NƆ́ NƐ A MAA KASE

Yehowa maa gu Mesia Matsɛ Yemi ɔ nɔ kɛ ha nɛ e yi mi nɛ e to ngɛ zugba a kɛ adesahi a he ɔ nɛ ba mi. Wa ma susu somi komɛ nɛ Baiblo ɔ wo ta, kɛ bɔ nɛ eko tsuaa eko kɔɔ hiɔwe nɔ yemi ɔ he ha a he ngɛ ní kasemi nɛ ɔmɛ a mi. Wa ma susu nɔ́ he je nɛ e sa kaa wa ná hemi kɛ yemi nɛ mi wa ngɛ Matsɛ Yemi ɔ mi ɔ hu he.

Wa ma susu nihi nɛ a sɔmɔ Yehowa blema kɛ nihi nɛ a ngɛ jã pee mwɔnɛ ɔ a he ngɛ munyu nɛ ɔ nɛ wa maa kase ɔ mi. Lɔ ɔ maa ye bua wɔ konɛ wa bua nɛ jɔ kaa wa piɛɛ Mawu he kɛ ngɛ ní tsue.

Wa ngɛ je nɛ mi wa mi, enɛ ɔ he ɔ, e yee kaa wa maa ye Yehowa anɔkuale. Ní kasemi nɛ ɔ tsɔɔ kaa Abraham kɛ Mose susu níhi nɛ a ngɛ hiɔwe ɔ a he. Ní kasemi ɔ maa ye bua wɔ konɛ wɔ hu wa susu Yehowa Mawu kɛ e Matsɛ Yemi ɔ he.