Yuda Bi Ayɔhi Abɔ Nɛ A Gbe Mɛ, Kɛ Bɔ Nɛ E Sa Yehowa Odasefohi A He Ha​—Mɛni Baiblo ɔ De?

Ngɛ January 27, 2023 ɔ nɔ ɔ, nihi fuu maa ye gbijlɔ nɛ ji International Holocaust Remembrance Day ɔ. Eko ɔ, yi wu tso ní peepee kɛ gbeye níhi nɛ ya nɔ jeha 75 kɛ se ji nɛ ɔ ma nyɛ ma ha nɛ o bi o he nɔ́ he je nɛ Mawu ngmɛ blɔ nɛ́ a gbe nihi fuu jã a.

• Ke o suɔ nɛ o le nɔ́ nɛ Baiblo ɔ de ngɛ enɛ ɔ he ɔ, moo kane munyu nɛ ji “Mɛni He Je Nɛ Mawu Ngmɛ Blɔ Nɛ A Gbe Yuda Bi Ayɔhi Abɔ ɔ? Mɛni He Je Nɛ Mawu Tsi We Nya a?”

Yuda bi fuu ji nihi nɛ a gbo ngɛ haomi nɛ ɔ nɛ ba a mi. A je blɔ gbe nihi ayɔhi abɔ. A wa nihi nɛ a ngɛ kuu kpahi a mi ɔ hu yi mi, nɛ a gbe mɛ benɛ a ngɛ Yuda bi ɔmɛ gbe ɔ. Yehowa Odasefohi hu piɛɛ nihi nɛ a wa mɛ yi mi ɔ he. A wa mɛ yi mi ngɛ a hemi kɛ yemi ɔ he je.

• Ke o suɔ nɛ o kase babauu ɔ, moo kane munyu nɛ ji “Mɛni Lɛ Ba Yehowa Odasefo Ɔmɛ A Nɔ Benɛ A Ngɛ Yuda Bi Fuu Gbee ɔ?”

‘Hwɔɔ se he hɛ nɔ kami kpakpa’

Nihi babauu yeɔ gbeye kaa nɔ́ nɛ ya nɔ benɛ a gbe Yuda bi fuu ɔ eko maa kpale ba. Bua jɔmi sane ji kaa, Baiblo ɔ wo si kaa hwɔɔ se ɔ, oslaahi kaa jã be bae hu.

• “‘Yi mi nɛ [imi Yehowa] i to ngɛ nyɛ he ɔ, imi nɔ kake too pɛ lɛ i le; i to nɛ ma ha nɛ nyɛ he mi nɛ jɔ nyɛ, se pi kaa ma hao nyɛ. Ní kpakpahi nɛ nyɛ ngɛ blɔ hyɛe ɔ, i to nɛ ma ha nyɛ.’”​—Yeremia 29:11.a

Hɛ nɔ kami nɛ ɔ maa ba mi ke Yehowa Mawu po yi wu tso ní peepeehi a se, nɛ e dla ní yayamihi nɛ yi wu tso ní peepeehi ngɔ kɛ ba a. E be kɛe nɛ:

• E ma kpata nihi nɛ a yeɔ ni kpahi awi ɔ a hɛ mi.​—Abɛ 2:22.

• E ma je nihi tsuo nɛ a ngɛ nɔ́ nae ɔ, a nɔ́ nami ɔmɛ kɛ je.​—Kpo Jemi 21:4.

• E ma tle nihi nɛ a gbo ɔ si kɛ ba wami mi ekohu.​—Yohane 5:28, 29.

O kɛ o hɛ ma nyɛ maa fɔ bua womi munyu nɛ ngɛ Baiblo ɔ mi nɛ haa wa náa hɛ nɔ kami ɔ nɔ. Ke o suɔ nɛ o le nɔ́ he je nɛ o kɛ o hɛ ma nyɛ maa fɔ si womi nɛ ɔmɛ a nɔ ɔ, wa ngɛ mo nine fɔe nɛ o ka wa Baiblo mi ní kasemi nɛ nɔ ko maa ye bua mo nɛ́ o be he hiɔ woe ɔ eko.