hia dɛ womi nɛ ɔ wawɛɛ ejakaa e maa ye bua yihi nɛ a ngɛ hiɛmi nɛ ɔ.” Benɛ nyɛmimɛ ɔmɛ kpale kɛ ya lejɛ ɔ ekohu ɔ, yihi nɛ a ngɛ lejɛ ɔ ekomɛ suɔ kaa a maa hyɛ bɔ nɛ a kɛ nihi kaseɔ Baiblo ɔ ha, nɛ a kpɛti nihi enyɔ bua jɔ kaa a kɛ mɛ maa ya asafo mi kpe nɛ a maa pee ngɛ otsi ɔ nyagbe ngɛ Matsɛ Yemi Asa a nɔ ɔ eko.

Stacy de ke: “Benɛ nihi babauu kplɛɛ dɛ womi nɛ ɔ nɔ kɛ bua jɔmi ha a ha nɛ wa he mi po. Benɛ wa print nɛ wa ku mi ha a ha nɛ nihi a bua jɔ kaa a maa ngɔ eko. Nɛ e ji blɔ nɛ hi pe kulaa nɛ wa gu nɔ kɛ ha nɛ yihi nɛ a peeɔ mɛ nisɛ ní ɔ nu Mawu Matsɛ Yemi ɔ he sane kpakpa a. Wa bua jɔ bɔ nɛ a he wɔ atuu ha a he, nɛ wa bua maa jɔ hu kaa Yehowa maa jɔɔ mɔde nɛ wa ngɛ bɔe kaa wa maa fiɛɛ sane kpakpa a kɛ ha yi nɛ ɔmɛ nɔ.”